Yontu 44:2-18

²Hɑɩ, Tɑcɑɑ, tɑ́ cɑɑnɑɑ kɛɛsɑ-tʋɣʋ mpi n lɑpɑ-wɛɣɛ too lɔŋtɑɑ tɔ nɑ tə́ nɩɩnɑ tɑ́ ŋkpɑŋŋ.

³N tɔɣɔnɑ piitimnɑɑ yəlɑɑ nɑ ń sɩɩ-wɛ. N kʋwɑ yəlɑɑnɑɑ nɑ pə́ wɑlənɑ-wɛ.

⁴Pə tɑɣɑ pɑ toŋ nɑ pɑ yoou wontu yɑpənɑ-wɛ, nɑ pə́ lɑ́ nɑ pɑ́ tɔɣɔ tɛtʋ. Amɑ nyɑ́ toŋ nɑ nyɑ́ wɛɛʋ kɛ pɑ wɑɑlɩ lɑpənɑ mpʋ. Mpi tɔ, n kɑ sɔɔlɑ-wɛɣɛ.

⁵Hɑɩ, Ɩsɔ, nyɑɣɑlɛ mɑ wulɑʋ, nyɑ́ yekinɑ nɑ Yɑkɔpʋ kələɣɩ.

⁶Nyɑ́ toŋ kɛ tə pəsəɣənɑ tɑ́ kolontunɑɑ kɛ kpɛntəlɑsɩ, nɑ tə́ fɛləɣɩ-wɛɣɛ nɔɔhɛɛ nɑ nyɑ́ hətɛ.

⁷Tə tɑ tʋ tɑ́ tɔɔʋ kɛ nɑɑni. Pəyele tə tɑ tɑŋ tɑ́ lɑɣɑtɛ sɩ tə́ wɑɑsɩ-tʋɣʋ pʋlʋ.

⁸Mpi tɔ, nyɑ́ yɑkənɑ-tʋɣʋ tɑ́ kolontunɑɑ niŋ tɑɑ nɑ ń tʋɣɩ mpɑ pɑɑ cɑɑkɩ-tʋ tɔɣɔ fɛɛlɛ.

⁹Tɑcɑɑ tɩɩ tʋɣʋ-ŋ teeli kɛ pɑɑ kʋyɑkʋ ŋkuɣʋ. Tɩɩ sɛɛkɩ-ŋ tɑm kɛ́.

¹⁰Pɑɑ nɑ mpʋ n lɔ-tʋ nɑ ń tʋ-tʋɣʋ fɛɛlɛ, nɑ ń kisi tɑ́ yoolɑɑ wɑɑlɩ kɛ wɛɛʋ.

¹¹N yelɑɑ nɑ tə́ se tɑ́ kolontunɑɑ, nɑ pɛlɛ pɑ́ kuu tɑ́ wontu.

¹²N pɛtɑ-tʋɣʋ pɑ niŋ tɑɑ kɛ́ ɩsɩɩ tɔlɑ kɛ təkʋlɛ nɑ tə́ yɑ́ yem kɛ́ lɛlɑɑ tɛ́.

¹³N lɔ nyɑ́ piyɑ tɑɣɑ ɑləhɑ kɛ́ yem kɛ́ n tɑ wɑɑ tɑ́ tɔɔ kɛ́ pʋlʋ.

¹⁴N yelɑɑ nɑ tɑ́ cɔlɔ nyə́mɑ tʋʋkɩ-tʋ, nɑ pɑ́ pɑɑnɑ-tʋ nɑ pɑ́ woŋiɣi-tʋ.

¹⁵Tɑɣɑ piitimnɑɑ yookinɑ yontu, nɑ yəlɑɑ nɑ́ɑ́ tuliɣi-tʋɣʋ ntompee.

¹⁶Pɑɑ kʋyɑkʋ ŋkuɣu fɛɛlɛ kpɑɑkɩ-m nɑ pə́ lɑkɩ-m tokuɣu

¹⁷kɛ wɑɑtʋ wei mɑ nɩɩkɩ kolontu kʋtʋɣʋ nɑ ɩ sɑɣɑtʋɣʋ tɔ.

¹⁸Wɑhɑlɑnɑɑ pɑnɛ pɑ tənɑ pɑ mɑkənɑ-tʋɣʋ. Pəyele tə tɑ sɔɔ nyɑ́ tɔɔ. Pə́cɔ tə tɑ wɑkəlɩ tɑ́ nɑ-ŋ tɑ́ nɔɣɔ pɛɛlʋɣʋ.