Yáasiↄ 1:4-29

⁴Yáasipiↄ ì nↄ̀sɛdoũde gba laai, ì to ɛ̀waaso àↄ ku a dↄ̀ↄwa ń dↄ̃ao.

⁵Laaide i ma, aà yãdadaa i gɛ́ aɛ, nↄ̀sɛde i lɛdama e a guu,

⁶i yáasi ń yãlɛɛũanɛo midↄ̃ ń ↄ̃nↄdeↄ yã'oao ń ń faai yã́ↄ.

⁷Vĩakɛa Diiɛ mɛ́ dↄ̃a zĩ́na ũ, gbɛ̃́ pↄ́ ì saka ↄ̃nↄ ń yãdadaaoguá sↄũɛ.

⁸Ma nɛ́, nìli n mae yã'onɛ ma, ńsu pãkpa n da lɛdamaio.

⁹Aↄ dɛ fùa kɛfɛna ũ n miwa, aↄ dɛ yàbaa ũ n nↄɛ.

¹⁰Tó duunkɛnaↄ lɛ́ kↄ̃nikɛnɛ, ńsu weio, ma nɛ́.

¹¹Aaì mɛ: Mↄ wà gɛ gbɛ̃́ↄ dã́dã wà ń dɛdɛ, wà yãesaideↄ kpákpa wà ń kṹkũ.

¹²Wà ń mↄ́mↄ bɛ̃̀ɛ lá mia ì kɛwa, wà ń mↄ́ ĩ́i lá bɛda ì kɛwa,

¹³wí pↄ́ ↄde bui píi e, wá kpɛ́ↄ i pa ń pↄ́ pↄ́ wá nàaapiↄ.

¹⁴Mↄ wà wá baa daaa, wápii, wá mↄkpɛ iↄ doũ.

¹⁵Ma nɛ́, ńsu gɛ́ńnↄo, ńsu zɛ́sɛńnↄo.

¹⁶Asa an kɛ̀sɛ lɛɛũ ń vãikɛaoɛ, aa wãa ń gbɛ̃dɛao.

¹⁷Bakpaa bãↄ wáaá pãɛ.

¹⁸Aalɛ baikpá ńzĩaɛɛ, an tòe mɛ́ a ń pui.

¹⁹Ɔvãi'enaↄ zian we ḿpii, an luaa pↄ́i mɛ́ ì ń wɛ̃ni bↄ.

²⁰Ɔ̃nↄ lɛ́ wiilɛ gãaɛ, aà lɛ́ dↄ zɛau.

²¹Ì lɛzu zɛ́ pↄ́ wìli láauo miwa, ì kpàwakɛ wɛ̃́lɛ bĩ́ibↄlɛↄ guu à mɛ:

²²Ɔ̃nↄsaideↄ, áↄ kú ń ↄ̃nↄsaio e bↄɛ ni? Ma láanikɛnaↄ, á zɛ ma láanikɛaɛ bↄɛ ni? Sↄũↄ, áↄ za dↄ̃agu e bↄɛɛ?

²³Tó a ma lɛdama mà yãa, dↄ̃ ma a nisĩna pìsiwá, mí tó àↄ ma làasoo vĩ.

²⁴Lá ma á sisi, a gi swã́kpai, ma ↄ pòoɛ́, á gbɛ̃e laai i kawào,

²⁵lá a ma lɛdama kpà swã́a píi, i we laai pↄ́ ma á gbáio,

²⁶tó músi á lé, má á yáalↄɛ, tó yã́ á lé, má á láanikɛɛ,

²⁷baa tó yã́ á lé lán zàa'ĩanawa, mɛ́ músi á lé lán zàalolowa, mɛ́ taasi ń yã'ↄ̃mao gɛ̃̀ázi.

²⁸Gↄↄ bee á gbasa lɛzumazi, kási má weo, á ma kĩ́i wɛɛlɛ, kási á ma eo.

²⁹Asa á za dↄ̃auɛ, mɛ́ i zɛ ń vĩakɛa Diiɛoo.