1Tumen korkore džanen, phralale, hoj amen na avľam ke tumende hijaba.
2Se džanen, hoj angloda but precerpinďam andro Filipi a hoj amen ande avri pre ladž. Ale the avke arakhľam e zor andro Del te vakerel tumenge o evaňjelium le Devleskero bi e dar, choc but manuša džanas pre amende.
3Bo oda, so amen tumenge vakerahas, na sas, hoj varekaha te thovas avri, a na sas aňi le klamišagoha, aňi le nažuže jilenca,
4ale vašoda, hoj amen o Del dikhľa sar hodnen, diňa amenge o evaňjelium a avke les vakeras – na avke, hoj te avas pre dzeka le manušenge, ale le Devleske, savo probaľinel (skušinel) amare jile.
5Se tumen džanen, hoj šoha (ňikda) tumenge na vakerahas gule lava, aňi na samas izdrade pal tumare love andre amare jile – o Del hino amaro švedkos.
6Aňi na rodahas e slava le manušendar – aňi tumendar, aňi ňikastar avrestar.
7Bo sar o apoštola le Kristoskere šaj tumendar užarďamas, hoj pes pal amende te starinen. No amen avke na kerďam, ale samas ke tumende kamibnaskere sar e daj, savi pes starinel pal peskere čhave.
8Avke tumen kamahas, hoj anahas tumenge na ča o evaňjelium, ale dahas the peskere dživipena, bo igen peske tumen zakamľam.
9Se leperen peske, phralale, pre amari phari buči. Rat-džives kerahas, hoj te na avas tumenge pre meň, medik tumenge vakerahas o evaňjelium le Devleskero.
10Tumen the o Del san o švedki, sar pes ľikerahas sentne, čačipnaskere the žuže ke tumende, save pačan.
11Tumen džanen mištes, hoj dojekheha tumendar kerahas avke, sar o dad kerel peskere čhaha:
12Zoraľarahas tumen a priphenahas a dovakerahas tumenge, hoj te dživen lačho dživipen, so hin pre dzeka le Devleske, savo tumen vičinel andre peskero kraľišagos the slava.
13Vašoda na preačhas te paľikerel le Devleske, hoj na priiľan sar o lav le manušeskero, oda lav, so šunďan amendar, ale sar le Devleskero lav. Bo ajso čačes hin oda lav, so kerel andre tumende, save pačan.
14Se tumen, phralale, ačhiľan ajse sar le Devleskere zbori andro Ježiš Kristus andre Judsko. Bo avke, sar on cerpinenas le Židendar, the tumen cerpinenas le manušendar tumare narodendar.
15Ola Židi murdarde amare Rajes le Ježiš the peskere proroken a džanas the pre amende. On nane le Devleske pre dzeka a hine ňeprijaťeľa savore manušenge.
16Na domuken amenge te vakerel le Nažidenge, hoj te aven zachraňimen, a oleha mek furt buter dothoven ke peskere bini. Ale e choľi le Devleskeri imar avľa pre lende.
17Phralale, choc amen geľam het tumendar pro sikra, na geľam het le jileha. Igen tumen kamahas te dikhel a kerahas sa prekal oda, hoj tumen te dikhas.
18A kamahas te avel ke tumende – me, o Pavol, buterval kamavas – ale o satan amenge na domukľa.
19Bo ko hin amaro užaripen (naďej), amaro radišagos, vaj amari baripnaskeri koruna? Či na san oda tumen angle amaro Raj Ježiš Kristus, sar avela?
20Tumen san amari slava the radišagos!
