Text copied!
CopyCompare
GALA Sɛʋɛi - Tɛnɛ Faalaaliiti

Tɛnɛ Faalaaliiti 28

Help us?
Click on verse(s) to share them!
1Faa ɲɔu ɠɛ nui ɠa ɗa ɓizɛ, anɛɛ ni nu la kpɛɛzu, kitogi ɠa telebo nuiti zea, eɠɛ zala ɓokpagi.
2Siɛgi zu kpakagi la zooi zu, kundiɠila ɠaiziɛ nuiti ta ɗa mɔin. Kɛlɛ kundiɠii a zeina, keleɠelegai é ɠala, faiti ta ɗa ziɛ ga pagɔ.
3Zunui é ga bala nui, é maawɔin nuiti maanɔɠɔzu, toɠa ga faa zuɠoloɠolo tonai, é pului loozu.
4Niiti ti ɠɛlɛzu GALA ná-tɔgi ʋa, naati ta ɗa faa ɲɔu ɠɛ nuiti maamusɛ, kɛlɛ niiti ti ɠolozu tɔgi ʋɛ, naati ta ɗa laalɛ ti wu.
5Niiti ti ɓɔɠɔ veezu faa ɲɔi ya, naati ti la sɔle fai tanɔpɛ gaaɠaazu, kɛlɛ niiti ti ɓɔɠɔ ɠilizu Ɠɔoɠɔ ƓALAGI ʋa, naati ta ɗa faiti pɛ gaaɠa.
6Fizɔgɛ nu ɠɛ ga bala nui, è ɗa ziɛ sɔledai zu, è ʋa li ɠɛɛzu ga kpɛtɛ nui, nii siɛ ʋelei ga wooveledai.
7Zɔi é ɠolozu GALA ná-tɔgi ʋɛ, doun zunu ɠana keleɠelegai, kɛlɛ zɔi é ʋilɛsu tuʋa ʋele ɲɔu nuiti polu, naa ɠa ɗa ʋa ga unfegi kɛɛɠɛ ʋɔ.
8Zɔi é ná-sɔlɔɔgi maamɔinzu ga talama walii, nii dateʋegai, naa ɠa sɔlɔɔgi ɠaalɛɛzu ba naa ʋɛ, nii a maawɔin nuiti maawɔinɠa.
9Ni nu a ʋoluavena, ga é mina woilo GALA ná-tɔ gooi ma, ná-GALA falii wɔin ɠa zeɠe GALA ma.
10Zɔi é telebo nuiti kakasu, é ti ʋilɛ pele ɲɔi ma, toɠa loo zeɠei zu, nii é bɔai. Kɛlɛ niiti ti ziɛzu ga sɔledai, undaanɛɛi ɠa naati tuɠɔ.
11Kpɛtɛ nui ɠeleɠelegɛ ɓɔɠɔ nɔ ɠaazu, kɛlɛ bala nui keleɠelegai, naa ɠa zoo é poluɠula.
12Siɛgi zu telebo nuiti ti kundiɠilai zɔlɔɔsu da, lɛbiya ɠa ɗa ɠɛ lee ɛsɛ pɛ bɛ. Kɛlɛ siɛgi zu nu ɲɔiti ti wuzeɠezu la, ɛsɛ ka ɗa lɔɔɠu.
13Zɔi é ná-tɔ koloɠologiti dɔɔɠuzu, naa la ɠula ɓɔɠɔ numa, kɛlɛ GALA ka ɗa naa zuvaayɛ, zɔi é laazu zɔ ga é ɠɛlɛ ti ʋa.
14Undaanɛɛ nu ɠa ga naama nui, nii yeenɔpɛ é luazu faa ɲɔi ɠɛɛ vai ʋa, kɛlɛ zɔi é ɠikpaazu, é ɗa faa ɲɔi ɠɛ, naa ɠa lɔ maanɔɠɔi zu.
15Ʋelei zalai la, é zikɔzu, ta filɛ zuai pului ma, ʋele ɠana faa ɲɔu ɠɛ nui la, nii é masadai ɠɛɛzu nuɓusɛiti unda, ti ʋalagai.
16Kundiɠii a ʋalana ɠigi ma, toɠa ɗa telebotalai wola ɠɛ, kɛlɛ zɔi é ɠɛlɛzu kakama ani mii vai ʋa, toɠa ɗa lɛbi kundiɠilai zu.
17Nui nii nu ʋaa vai ziimaʋɛ, toɠa ɗa ɓizɛ ga lia ná-kabayeɠei ʋɔ pelei, nu nɔpɛ ge mina pele ɓesa tuɠɔ.
18Nu-o-nu nii siɛ ʋelei zɔlegai, naa ɠa kizogi zɔlɔɔ, kɛlɛ sɔletala nui, é pele zuɓili felegɔi ziɛzu, toɠa loo gila su.

19Zɔi a tii ɠɛɛzu ná-zooi ma, naa ɠa laamianigi zɔlɔɔ, kɛlɛ zɔi é ʋilɛsu fuun faiti polu, naa ɠɔnɔgi ɠa ɠɛ ga daanɔɠɔwogi.
20Nui é ga lada nui, zee laa ɠa ve ga tuyai, kɛlɛ zɔi é wɔinni é ɓɛtɛ ga gaazuvilɛi, maanɔɠɔi la ʋoola ba.
21É la vizɔni ga nu zeelɔzɔɠɔzui ɠɛ nuɓusɛiti zɔɠɔzu, anɛɛ naa ʋe, nui ɠa zoosu é faa ɲɔi ɠɛ ɓulu ɓuɠai zɔlɔɔ fai zu.
22Zunui é ga gaazuɠulapɔ nui, toɠa ɗa kpɛtɛi ɠaiziɛ ga gaazuvilɛi, toɠa ɗa yeema ga baladai ɠa ʋaazu pɔ.
23Zɔi é zelii losu seiɲɔɠɔi ma, gaaɓelasu naa ɠa ɗa ná-faanɛɛi wuuɠwɛɛ, é leʋe zɔi ʋa é maamusɛi wosu ga nɛgi.
24Nu-o-nu é kaazu ga faa ɲɔu laade, ga é kɛɛɠɛ ta dee maavo, é la vizɔni toosu nu ʋa.
25Zunui nii sɔlɔɔgi la ziilɛiɗa, toɠa ɗa kpɔɛi wuzeɠe, kɛlɛ zɔi é ɓɔɠɔ ɠalivaazu Ɠɔoɠɔ GALAGI ma, toɠa ɠɛ anii pɛ su nɔ yaɠaba.
26Ɗɛi è laazu ɗa-ɠigaiziɛiti nɔ la, ɗa ga ɠimalala nu, kɛlɛ zɔi é ziɛzu ga ɠimalai, faaɓaagiti ta ʋoola ba.
27Zɔi é faanɛɛi ɠɛɛzu bala nuiti bɛ, é la yɛga kpala zu, kɛlɛ zɔi é ɠaazuʋɛɛzu ma, seiɲɔɠɔi ná-kpɔlɔi luɠɔ, toɠa foovoo mɔinmɔin sɔlɔɔ.
28Siɛgi zu faa ɲɔu ɠɛ nuiti ti zeizu la kundiɠilai zu, ɛsɛ pɛ ka ɗa lɔɔɠu, kɛlɛ siɛgi zu ti loozu bu la, telebo nui ma mɔinmɔin ka ɗa ɠula kɛlɛma.