Psalm 44:2-18

²Kom kotin pakiweier men liki kan ki lim omui, ap wilian ir di; kom kotin koko sang wei kan, ap id katotoe ir ala.

³Pwe re sota kaloedier sap o ki ar kodlas, o pa arail sota katepa ong ir, pwe pali maun omui o lim omui, o marain en silang omui; pweki kom kotin kupura irail er.

⁴Pwe komui Kot ai Nanmarki, me inauki ong Iakop, en sauasa i.

⁵Komui, me se pan kawekila at imwintiti kan; ni mar omui me se pan tiakekidi me kin palian kit.

⁶Pwe i sota kin kaporoporeki ai kasik katieu, o ai kodlas sota kak dore ia la.

⁷Pwe komui me kin sauasa kit sang at imwintiti kan, o kom kin kanamenokala, me kailong kin kit.

⁸Ran karos se pan kapinga Kot, o se pan danke ong mar omui kokolata. Sela.

⁹Ari so, kom kotin likidmalie kin kit ala, pwe sen lisela, o komui sota iang at karis akan.

¹⁰Kom kotin mueid ong at imwintiti, ren paki kit wei, o me kailong kin kit, kin kulia sang at kapwa.

¹¹Kom kotin mueid ong ir, ren kawe kit ala dueta sip oko, o kom kotin kamueit kit pasang nan pung en men liki kan.

¹²Kom netikila sapwilim omui kan ni pwai sued, a komui ap sota kapwapwa kilar.

¹³Kom kin kotin wiai ong kit, sen kankaurur ren men imp at, o lalaue o sarodi ren me kapil kit pena.

¹⁴Kom kotin wia kin kit karasepa eu ren men liki kan o aramas akan kin dueduälok kin kit.

¹⁵I kin saro nin ran karos o mas ai me dir en namenok,

¹⁶Ni ai rongerong aramas morsued o lalaue, o ni ai kilekilang ai imwintiti o me kin akdepuk kan.

¹⁷Mepukat karos lel dong kit er, ari so, se sota kak monokela komui, de wia dip ong sapwilim omui inau.

¹⁸Mongiong at sota pupwei sang komui, o se sota wuki wei sang al omui.