San Lucas 1:55-75

⁵⁵(Taemano y jasangane y mañaenata), as Abraham yan y semiyaña para todo y tiempo.

⁵⁶Si Maria sumaga yan güiya calang tres meses ya despues jumanao asto iyasija.

⁵⁷Ya si Elisabet jacumple y tiempo nae para ufañago; ya mañago un patgon laje.

⁵⁸Ya anae majungog ni tiguangña yan y parientesña, na si Yuus janadangculo y minaaseña guiya güiya; ya manmagof yan güiya.

⁵⁹Ya susede na y mina ocho na jaane manmato para umasircunsida y patgon: ya malagoñija umafanaan ni y naan tataña as Sacharias.

⁶⁰Ya manope y nanaña ya ilegña: Aje, sa umafanaan si Juan.

⁶¹Ya ilegñija nu güiya: Taya gui manparientesmo mafanaan nu este na naan.

⁶²Ya maseñat y tataña, ya mafaesen jafa malagoña umafanaan.

⁶³Ya mangagao un diquique na tabla ya jatugue ilegña: Si Juan naanña. Ya todo sija ninafanmanman.

⁶⁴Ya enseguidas mababa y pachotña, ya mapula y jilaña, ya cumuentos, jabendise si Yuus.

⁶⁵Ya guaja minaañao gui jiloñija todo y mañasaga gui oriyañija: ya gui todo y tano taquilo guiya Judea, masasangan este sija na sinangan.

⁶⁶Ya todosija y jumujungog jaadaje gui corasonñija ya ilegñija: Jafa jumuyong este na patgon? Sa y canae Yuus gaegue guiya güiya.

⁶⁷Ya si Sacharias, tataña, bula Espiritu Santo ya japrofetisa, ilegña:

⁶⁸Bendito y Señot, y Yuus y Israel; sa jabisita ya jafatinas y redension, para taotaoña,

⁶⁹Ya janacajulo para jita un canggelon y satbasion, gui guima y tentagoña as David,

⁷⁰(Taegüijija na jasasangan gui pachot y mañantos na profetaña, ni esta gaegue guinin tutujonña y tano),

⁷¹Satbasion gui y enemiguta yan gui canae todo y chumatliijit;

⁷²Para umafanue y minaaseña gui mañaenata, ya umajaso y santos na tratoña;

⁷³Y juramento ni manjula as Abraham ni tatata,

⁷⁴Na güiya unaejit linibreta gui canae y enemiguta ya utasetbe güe sin minaañao,

⁷⁵Y sinantos yan y tinunas gui menaña todo y jaanita.