SAN LUCAS 1:55-75

⁵⁵Tsaynö imayyagpis cuyapänanpämi aunirgan unay Abrahamta y paypita miragcunatapis”. Tsaynö nirmi Tayta Diosta Maria alabargan.

⁵⁶Isabel cagchö quimsa quillanö tärarcurnam wayinpana Maria cuticurgan.

⁵⁷Tsaypitanam Isabelpa quillan tincusquiptin geshyacurgan ollgu wamrata.

⁵⁸Tsayta musyaycur castancunapis y reginacungancunapis alläpam cushicuyargan Tayta Dios paypä allita ruranganta.

⁵⁹Tsaypita semänayogna wamra caycaptinnam Zacariaspa wayinman castancuna aywayargan tsay wamranta üsuncunaman señalayänanpä. Tsaychömi taytanpa jutinllata churayta munayargan.

⁶⁰Tsaynam maman nirgan: “¡Manam tsaynö jutin canmantsu! Juan catsun jutinga”.

⁶¹Isabel tsaynö niptinmi waquin runacuna niyargan: “Manam pipis cantsu castayquicunachö tsay jutiyogga” nir.

⁶²Tsaypitanam ima jutinta churayänanpäpis sëñasllapa Zacariasta tapuyargan.

⁶³Tsaynö tapuyaptinnam pay mañargan juc tacshalla tablata tsaychö gellgananpä. Nircurnam gellgargan: “Juanmi jutinga canga” nir. Zacariaspis tsurinpa jutin Juan cananta munaptinmi tsaychö caycag runacunaga espantacuywan ricaraycar quëdasquiyargan.

⁶⁴Tsaypita jinan öra Zacariaspa shimin pashtasquiptinmi Tayta Diosta alabargan.

⁶⁵Tsaycunata ricarnam tsaychö llapancunapis cushicuyargan. Tsaycuna päsangantanam pipis maypis parlayargan tsay entëru marcacunachö.

⁶⁶Tsayta wiyagcunaga yarpachacuyargan: “¡Cay wamra wiñarcur ima allirä caycunga!” nirninmi. Y runacuna parlayangannöllam tsay wamrata Tayta Dios shumag yanapargan.

⁶⁷Tsaynam Espiritu Santo parlatsiptin Zacarias nirgan:

⁶⁸“Tayta Dios alabashga catsun. Payga salvamänantsicpänam caycan.

⁶⁹Mandu ruragnin rey Davidpa castancunapita munayyog salvacogmi yuringa.

⁷⁰Tsaynö cananpämi unay profëtancunawan musyatsimargantsic.

⁷¹Tsaynöllam musyatsimargantsic chiquimagnintsiccunapita jipimänantsicpä cagta.

⁷²Abrahamta y paypita miragnincunatapis auningancunata manam gongashgatsu.

⁷³Paytam Tayta Dios aunirgan

⁷⁴chiquimagnintsiccunapa mandunpita jipimänantsicpä, Tayta Dios munangantana mana mantsariypa ruranantsicpä,

⁷⁵y cada junagpis munanganta rurarna cawanantsicpä”.