Yontu 72:12-20

¹²Ɩlɛnɑ ɩnɩ ɩ wɑɑsɩ kʋnyɔntʋ wei ɩ wiikinɑ-ɩ tɔ nɑ wɑhɑlɑ tɔɣɔlʋ wei ɩ fɛɩnɑ sənlʋ tɔ.

¹³Wulɑʋ kɑ́ wɛɛnɑ ɩcɑm nɑ kʋnyɔntɔɣɔlʋ nɑ mpɑ pɑ pɑsəɣɩ pɑ tɩ tɔ pɑ pətɔɔtəlɛ, nɑ ɩ́ yɑ́ pɑ weesiŋ.

¹⁴Wulɑʋ kɑ́ yɑ pɑ weesiŋ kɛ ŋmɑkəlʋɣʋ nɑ mʋsʋŋ niŋ tɑɑ. Mpi tɔ, pɑ kɛ́-ɩ pʋlʋ sɔsɔɔm kɛ́.

¹⁵Pɑɑ wɛɛnɑ weesuɣu nɑ pɑ́ hɑ-ɩ Sepɑ nyə́mɑ wʋlɑ. Pɑɑ sələməɣɩ Ɩsɔ kɛ́ ɩ tɔɔ kɛ́ tɑm kɛ́, nɑ pɑ́ kooliɣi-ɩ kʋpɑntʋ kɛ pɑɑ kʋyɑkʋ ŋku.

¹⁶Tɔɣɔnɑɣɑ hɑləm kɑ wɑɑsɩ tɛtʋ tɑɑ nɑ pə́ kpɛnnɑ pulɑsɩ nyɔɔŋ tɑɑ. Nɑ kɑ pee ciɣitiɣi ɩsɩɩ Lipɑŋ tɩɩŋ sɔsɔɔŋ, nɑ yəlɑɑ huki ɑcɑlɛɛ tɑɑ ɩsɩɩ nyɩɩtʋ kɛ tɑwɑ tɑɑ.

¹⁷Wulɑʋ hətɛ kɑ́ wɛɛ tɑm tɔɔ kɛ́, hɑlənɑ kʋyɑŋku ilim kɑ sɩɩ tənɑɣɑ tɔ. Nɑ pɑ́ kooliɣi təmɑɣɑ kʋpɑntʋ nɑ pɑ́ yɑɑkənɑ ɩ hətɛ, nɑ piitimnɑɑ yɑɑkɩ-ɩ leleŋ nɩɩlʋ.

¹⁸Tɑcɑɑ Ɩsɔ, wei nyɑ́ n kɛ́ Ɩsɛɣɛlɩ nyə́mɑ Ɩsɔ tɔɣɔlɛ teeli tʋ, nyɑ́ tike n lɑkənɑ kɔkɔlɔ nyəmnɑɑ.

¹⁹Nyɑ́ hətɛ sɔsɔɔlɛ ntɛ́ teeli nyəntɛ kɛ tɑm tɔɔ. Nyɑ́ teu ɩ́ wɑɑsɩ tɛtʋ tənɑ tɑɑ. Ɩsɔ ɩ́ kɔnɑ mpʋ, Ɩsɔ ɩ́ kɔnɑ mpʋ.

²⁰Sesee pəyɑlʋ Tɑfiiti sələmʋɣʋ tənɑɣɑ ntɔ.