Louk 1:55-75

⁵⁵I pa obliyé pou i édé Abrahanm épi tout désandanʼy pou tout tan, menm kon i té pwonmèt ayèl nou.”

⁵⁶Mari wèsté épi Élizabèt pou apipwé twa mwa, èk apwé sa i witounen lakay li.

⁵⁷Tan-an té wivé pou Élizabèt té akouché, èk i fè on ti gason.

⁵⁸Vwézinaj èk fanmiʼy tann ki mannyè Bondyé té bon pou li èk yo tout vini pou sélébwé épiʼy.

⁵⁹Lè ti manmay-la té ni on simenn, tout fanmi èk vwézinaj vini pou wè ti manmay-la sikonsayz. Yo té vlé kwiyé ti manmay-la Zèkaraya kon papaʼy.

⁶⁰Mé manmanʼy di, “Non, nonʼy sé kay Jan.”

⁶¹Yo diʼy kon sa, “Mé ou pa ni pyès fanmi ki ni non sala.”

⁶²Kon sa yo fè sin bay Zèkaraya pou sav ki non i té vlé bay ti manmay-la.

⁶³Zèkaraya mandé on bagay pou i sa ékwi asou èk i ékwi “Nonʼy sé Jan.” Épi tout moun té sipwi.

⁶⁴An menm mouman sala Zèkaraya té sa palé ankò, èk i koumansé ka glowifyé Bondyé.

⁶⁵Sé vwézinaj-la té étonnen, èk nouvèl sala simen toupatou an sé mòn péyi Jouda-a.

⁶⁶Tout moun ki tann katjilé asou sa, èk yo mandé ki kalité ti manmay sa kay yé, paski yo wè Bondyé té épiʼy.

⁶⁷Lèspwi Bondyé té ka kondwi Zèkaraya, papa Jan, èk i koumansé palé sé pawòl-la Bondyé mété an bouch li. I di,

⁶⁸“Annou glowifyé Senyè-a, Bondyé Jan Izwayèl. I kay vini pou i édé sé moun li-an èk pou ba yo libèté.

⁶⁹I ka ban nou yon sovè ki ni an chay pouvwa, yonn ki sé désandan Wa David, sèvant Bondyé,

⁷⁰menm kon i pwonmèt pa bouch sé pwòfèt li-a ki té ka viv an tan lontan.

⁷¹I pwonmèt pou i sové nou hòd sé lèlmi nou-an èk anba lanmen tout sa ki hayi nou.

⁷²I di i kay édé ayèl nou èk i kay tjenn pwonmèt-la i té fè-a.

⁷³I té pwonmèt gwanpapa nou Abrahanm

⁷⁴ki i té kay délivwé nou sòti anba lanmen sé lèlmi nou-an, kon sa nou kay sa adowéʼy san pyès pèwèz

⁷⁵èk kon sa nou kay sa adowéʼy adan yon mannyè ki bon èk dwèt tout lèstan lavi nou.