1Go diat bula a umana tinata valavalar kai Solomon, nina ba ra tarai kai Esekia ra king Iuda dia ga tumu diat.
2Ba God i vapidik ta magit i mamar tana, Ma ga ra umana king dia mamar ba dia tikan ot pa ra magit.
3Da ra bala na bakut arama iat, ma ra bala na pia ara iat, Damana ra nuknuk i ra umana king pa da nunure valar pa ia.
4Ba di tun vagomgom ra silva, Ra tena madaka i pait ra la me;
5Da okole vue ra umana tena varpiam kan ra king, Ma kana kiki na king na tur padikat ta ra mangamangana takodo.
6Koko una pite pa mule u ta ra luaina mata i ra king, Ma koko una tur ta ra turtur kai ra umana ngalangala;
7Tago i boina ba da biti tam, Una kakari uti na lua, Ma pa i boina ba da vaki u ara namur ta ra luaina mata i ra king, Nina ba ra matam i tar gire.
8Koko una rut pa ra vartakun pire ra tena varkurai, Kan pa u nunure ba una pait ra ava ta ra mutuaina, Ba talaim i tar varuva u.
9Amur a pirpir ma talaim iat, Ma koko una pala ra magit i pidik kai ta ra tikai;
10Kan nina i valongore na vul u, Ma ra kaina varvai ure u na tur vatikai.
11A tinata ba di vatang mal pa ia I da ra gamata di pait ia ma ra goled ta ra la na silva.
12Da ra mamar. talinga di pait ia ma ra goled, ma ra magit na marmar di pait ia ma ra goled i ngatngat, Damana ra tena varpit i kabinana i topa ra talinga i ra tena tinorom.
13Da ra madoldol na mavoko i valavalagar ta ra e na varuruai, Damana ra dovot na tultul pire diat dia tultulue, Tago i valagar ra bala i kana umana luluai.
14Da ra bakut ma ra vuvu ba pa ta bata tana, Damana ra tutana ba i malamala tena vartabar.
15A mangamangana vovovon i vo valar pa ra tena varkurai, Ma ra madu na tinata i bubur ra ur.
16Dave, u tar tikan tadav ra bulit na livur? Una en ra ngungu tana ba i topa u, Kan una manga maur me, ma una marue mule.
17Koko una ruk milat ra kuba i talaim, Kan na talanguan tam, ma na milmilikuane u.
18A tutana ba i varvarvai vavaongo ure talaina, I da ra ram, ma ra pakat na vinarubu, ma ra pu i lamia.
19A nurnur tadav ra tavir na tutana ta ra bung na purpuruan, I da ra pal a ngia i tabubur ma da ra keke i takari.
20Da tikai i ule vue ra mal ta ra madoldol, ma da ra tava i pinpidian ta ra mata na manua, Damana nina i kakailai pire tikai i mamat ra balana.
21Ba kaum ebar i mulmulum, una tabar ia ma ra magit na nian; Ma ba i mar, una vamoma ma ra tava;
22Tago damana u vuvunge muka ra lakit i io ta ra uluna, Ma ra Luluai na vabongon u.
23A labur i kap vaarike ra bata, Damana ra varurai i vuna ta ra matana kankan.
24I manga boina ba da kiki ta ra ul a pal ika, Ma pa i boina ba da kiki varurung ma ra vavina, a tena varngangar, ta ra ngala na pal.
25Da ra tava madoldol i valagar nina i mar, Damana ra bo na varvai maro ra gunan vailik.
26Ba ra tena takodo i malmaliara ta ra luaina mata i ra tena varpiam, I da ra kivu i piapia, ma ra mata na tava di tar vakaina.
27Pa i boina ba da en ra ngala na bulit na livur, Damana koko una manga tata na varmananai.
28Nina ba pa i kure valar pa ra nuknukina, I da ra pia na pal i tarip ma pa ta liplip tana.
