Tɛnɛ Faalaaliiti 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Zɔi nɛai bɛ ga maaɠolo, faaɠwɛgi wɔin ɠa naa ma, kɛlɛ zɔi zelilomai ɠaawanazu la, naa la ɠeleɠeleni.

²Nu ʋagɔi ɠa ɗa Ɠɔoɠɔ GALAGI ná-undaanɛɛi zɔlɔɔ, kɛlɛ Ɠɔoɠɔ GALAGI ɠa ɗa naama nui ʋeelala, nii é kisiɛ ɲɔiti bosu.

³Suɲɔu vai la ɗa ga nui losu ɓɛtɛa, kɛlɛ zɔi sɔlegai naa lɔɔ la ɠulaa.

⁴Ziilɔɔ anzanui ɠa ɗa sinigi nɔungi wuzeɠe, kɛlɛ anzanui é unfetala vai ɠɛɛzu, toɠa sinigi ʋa ga kae wana zeeɓɛi.

⁵Telebo nuiti ta-ɠisiɛiti ta faa zɔle faiti nɔ ʋa, kɛlɛ faa ɲɔu ɠɛ nuiti siɛ ʋelei ɠa nɔ ga yaavai.

⁶Faa ɲɔu ɠɛ nuiti daawooiti ta ga baliiti ti nui ʋaazu, kɛlɛ telebo nuiti daawooiti ta ɗa ti ɠizo.

⁷Faa ɲɔu ɠɛ nuiti ta lokana, ti la mɔ ɠɛa ná! Kɛlɛ telebo nuiti ta-ʋɛlɛi ɠa yɛ loni kpaan.

⁸Nui ɠa ɗa maamusɛi zɔlɔɔ, é zoloo ná-kisiɛ ʋagɔiti ma, kɛlɛ zɔi kigi la zɔleni, naa wɔin ɠa zeɠe.

⁹Fizɔgɛ nu ɠɛ ga nui zobo ge la bɛ, botiɠɛ nu ɠila nɔ ɠɛ è ya, è ʋa ɠɛ ga nui tɔɠɔi ɠulaai, kɛlɛ é ʋalasu kɔnɔgi ma.

¹⁰Telebo nui ɠa ɗa ɠaaɓa ná-toganiiti ma, kɛlɛ faa ɲɔu ɠɛ nuiti koozu vai ɠa ga gaazumaavɔi nɔ.

¹¹Zɔi é ná-tii ɠɛɛzu, naa ɠa daamianigi zɔlɔɔ ga bɔɔlɔa, kɛlɛ zɔi é ʋilɛsu gaaʋalaba vaiti polu, naa ʋalagɛ ɠigi ma.

¹²Nu ɲɔi ɠaazu ɠa ɗa ɠula faa ɲɔu ɠɛ nuiti daamiizuʋɛ ʋa, kɛlɛ telebo nuiti ma zapei ɠa a ɗa gwaa wo.

¹³Faa ɲɔu ɠɛ nui ɠa ɗa ɠɔ ga tɔ ɓɔɠɔi ná-zɛɛiti ma ʋalii, kɛlɛ sɔle nui ɠa ɗa ɠula faaɓaagiti kpein su.

¹⁴Nui laawooi ʋɔ, toɠa zoo é undaanɛɛ wola ɠaalɛ ba, eɠɛʋelei nu a ɗa ná-botii ma zalai zɔlɔɔ da.

¹⁵Ɠimalala nui ná-pelei zɔlegɛ tɔ ɓɔɠɔi ɠaazu, kɛlɛ ɠima nui ɠa ɗa woilo zɔiti tɛnɛ gooi ma.

¹⁶Ɠimalala nui ɠa ɗa ná-ziiɠaawanai ɠula kɛlɛma gaamago nɔ, kɛlɛ ɠima nui ɠa ɗa ná-daazuɠɔli vaiti buuɓɔle.

¹⁷Nui é gaamai ɠulazu kɛlɛma, naa ɠa telebo fai lɛɛzu, kɛlɛ zɛɛ zeelei ɠa ɗa yaavai ɠɛ.

¹⁸Kpɔɛzuɠula ɲakaiti ta ɗa maawanai wo eɠɛ boɠa zɔkpɔi, kɛlɛ ɠima nuiti daawooi ɠa ɗa ʋa ga kɛdɛyai.

¹⁹Gaama nui ɠa yɛ ná ɠɔ, kɛlɛ zɔi é zɛɛi wosu, naa la lɛbiga.

²⁰Niiti ti faa ɲɔiti kpɛtɛzu, naati ziimaʋɛti daavegɛ ga yaava vaiti, niiti ti nuiti tɛnɛsu ga faa ʋagɔi, naati ta ɗa koozunɛɛi zɔlɔɔ naa zu.

²¹Maanɔɠɔ nɔpɛ ge la zeelia telebo nui ma, kɛlɛ kpɔlɔi ɠa ɗa ɠɛ faa ɲɔu ɠɛ nuiti unma.

²²Ɠɔoɠɔ GALAGI la wɔinni ga zɛɛ wo nuiti, kɛlɛ toɠa gaama wo nuiti polu.

²³Ɠima nui la ɗa ga ná-faaɠwɛgi zulɛa, kɛlɛ ɠimalala nui ɠa ɗa zeze ga ná-faaɠaaɠaalalai.

²⁴Niiti ti botii ɠɛɛzu gola, naati ta ɗa lo faa wolaiti untuɠɔ, kɛlɛ ɲaka nuiti ta ɗa lɔ duɔlai zu.

²⁵Ziizoolɛi a ɠɛna nui yiimaʋɛ, toɠa ɗa vɔ, kɛlɛ iɲɔdɔɔ ɓɔɛi ɠa ɗa nui ɠoozunɛ.

²⁶Telebo nui ɠa ɗa ɠɛ ga ʋelela ʋagɔ bɔɔlaiti bɛ, kɛlɛ faa ɲɔu ɠɛ nuiti siɛ ʋelei ɠa ɗa ti ɠaka.

²⁷Sua ɓɛ nui nii dɔɔʋɛai, naa la sua zɔlɔɔga, é ʋa gee. Faa ʋagɔi, nii pagai ti pɛ ba nuɓusɛi ná-faa zu, naa ɠa ga é ɠɛ ga botiɠɛ nu.

²⁸Ʋɛ telebodai ɠɛɛzu ná, miná ɠa zɛnvui ná, naama ʋelei ɠa nu ɠizosu saai ma.