1Augwali nai tula silama, tama Josepgo te aga be tonalubo sę bidibolo te po wali, “Te nai dabe te bidi dabe augwaligo sela pabo usu nama, tama te begba bulao, tama deli deligo mone te augwa beg poba bulao.
2Tama eno silva kap te augwaligo ama te sabi bidigo beg tomoba te wit abelali mone dali bulao,” wali. Tialima, sę bidigo te Josepgo wali po tiwai gilama yali.
3Tama kigamu digi mu te sę bidi dabego te Josepgo ama dede augwali te augwa donki dabe dali pomainu tagala palali.
4Augwaligo te genuai hanu tagalama, tama augwali digibulu gana pisąbadi, tialima Josepgo te aga be tonaluali bidibolo weyu te po wali, “Nage hogodama, tama te bidi dabe pali wali pobeao. Te nago augwali subosi da, teda augwalibolo nago te tiwai po hanalu wao, ‘Eno genuai bidigo dage dali dwagi yai kolesaga yali dao. Magi baso dagego aga wei ponoyu, tama dwai kolesaga yaliwe?
5Magi baso dagego eno genuai bidigo silva kap wi sela soaliwe? Genuai bidigo te kapde wę tuyu, tama agai te mena sę nosali pedelabo te me konebo sę ebo dao. Dagego dwai kolesaga mu yalio!’ Nago augwalibolo tama po wao,” wali.
6Te Josepgo sę bidi te augwaliba sabolama, tama augwalibolo te Josepgo wali po te augwalibolo wai.
7Tiali goli, augwaligo te tiwai po wei ponani, “Genuai bidi, nago mena tiwai homu elalubaso, tama nago te tiwai po obawe? Dago te tiwai kolesaga yabo te usu me egobeo.
8Nago da te Kenan tǫdu ma asali, te nago suai dao. Tama dago te dena beg pode te bulali mone dabe te dago ma sesali. Tama megi magi baso nago homugo dago nago genuai bidigo bede te gol silva te dago wi sela soali homu ebawe?
9Genuai bidi, nago te kap te da me deligo munalubo subaso da, teda te bidi isimainu yaibao, tama da tigidali te nago olo sę ebo bidi pedelaibao,” wali.
10Tama sę bidigo te tiwai po wei ponani, “Dagego po te dolo obao. Tialima, eno te kap gasa bidi me deligo begde bulalubo subaso da, teda te bidi deli naga aga te eno sę olo ebo bidi pedelaibao. Tiali goli, dage meba gasa bage te duga piagameo,” wali.
11Tama polo tama te augwali deli deligo beg te tǫba muna muna pelama, tama dayali.
12Te Josepgo sę bidigo te kap gegebo sę te augwa ama gomunai bidigo begde gagalama, susa paligo te augwa ama gesi ogwa bidigo begba siminigi pali. Tama agai te kap te Benjamingo begde bulalubo suai.
13Te ama dedego te tiwai elalubo sulama, te midigi dwai noma mu selama, tama augwaligo te augwa gudaluali ugwa dabe pisą yali. Tialima, augwaligo te beg dabe te augwa donki tudiba ma munama, tama augwali gelama, te hanuba ma pai.
14Juda aga ama dede dali te Josepgo beba sabolama, tama augwaligo aga te bede me bidalubo suali. Tama augwali wi mu ebaso, tama augwaligo augwa digi te Josep gesabidiba gedude te tǫba degasa dulali.
15Tialima, Josep hodalu, tama augwalibolo te po wali, “Dage magi yaliwe? Te dagego ena te haniani geme yai sę page koneabo bidi da, te homu ebewe?”
16Tama Judago po wei ponoyu te po wai, “Genuai bidi, te dago po mena tama wei ponagawe? Godigo te dago sęgę haninani. Genuai bidi, te nago kap elalubo suali naga, aga te nago olo sę ebo bidi me pedalugobeo. Menio. Da tigidali hodobo tiaibao,” wali.
17Josepgo te po wali, “Te me tegobeo! Eno tama me egobeo. Te augwaligo te kap munalubo suali bidi, te aga naga eno sę olo ebo bidi pedelaibao. Tiali goli, dage tigidali meba te duga aya bidibo digi ma piagameo. Eno dagede po menio,” wali.
18Juda te Josepba pelama, te po wali, “Genuai bidi, te dago po nage dali omainogo yao. Nage genuai bidi mu te Fero aga tiwai dao. Tiali goli, eno homugo te nago ena dali wado po me olamuo.
19Polobadu nago dabolo te tiwai po hanalu wali, ‘Dagego aya me ama dede bidalubowe?’ wali.
20Tama dago te po wali, ‘Awe, dago aya bidibo, aga te monu dabe yai. Tama dago ama gesi ogwa bidi me bidibo,’ wai. ‘Te ida Reselgo te aya monu dabe badi ame nani,’ te po wai. ‘Tama te gesi ogwa bidi aga ama te isai da. Tama te Reselgo ame nani ogwa si te me deli naga bidibo,’ wai, ‘tama aga ayago aga godolo mu ebo dao,’ wai.
21Tama genuai bidi, nago te tiwai po dabolo wai, ‘Te dagego ama odasa aselama, te eno sueibao,’ wai.
22Tama dago nago po te tiwai wei ponani, ‘Te waigo aga aya me taga soagobeo,’ wai. ‘Te aga aya taga sobaso da, teda aya isaibao,’ wali.
23Tama nosali nago te tiwai po me wai, ‘Te dagego ama gesi ogwa bidi te dage dali asisąbaso da, teda dage ena geduba me pedelamuo,’ wali.”
24“Da te dena aya bidibo madi ma pali, te nago sę bidi, tama dago te nago dabolo wali po te agabolo wai.
25Nosali ayago te po wali, ‘Dage ma pelama, tama dago nai dwasianu abeligi pao,’ wai.
26Tama dago te po wali, ‘Da me pogobeo. Te ama gesi ogwa bidi te da dali pisąbaso da, teda da te bidi geduba me pedalugobeo. Menio. Tiali goli, te ama gesi ogwa bidi te da dali pali da, teda da paibao.’
27Tama dago ayago dabolo te tiwai po wai, ‘Dagego koneani, eno te wego ogwa si digi ame nani.
28Te me deligo ena taga pai dao. Eno aga munu ma subeo. Tama eno homugo te uni kibugo ela tuali homu yai dao.
29Megi dagego te gasa gesi ogwa bidi te ena digibulu odasa painu wabo, tama aga te isibaso da, teda dagego ena homu dene dwai mu ilaibao. Ena monu dabe yai, tama te homu denego ena mu silaibao,’ dena ayago te po wai.”
30“Genuai bidi, megi da, te ena olo ma pobaso, tama ayago te ogwa ena dali ma asobo susiąbaso da, teda aga isaibao, magi baso meni, agai bidibo homu kolesaga te waigo bidibo homu kolesagaba mu dąų wagi pai. Te dago aya te monu dabe dwai mu. Tama te wai da dali ma hodobo asisąbaso da, teda dago te aya aga homu dene ilibogo te aga digi ela mubo tiwai mu yaibao.
32Eno te tiwai po me agabolo dąų wali, te eno te wai te ma odasa asisąbaso da, teda te sę yabo page te enade elalubadi, te ena isibo si usu naibao.
33Tama tibaso, eno te waigo pesage selama, tama ena ede nago sę olo ebo bidi bidaio. Te nago aga te aga ama dede dali ma pomainogo emainao.
34Tama te wai ena dali ma pisąbaso da, ena te aya pageba ma pogobeo. Eno te tiwai sęgę te eno ayaba pedalubo te eno homude hagela yaibao,” Judago te Josepbolo te po wali.
