Miti Mânec 72:12-20

¹²E ŋic hapetaczi kuku qacneme hone kitaŋ ecneocmu, â qarâ suriŋne me hone bafic tâmiric e iŋuc jaha ecneocmu.

¹³Ŋic bebetaŋne â hapetac ere bune sâqoreocmu, â tac qararacne juju‐jeŋic sabeckeocmu.

¹⁴Fific guguriŋ â bâbâʒâic maic‐jopaha batarac‐jopaocmu, â socjeŋicte maname furi sâko ekac.

¹⁵E dameŋ ʒora juzejec, â Saba mâreŋkonec gol tahackenʒepieŋ. Ere erâ ʒuʒuhuc numuhuc junʒepieŋ, ehame Anuture jambuŋzi erao wahahuc juzejec.

¹⁶Nânâ monʒaŋ mazuc mâriri fuazejec, tikine tikine sawe mâririackezejec; jufu mumuc Lebanoŋte sâc ezejec. Haene haene ŋic ŋokac fua sawec enʒepieŋ, kecɋaŋzi gieo fuaekac iŋucne.

¹⁷Ʒâŋe biŋe‐ticne fofo sanaŋ foraʒizejec, ʒoaŋzi ŋeŋe sanaŋ ŋeekac irec sâc. Ŋiczi ere ʒâŋeo iticnehuc jajambuŋ enʒepieŋ, â ŋicne ŋicne e muteŋkenʒepieŋ.

¹⁸Wofuŋ, Israere Anutu, e muteŋkezo, e buc mâsi sâko baekac.

¹⁹Tatamac ʒâŋe‐ticne muteŋkehuc juzo, eri tatamac‐ticnezi mâreŋ sâko mâreŋ fusezejec. Jâmbomac jâmbâŋ.

²⁰Dawidi, Isaire ŋokâ, ere nunumu gae ʒira tarakac.