Tigidali Nai Gagalama Nigali Side 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Jekopgo te Labango ogomanigo te po wabo odali, “Jekopgo te dago ayago doado bage dabe tigidali salio,” te po wali. “Tama megi da, agai doado bage hauwa elalubao, tiali goli te wiegi yai nai dabe agai te dago ayade naga sai dao,” te po wai.

²Tama Jekopgo suali, Labango kolesaga hasegelama, tama Labango aga te polobadu godolo yai gilama tiwai me ebeo.

³Tama nosali Yawego Jekopbolo te po wai, “Nage te naga ayago buluba, me te naga haniba ma pao,” wali. “Tama ena nage dali bidaibao,” wai.

⁴Tama tibaso, Jekopgo po te Resel dali Lea sibolo po ola tolama, te augwali si aselama, aga te sipsip hani dabe dali bidalubo pesageba suagasao po wali.

⁵Te augwali si sabalubode, tama Jekopgo augwali sibolo te po wai, “Eno suali, te dage sigo ayago te enade polobadu yali kolesaga tiwai isiąyu, tama agai kolesaga hasegelali. Tiali goli, eno ayago God te ena dali bidibao.

⁶Dage sigo koneani, eno te dage sigo aya dali sę bomo yali,

⁷tiali goli agai ena tibo po ola menama, tama eno sęde sabo nai te nogo si sogo hasegelali. Tiali goli, Godigo agai ena dolomainu me gogolobeo.

⁸Tama tiyu, e tiwai pedelali. Labango te po wali, ‘Te meme dabe te dodobolo pali naga te nago,’ obaso, teda te meme hani dabego te dodobolo pabo te tobage yai naga te wai dabe ame nani. Ma, agai te po wali, “Te husugu yai sipsip me meme te nago da,” po obaso, teda augwaligo te tobage wai dabe ame nai dao.

⁹Tama tiyu, tama Godigo te dage sigo ayago meme ma sipsip hani selama, te enabolo mawai dao,” wali.

¹⁰“Tama te meme omai dabego penani ebo sogo, eno te tiwai na yai, eno te meme omai kibu augwaligo tigide dodobolo pali haniani elalubo suali, te augwaligo naga te meme so kibu dabe penani ebo dao.

¹¹Tama eno nade Godigo ensel mobo bidigo ena i olama, tama enabolo te po wali, ‘Jekop.’ Tama eno te po wai, ‘Ena e bidibao.’

¹²Tama agai po ma wali, ‘Suao. Te omai kibu meme te tigide haniani dodobolo pali, augwaligo naga te meme kibu so dabe penani ebao. Ena digi eno te tiwai ilibao, magi baso meni, eno suali, te Labango nagebolo ebo sę tigidali eno sualio.

¹³Te God nageba te Betel buluba pedelali, te ena tama dao. Te Betel bulude nago te homu hodolubo masigi me deli dodolali, tama te wel ugwadu daiba gelali. Tama nago bomo yai dąų wali po me deli ena dali dąų walai. Tialima, megi da, te nago doado bage sisi ilao, tama nago te bulu taga peyu, tama naga page buluba ma pagameo,’ agai enabolo te po wali,” Jekopgo aga we sibolo te po wai.

¹⁴Resel de Lea sigo te po wali, “Te gasa nai me deli te da si go ayade nosali sabo, te menio.

¹⁵Tama ayago da si te digibulu we si pedalumainu ilali. Agai da side nai polo sai dao. Tiali goli, agai te nai tigidali dobola silai dao.

¹⁶Tigidali nai Godigo da sigo ayade selama, tama nagebolo mani, te nai te da sigo, me te da sigo wai pulubago nai dabe mu dao. Tama tibaso, nago te Godigo nagebolo wali po gilama tama tiao,” te we sigo te po wai.

¹⁷Tialima, Jekop hogodama, tama aga we wai te kamelba duamainu elama, tama agai te sipsip hani me meme hani polasa, te aga dali te gasa nai sibi te Mesopotemiade sali nai sibi dali, te tigidali polasa tagala palai. Augwali te aga aya Aisak bidibo madi te Kenan tǫba ma painu, te bulu taga soai.

¹⁹Te augwali pisiąbadi, tama Laban te sipsip dabe nisi togogi peyu, digibulu gana pai digi, tama Reselgo te aga ayago be tonalubo tibo god te bede wi salio.

²⁰Jekopgo te Aram bidi Labanbolo te aga pobao po me wabeo, te aga geme soai. Tama tiyu, agai te aga ili po ola maduali tiwai yali.

²¹Tama eyu, te aga doado bage tigidali selama, tama aga wi soali. Agai te Labango bulu tagalama, tama te wę Yufretis nogolama, tama aga te Gileat bulu du dabe elalubo tǫba painu soali.

²²Si sogo bidai digi, tama te bidi dabego te Jekop wi pali po Labanbolo wali.

²³Tialima, Labango te aga bidi dabe meba selama, tama augwaligo te Jekop pali wali pidubadi, te a naga olama, nogo si, tama sogo wabode sabolali. Tama augwaligo Jekop te Gileat bulu du pedai te badu bidibo suai.

²⁴Tama hulide, Aram bidi Labango na yali, tama God agaba pedelama, te po wali, “Nago te Jekop dali magi po me deli, ma aga wi ilibo sę me elamu dao,” te po wai.

²⁵Jekopgo te aga osogo bidabo pesage te dwasianu bulu dude nigai, tama Labango aga gegelama suali. Labango me aga bidabo pesage te Gileat bulu du elalubo madide nigai, te Jekop bidibo pesage pąde nigali.

²⁶Tialima, Labango Jekopbolo te po wai, “Magi baso nago ena ili po ola menama, tama nago eno wegi si te boide sali we si tiwai sela soaliwe?

²⁷Magi baso nago ena tibo po ola menama, tama nage geme naga wi soyu, tama nago enabolo pobao po wabewe? Te hasia nago enabolo wagi sogo da, teda eno nage te wiegi yai homu pemene dali tagala palu, te habidi me gita tęąbi wagi dao.” Labango te po wai.

²⁸“Tiali goli, nago ena bolo te eno wegi sibolo, me te eno wąį, eno wegigo wai dabebolo te dage tao po omainogo me ebeo. Nago kolesaga te dwai mu yalio.” Te po wai.

²⁹“Eno te nage dolabo bomo elaluali, tiali goli hulide nago ayago Godigo enabolo te po wali, ‘Nago te Jekop wi ilibo sę deli me elamuo,’ po wali.

³⁰Eno koneani, nage te naga page buluba ma pabo homu godolo mu ebaso, tama nago ena taga pali. Tiali goli, magi baso nago eno be tonalubo god dabe wi selasa soaliwe?” wali.

³¹Tama Jekopgo te po wei ponani, “Eno wi yali. Te nago bomonama, naga wegi si ma oda sidali weyu, te ena geme pai.

³²Tiali goli, te da tomode me deligo te nago god wi sela soai yaibaso da, teda nago aga ela muagameo. Te da e bidalubo bidi dabe gedude te nage aselama, tama dago tigidali sulama, tama dago doado bage osola suao, tama nago naga nai me deli subaso da, teda nago sao,” wali. Tiali goli, Jekopgo konebe, te Reselgo aga ayago god dabe wi sela soali.

³³Tialima, Laban te Jekopgo ugwa be tomoba pelama, tama agai doado bage dabe susa bilali. Tama nosali aga te Leago ugwa be tomoba pelama, te me susa bilali. Tama aga te sę ebo we sigo ugwa be tomoba me pelama, susa bilali, tiali goli agai god dabe te agai me subeo. Tama aga te Reselgo ugwa be tomoba pali.

³⁴Reselgo te aga ayago god dabe wi selama, tama agai te kamel dabe beg tomoba geme dualama, tama aga te beg daide ugwa dualaluali. Labango te ugwa be tomode te tigidali doado bage susa bilali, tiali goli agai te god dabe me subeo.

³⁵Tama Reselgo aga ayabolo te po wali, “Aya, nago ena dali wado po me olamuo. Te da we dabe sibigo gasi te ena sobaso, tama ena hodalugobeo.” Labango te tigidali doado bage susa bilali, tiali goli agai god dabe te agai me subeo.

³⁶Tialima, Jekop te sębę elama, tama Laban dali te tiwai wado po wai, “Eno mena dwai sę, me eno mena bomo yai po bolai baso, tama nago bomonama, tama ena te tiwai megi pobeasa asaliwe?

³⁷Nago eno doado bage tigidali susa bilama, tama nago bede elaluali naide te mena nai sualiwe? Waa? Te nago suaibaso da, teda nago hanilama, te nago hani me, eno hani me, te augwali gedude hania muao, tama da si tomode te augwa hasi po mia somainao. Tama dago te dego po te dolo mu yabowe nago sueibao.

³⁸Ena nage dali bidibadi, te kibu be bidi sese deli yai dao. Tama sesemane sogo te nago sipsip me meme hani tigidali te augwaligo wai ame nabo te me hagawai meni. Tama eno nago sipsip omai me ela tubeo.

³⁹Tama te uni hasago nago sipsip me deli ela mubo sogo, eno nagebolo sela asiyu, tama nagebolo me waselagasobeo. Menio. Ena digi eno te haga yali nai wei ponani. Nago sesemane sogo enabolo po bomonama weyu, te be bubugade me hulide te gasa bidi dabego wi sali sipsip meme tigidali wei ponao po oduai dao, tama te tigidali ena digi eno wei ponani.

⁴⁰Ena e tama bididuali, hauwa sogo te giliga posologo ena mu dolali. Tama hauwa sogo hulide me te kedaugo ena dolali, tama ena bugagia godege me pibeo.

⁴¹Ena nage dali bidiyu sę ebadi, te kibu be bidi sese deli bidali. Ena te kibu be 14 te nago wegi si sainu sę yali, tama te kibu be a naga me deli te nago sipsip hani meba sainu te sę yai. Tiali goli, nago eno sabo mone sę te nago nogo si sogo te hasegelai.

⁴²Tama eno ayago aya Abrahamgo God, te Bidi Wi Ilibo Godibolo te Aisakgo lotu po wabo God, te ena dali me bidigi menigi sogo da, teda nago ena olo ma tagala paligi dao. Tiali goli, Godigo eno homu sęgę ebo, me te eno ebo sę dabe suali, tama tiyu, hulide te aga digi te po bomonama, nage dali te po wali,” Jekopgo te po Labanbolo wai.

⁴³Tialima, Labango te po wei ponani, “Te wegi si badi, te augwali sigo wai dabe me, te eno naga dao, tama te sipsip me meme hani dabe te eno da. Te tigidali nai nago suali, te eno nai dabe dao. Tiali goli, eno magi sę te wegi si dali, me te wai dabe dali egowe?

⁴⁴Tialima, da si te bomai po dąų waibao. Tama dago te masigi dabe pesage holama, tama te pesage ede elalubaso, da sigo te dąų wali po homude konealuaibao,” wali.

⁴⁵Tialima, Jekopgo te bobage masigi me deli selama, tama te dąį tiwai ilama, tama dodolai,

⁴⁶tama agai aga hani dabebolo walama, tama augwaligo te masigi dabe meba pesage holao po wai. Augwaligo te sę ela silama, tama augwali te masigi pesage holali pąde te nai be pio tuali.

⁴⁷Te Aram pode Labango te bulu nogi te Jegar Sahaduta poali, tama te Hibru pode Jekopgo te bulu nogi Galet poali.

⁴⁸Labango te po wali, “Te e masigi pesage holali te da sigo te bomai po dąų wali, te homugo gegeda palidali weyu, te dąį tiwai muani.” Tama tibaso, augwaligo te bulu nogi te Galet poai.

⁴⁹Tama Labango te po ma wai, “Megi da, te da si tomode te dwai kolesaga idali homu eyu, te da si talua si ma bidigobeo. Nage me badu tedali bidiyu, te ena gasa badu tedali bidaibao. Tama eno homugo Yawego da si tonaluaibao,” wali. Tama tibaso, te bulu nogi augwaligo Mispa poai.

⁵⁰Tama Labango po ma wadolama, wali, “Te nago eno wegi si dali dwai sę eyu, tama te nago gasa we me sobaso, tama eno konesiąbaso da, teda eno homugo nago te Godigo da si tonaluba te homu yao,” wali.

⁵¹Nosali Labango te Jekopbolo te po wai, “Nago te da si tomode te masigi pesage holali sulama, tama eno te bobage masigi muani, te po dąų wali te homugo konealumainu ebao.

⁵²Te masigi pesage holali, me te homugo konealumainu muani bobage masigi, te augwali side da sigo homu konealumainu tama tiwai, eno te bolama, nage dali hwįagasogobeo, tama nago me te bolama, ena dali me hwįgobeo.

⁵³Eno homugo te Abrahamgo God me Nahorgo God, agai te da sigo ebo kolesaga dagalaibao,” Labango te po wai. Tialima, Jekopgo te Godigo nogide bomai po dąų wali, te aga aya Aisakgo lotu wabo Bidi Wi Ilibo God dao.

⁵⁴Agai te kibu sipsip me deli elama, te bulu dude Godibolo ofa mani. Tama agai aga hani dabe aselama, te nai be piode tuagasomainu i wai. Augwaligo te nai tula silama, tama hulide augwali te bulu dude piai.

⁵⁵Te kigamu digi mu, Labango te aga wegi sibolo, me te aga wegi sigo wai puluba dabe, augwalibolo te dage dali dwagi yai sę naga pedalumainao po weyu, tama dage tao po olama, tama agai augwali taga peyu, tama aga buluba ma geasa palio. Jekopgo Iso suainu sisi yai