1Âgofâc‐nane, ŋoŋerao fisirâ gie bapene fârimâc mi ewec i ŋaŋac manaŋgopieŋ.
2Qanaŋ Filipi haeo qa imac enârembiŋ i manaŋgopieŋ wâc. Enârepie sifu mi dockembeŋ. Aricne, Anuturao roweckepene bubiaŋ qanâreme afeckerâ ŋoŋerao fârâ Anuture Biŋebiaŋ i juju gie sâko bahuc mufua‐ŋarembeŋ.
3Babaafec dâŋ mueŋgopeneŋ i mamana sifuc faio mâcne, me maŋsifuc faio mâcne, me kege wage eŋarehuc mâcne;
4Anutuzi honec‐nâpome sâckeme Biŋebiaŋ muromackenaŋte betoŋ‐nâpowec irec sâc mueŋgopeneŋ. Ŋiczi mana‐nârepie biaŋkeocte aricne, Anutu e maŋ hohonezi mana‐nâreme biaŋkeocte mocjaha mueŋgopeneŋ.
5Ŋoŋe nâŋere manaeŋgopieŋ, nâŋe bâbâmiriŋ dâŋ moc mi ŋazambeŋ â mitio ake hehuc moneŋ mafare andac i wâc mi embeŋ, i Anutuzi manaha mukopac.
6Kristore aposolo nâŋe mana‐nârepie feme sâckeocmu i manahuc sifu ŋoŋe me hae gâcnaonec ŋicbomboŋ eŋarenaŋte mi mumbeŋ.
7Aricne, neŋgoc moczi kogocfâcne hemiriŋ‐jopaekac, iŋuc jaha nâŋe ŋoŋerao juhuc eŋarembeŋ.
8Aŋac‐nâŋec ŋoŋerao fowecte Anuture Biŋebiaŋ ŋaŋazare sawa mâcne, ŋoŋere erâ juju‐nâŋec qiqikiŋ irec mâmâc afeckembeŋ, maŋnâŋec ŋoŋerao âeckewec irec.
9Âgofâc, micneneŋ eŋarepene takic‐ŋopazacte ŋafe furec sahacte gie mâmâc ʒocne fârone bahuc domambeŋ, i ehuc Anuture Biŋebiaŋ ŋazambeŋ, ŋoŋe irec manasueŋgopieŋ.
10Nâŋe maŋtaniŋ â tiŋne â bahacmâc juhuc miti mamana ŋoŋe wiac eŋarembeŋ, i ŋoŋe mecne â Anutu mecne fuŋne‐nâŋec manaŋgopieŋ.
11Erâ moc ʒiŋuc wâc manaŋgopieŋ: Mamac moczi naru motecfâcne ejareekac, sâc ijaha nâŋe ŋoŋe eŋarehuc buc buc mu sawaŋ dâŋ ŋazambeŋ â esoc qafeŋ eŋarembeŋ â ʒiŋuc muʒakiehuc ŋazambeŋ:
12“Uucmaŋ‐ticne â eri tatamac‐ticne rauckeniŋte hefârec‐ŋopaekac Anutu hâcne, ere ŋicfâc fârine erâ irec sâcko junʒepieŋ.”
13Nâŋe Anuture dâŋ ŋazapene manapie ŋicdâŋ mi ewec. Eme iŋuc sâcne manambiŋ, i Anuture dâŋ jâmbâŋ, eki miti mamana ŋoŋerao gie baekac. Eme nâŋe irec hâcne Anutu daŋge mumuteŋ kuduc jaha ecnehuc jueŋgopeneŋ.
14Âgofâc‐nane, ŋoŋe Anuture kikefuŋ Judaia mâreŋko Kristo Jesurao qohotambiŋ jaŋehec sâc mocjaha embiŋ. Jaŋe Judaŋiczi jopa qâʒâic ejarembiŋ iŋuc jaha âgofâc‐ŋeŋic gâcnezi ŋoŋe ŋopa qâʒâic eŋarembiŋ.
15Judaŋic jaŋe Wofuŋ Jesu â porofete iŋuc jaha qâhâmoc‐jopambiŋ, erâ wâc nâŋe nâpo jâpec enârembiŋ. Jaŋe Anutu âgo mi ecneeŋgopieŋ â ŋicne ŋicne kisuec‐jopaeŋgopieŋ.
16Ehuc qâpuc miti jazapene manarâ biaŋkenʒipiŋte aka henâreeŋgopieŋ. Jaŋe iŋuczi iŋuc ehuc sâqocne faio fefec hefekupie kiŋjeŋicte sâc micne qame Anuture kimbeŋ fisi‐jarewec.
17Âgofâc, nâŋe behec‐ŋopambeŋ, erâ maŋzi mâcne, sahaczi dameŋ ŋondeŋ ʒi ŋoŋe tâmiric juhuc huacbuc eŋgopeneŋte mocwâc honec‐ŋopanaŋte boc enâreekac.
18Eme irec fârâ iqic‐ŋopanaŋte mumbeŋ, Paulo no nahac dameŋ moc â moc fâzo mupe Sataŋzi aka henarewec.
19Ŋoŋere aŋac‐nâpoekac i ʒiŋucte: Wofuŋ‐nâŋec Jesu ere fifisi dameŋko weni jaŋe gie fâri‐nâŋec â ʒeri‐nâŋec â eri‐nâŋec eniŋmu? Ŋoŋe wâc enâreniŋmu hâcne.
20Ŋoŋe mumuteŋ‐nâŋec â bubiaŋ‐nâŋec.
