Text copied!
CopyCompare
Godigo dwagi yai po buku - Tigidali Nai Gagalama Nigali Side

Tigidali Nai Gagalama Nigali Side 12

Help us?
Click on verse(s) to share them!
1Te Yawego Abrambolo te tiwai po wai, “Nago te nago tǫ badi, te naga ayago hani me, te naga ayago bulu me, taga pao. Tama nage eno ola mabo digi gasa pedai badu me bidigi pagameo.
2Te eno nago wąį hani dabe te genuai hani mu pedalumainu yaibao. Te eno nage dali dwagi yai sę mu yaibao. Eno te nago nogi genuai ilaibao. Tama gasa we bidi dabe augwaligo te tiwai po waibao, ‘Eno homugo te Godigo enabolo dwagi yai sę emainao, te agai Abram dali yali tiwai yao.’
3Te nage dali wiegi yai kolesaga ebo bidi dabe, augwalibolo te eno wiegi yai mobo augwaliba mayu yaibao. Te ena digi te nago nogi aiyaba muabo dwai po wabo bidi dabe te eno augwalide te dolabo po mu waibao. Tama tigidali tǫde bidalubo bidi hani dabe te nago hanide naga te wiegi yai mobo augwaligo saibao,” Yawego Abrambolo te po wai.
4Tama te po obaso, Abramgo te Yawego po wali pelama, tama Lot aga dali pali. Abram bidali kibu be te bidi sese sela olama, nogo si olama, me badu nogo a naga, te 75 kibu be bidai elalubadi, te sogo agai te Haran hanude bidali tagalama, pai.
5Tama Abramgo aga we Sarai sobadi, te aga amago ogwa Lot sobadi elama, te augwali hodobo pali. Tama augwaligo augwa sę ebo bidi dabe me sobadi, tama augwaligo te Haran hanude sali doado bage me tigidali selama, tama pelama, pelama, tama augwali te Kenan moni tǫ pedaiba soali. Augwali te Kenan tǫba sabolai madi,
6tama Abram te tǫ tomodu ma pelama, tama aga te gasa pesage te hanu nogi Sekem teba saboligi pai. Tama te bulude te gasa moni ni mu deli nogi More te elaluali. Tama te sogo te Kenan hani bidi dabe te bulude bidibadi dao, tama augwaligo augwa tibo god dabebolo te moni ni pagede te augwa lotu po weyu, bidaluali.
7Te Yawe Abram bidiboba pedelama, tama tobo po wai, “Te e genuai tǫ da, te eno nago wąį hani wai dabebolo mawaibao,” te po wali. Tama tibaso, Abramgo te Yawe agaba pedelali madi te pesagede te Yawebolo lotu po weyu, ofa nai mayu yabo alta sai nigai.
8Nosali Abramgo te More bulu tagalama, ma pelama, tama dolo nogo pedai badu, te saut wabo, te badu peyu, tama te bulu du elalubo buluba sabolali. Te bulu du dabe elalubo badu te sia ge pedalubo pedai badu, te Betel hanu pąde elalubo madi, te badu bidigi pai. Tama agai te pesage me deli te Betel de Ai hanu si tomode aga ugwa be dabe dodolama, muani. Te hanu Ai te giliga dulubo badu elaluali, te Betel hanu te giliga pedalubo pedai badu elaluali. Tama Abramgo alta sai te bulude me nigilama, te Yawe nogi weyu, agabolo lotu po wai dao.
9Tama elama, bidama, tama nosali Abram te me mu pidubadi geanima, te giliga pabo bogo badu te moni tǫ pedai Negeb, te badu sabaligi pai.
10Te nosali Abram te Negeb tǫ pedaide bididubadi, te nasi ebo sogo pedelama, tama te bulude nai mu meni yai. Tama tibaso, Abram te Isip moni tǫ pedai teba pelama, te pęwadage sogo naga bidigi pai.
11Tama Abram te pelama, te Isip pąba sabalubo sogo, te aga we Saraibolo tama po wai. Agai te po wali, “Odao, eno koneani, nage te gasa sawi yai we mu dao.
12Te Isip bidi dabego nage sulama, te po waibao, ‘Te Abramgo we da,’ po waibao. Tama augwaligo ena ela munama, tama nage saibao.
13Nago augwalibolo tama tiwai po wao, ‘Abram aga te ena abe da,’ wao. Tama po obaso da, te augwaligo dwagi yai kolesaga naga ena dali eyu, tama ena ela mugobeo,” wali.
14Tama Abram te Isipba mu sabolali, tama te mu tama, te Isip bidi dabego te agai we suali, te gasa sawi yai mu asobo suali.
15Tama te Isip dabego genuai polasa tuni bidi tego sę tonalubo bidi dabego te Sarai sulama, augwaligo augwa tuni bidibolo te po wali, “Te we da, te gasagi yai sawi yai we mu dao.” Tialima, augwaligo aga sigi pelama, tama tuni bidigo beba odasa pai.
16Tama te genuai tuni bidigo Sarai godolo mu elama, tama agai dwagi yai kolesaga Abrambolo yali. Tama agai Abrambolo te sipsip me, meme me, bulmakau me, moni kibu donki me, te hauwa mu mobadi, tama sę ebo bidi me, sę ebo we me, te moni kibu kamel me, te tama nai Abrambolo mani.
17Tiali goli, Yawego te haniani dwai gasi dabe te genuai tuni bidibolo me, te aga bede bidali we bidibolo dali tagala palama, te tuni bidigo te Sarai dali emai hagede dwai sę te wei ponoyu, tama tiai dao.
18Tialima, te tuni bidigo Abram i olama, agaba asobosi, te agabolo te tiwai po hanalu wai, “Magi baso nago te tiwai kolesaga enabolo yaliwe?” te po wai. “Nago enabolo Sarai te nago we da po wabeo.

19Nago te naga abe da po wali, tama tibaso te eno aga selama, te eno we tiwai bidali. Magi baso nago te kolesaga yaliwe? Naga we sao! Tama duga si piąo!”
20Tialima, te polasa tuni bidigo aga bidi dabebolo po olama, tama augwaligo Abram te Isipde bidali sela sąwai. Tama augwaligo aga me, aga we dali me, te aga tigidali doado bage dali me gudulama, tama te Isip tǫ pedai sesegeba augwali dali hodobo pai, te Abram gasaba pomainogo tama yai.