1Tɑ́ tɑɑpɑlɑɑ mɛ, mǝ mɑɣɑmɑɣɑ ɩ́ nyǝmɑ́ sɩ wɑɑtʋ wei tǝ kɔmɑ mǝ kiŋ tɔ tǝ tɑ lɩɩ yem.
2Ɩsɩɩ ɩ́ tɛmɑ nyǝm tɔ pɑ tɛmɑ-tʋɣʋ nyɑŋ lɑpʋ nɑ kʋtʋɣʋ kɛ Filipʋ kɛ́ nɑ pǝ́cɔ́ tǝ́ tɑkɩ mǝ tɛ Tɛsɑlonikɩ. Amɑ Ɩsɔ hɑ-tʋɣʋ ɑpɑlʋtʋ sɩ tǝ́ heeli-mɛɣɛ ɩ Lɑɑpɑɑlɩ Kʋpɑŋ, pɑɑ kɑɣɑtʋɣʋ tɔɔ ɩsǝnɑ.
3Pǝ tǝnɑ mpi tǝ sɛɣɛsǝɣɩ yǝlɑɑ sɩ pɑ́ lɑ tɔ pǝntʋɣʋ fɛɩ pǝ tɑɑ yɑɑ hʋwɛɛ ɑsɑɣɛɛ nɑɑlɩ, nɑ tɩɩ pɛɛkǝɣɩ sɩ tǝ́ puɣusi nɔɣɔlʋ.
4Amɑ tǝ yɔɣɔtǝɣɩ pǝ tǝnɑɣɑ teitei kɛ́ ɩsɩɩ Ɩsɔ cɑɑkɩ tɔ, pǝ tɑɣɑ pʋlʋ tɔɔ, Ɩsɔ ɩnɩ ɩ sɑmɑ-tʋ nɑ ɩ́ cɛlɑ-tʋɣʋ ɩ Lɑɑpɑɑlɩ Kʋpɑŋ sɩ tǝ́ heeli. Ɩlɛ pǝ tɑɣɑ yǝlɑɑ lɑŋhɛɛlɛ kɛ tǝ́ pɛɛkǝɣɩ nɑ tǝ́ lɑkɩ mpʋ. Amɑ Ɩsɔ wei ɩ wiiliɣi tɑ́ lotunɑɑ tɑɑ nɑ ɩ́ nɑɑ tɑ́ tɑɑ hʋwɛɛ tɔ ɩ lɑŋhɛɛlɛ kɛ tǝ pɛɛkǝɣɩ.
5Mǝ mɑɣɑmɑɣɑ ɩ́ nyǝmɑ́ teu sɩ tǝ tɑ mɑ-mɛɣɛ nɔɣɔ tɑɑ kɛ́ tiiliɣi pɑɑ pǝcɔ mɑɣɑmɑɣɑ, nɑ tǝ tɑ lɑ liɣitee kɔtɔɩ kɛ tiili nɑ tǝ́ puɣusi-mɛ. Nɑ Ɩsɔ mɑɣɑmɑɣɑ nɑ́ nɑ́ pǝ tǝnɑɣɑ mpʋ.
6Tǝ tɑ pɛɛkɩ yǝlɑɑ ɩsɑntɛ, pɑɑ mǝ mɑɣɑmɑɣɑ mǝ kiŋ yɑɑ nɔɣɔlʋ ɩ kiŋ.
7Pǝcɔ tǝ kɛʋ Kilisiti tillɑɑ ɩsǝntɔ tɔ, ye tɩɩ nɔkɑɑ tɩɩ ŋmɑkǝlɑ-mɛ nɑ ɩ́ lɑ́ ɩsǝnɑ tǝ cɑɑ tɔ. Amɑ tǝ cɑɣɑ mǝ hɛkʋ nɑ suulu nɑ tǝ́ lɑkɩ-mɛ tǝpɑmm ɩsɩɩ ɑsɔnʋɣʋ lɑkʋɣʋ kʋ pǝyɑɣɑ tɔ.
8Tǝ sɔɔlɑ-mɛɣɛ kɑtɑtǝlɑɣɑ kɛ́, hɑlǝnɑ tǝ tɛm-mɛɣɛ Lɑɑpɑɑlɩ Kʋpɑŋ kɛ heeluɣu tɔ, ye pɑɑ tɔmɑ sɩ tǝ́ lǝsɩ tɑ́ weesiŋ mɑɣɑmɑɣɑ nɑ tǝ́ tʋ-mɛ, tɩɩ lǝsɑɑ. Pɔpɔtʋ fɛɩ, tɑ́ luuŋ sʋʋ-mɛɣɛ teu kɛ́.
9Tɑ́ tɑɑpɑlɑɑ, ntɔŋ ɩ́ tɔɔsɑ ɩsǝnɑ tǝ lɑpɑ tǝmɑ nɑ tǝ́ konti hɑŋɑɣɑ tɔ? Ɩsǝnɑ tǝ lɑpɑ tǝmlɛ nɑ ɩsǝlɛ kʋsɛɛmlɛ kɛ teu sɩ tǝ́ tɑɑ sʋkɩ mǝ tɑɑ nɔɣɔlʋɣʋ sǝɣǝlɑ kɛ sɑɑ wei tɩɩ wɛ mǝ hɛkʋ nɑ tǝ heeliɣi-mɛɣɛ Ɩsɔ Lɑɑpɑɑlɩ Kʋpɑŋ tɔ.
10Ɩ́ pǝsǝɣɩ nɑ ɩ́ lǝsɩ tɑ́ nyɩɩlʋɣʋ kɛ ɩsǝnɑ tɑ́ tɔntɛ tewɑ Ɩsɔ sɛɛlɑɑ mɛ mǝ kiŋ, nɑ tǝ́ kɛɛsɑɑ nɑ tǝ́ tɑ́ liɣiti tiili tɔ, Ɩsɔ mɑɣɑmɑɣɑ nɑ́ nɑ́ mpʋ tɔtɔ.
11Pǝ́cɔ́ ɩ nyǝmɑ́ tɔtɔɣɔ ɩsǝnɑ tǝ lɑpɑ pɑɑ mǝ tɑɑ wei ɩsɩɩ cɛcɛ lɑkʋɣʋ ɩ pǝyɑɣɑ tɔ.
12Tǝ lɑpɑ nɑ ɩ́ tɔkɩ tɔnǝŋ kɛ teu nɑ tǝ sɔɔsɑ-mɛɣɛ ɑpɑlʋtʋ, nɑ tǝ́ sɛɛsɩ-mɛ nɑ ɩsǝlɛ sɩ ɩ́ tɔ nɑ pǝ́ kɛɛsǝnɑ teitei ɩsɩɩ Ɩsɔ cɑɑkɩ tɔ. Ɩsɔ ɩnɩ ɩ yɑɑnɑ-mɛ sɩ ɩ́ hiki mǝ pɑɑ tete kɛ ɩ kɑwulɑɣɑ nɑ ɩ teeli tɑɑ.
13Tǝ sɛɛkɩ Ɩsɔ sɩ ɩ́ nɑ tǝmlɛ kɛ tɑm tɔtɔ. Pǝ tɑɣɑ pʋlʋ tɔɔ, wɑɑtʋ wei tǝ heelɑ-mɛɣɛ Ɩsɔ Tɔm tɔ ɩ́ tɑ́ mʋ-tɩ ɩsɩɩ yǝlɑɑ nyǝntʋ. Amɑ ɩ́ nɩɩwɑ tɔ ɩ́ mʋwɑɣɑ sɩ tǝ kɛ́ Ɩsɔ Tɔm, nɑ tɑmpɑnɑ tǝ mɑɣɑmɑɣɑ kɛ́. Ntɩ ɩnɩ tǝ lɑkǝnɑ tǝmlɛ kɛ Ɩsɔ sɛɛlɑɑ mɛ mǝ tɑɑnɑɑ.
14Tɑ́ tɑɑpɑlɑɑ-mɛ, mpi pǝ lɑpɑ Kilisiti nyǝ́mɑ hɛkʋ kɛ Ɩsɔ sɛɛlɑɑ kpekɑ wenɑ ɑ wɛ Yutɑ tɔ ɑ tɑɑ tɔ, pǝ ɑkpele lɑpǝnɑ ntɛɣɛ mǝ kiŋ tɔtɔ. Nɑɑsʋɣʋ mpi Yutɑ nyǝ́mɑ nɑɑsɑ pɛlɛɣɛ tǝnɑ tɔ pǝ tɑkɑ kɛ́ mǝ ɩcɑtɛ nyǝ́mɑ nɑ́ nɑɑsɑ-mɛ tɔtɔ.
15Yutɑ nyǝ́mɑ mpɛ pɑ kʋnɑ Tɑcɑɑ Yesu, nɑ mpɛ ɩnɩ pɑ kʋnɑ Ɩsɔ kʋyɔɣɔtʋtʋ tɛlǝsǝlɑɑ. Kʋlʋmɑɑ mpɛ ɩnɩ pɑ nɑɑsǝnɑ-tʋ tɔtɔ. Pɑ fɛɩ Ɩsɔ kɛ́ teu, nɑ pɑ kɛ́ yǝlɑɑ tǝnɑ kolontunɑɑ.
16Pɑɑ yeki sɩ tǝ sɛɣɛsɩ mpɑ pɑ tɑ kɛ Yutɑ nyǝ́mɑ tɔ nɑ pǝ́ yɑ pɛlɛ pɑ nyɔɔŋ. Ɩsɑɣɑtʋnɑɑ mpɑ tuu lɔŋ pɑɑ lɑpɑ tɔ mpɛ pɑ tɔɔ kɛ́ pɑ tɔŋnɑ lɛntǝnɑɑ kɛ kɑɑʋ nɑ pǝ́ kpɑɑ huɣule. Amɑ pǝnɛntɛɣɛlɛ Ɩsɔ tɛmɑ pɑ tɔm.
17Tɑ́ tɑɑpɑlɑɑ-mɛ, tuu ɩsɩɩ tǝ yeluɣu tǝmɑɣɑ wɛɛ nɑɑlɛɣɛ mpʋ tɔ, tǝ nyɩɩlɑ sɔsɔm sɩ tǝ́ nɑ-mɛ, hɑlǝnɑ pɩɩ tɩɩ lɑkɩ-tʋɣʋ lɔŋ. Amɑ pɑɑ tɩɩ nɑɑ tǝmɑɣɑ mpʋ tɔ tɑ́ lɑɑkɑlǝnɑɑ wɛ tǝmɑ kiŋ kɛ́.
18Tǝ nyɩɩlɑ teu sɩ tǝ́ mǝlɩ mǝ kiŋ, hɑlǝnɑ Pɔɔlɩ mɑ́, tɔm pɑɣɑlɛ kɛ mɑ tʋ mǝ tɛ pote pǝlɛ nɑ Sɑtɑnɩ tɑ́ tisi sɩ tǝ́ hiki mpɑɑʋ.
19Mǝ tike tǝkoŋ kɛ́ tǝ tɛɛlǝɣɩ nɑ tǝ́ hʋlǝsǝɣǝnɑ lɑŋɑ, nɑ mɛɣɛ tɩɩ mʋɣʋlǝnɑ Tɑcɑɑ Yesu kɔntɛ wule kɛ ɩ ɩsɛntɑɑ sɩ tǝ yoowɑ yoou nɑ tǝ́ lɑ́ ɑkɑnɑɑ.
20Nn, mɛɣɛ tɩɩ yɔɔlǝnɑ, nɑ mɛɣɛ tɩɩ hʋlǝsǝnɑ lɑŋɑ mɛɛ.
