Lucas 1:55-75

⁵⁵Siya, inpailana nan seg-angna ken Abraham ya isnan wanen-edna is eng-engkhana!”

⁵⁶Nakitetee si Maria ken cha Elisabet is tolo ay fowan, sa et sinmaa.

⁵⁷Idwani, inomchan nan omanakan Elisabet, et inmanak is lalaki.

⁵⁸Issan osto'y nanngelan nan sasagkhongcha ya nan kikib-acha nan chachama ay seg-ang Apo Dios ken Elisabet, nakilal-ayad cha ken siya.

⁵⁹Issan maikawalo ay akhew nan ong-onga, naamong cha't ta masegyatan ya mangadnan siya. Kanamo ipangachancha nan Zacarias ay ngachan amana,

⁶⁰ya ket kinwanin inana en, “Ad-i! Juan nan maipangachan ken siya.”

⁶¹Kanancha't en, “Maid met paat kikib-ayo is enngachan isnan kag tosa!”

⁶²Sa cha't nenkawad ken amana ay nensalodsod mo ngag nan laychena ay maipangachan isnan ong-onga.

⁶³Ala na et ya faa is pagsolatan sa na't isolat nan kag tona: “Juan nan ngachana.” Chachama'y nataa cha am-in.

⁶⁴Faagna ya ket ay inpalosfot chadlo kasin Apo Dios nan kalin Zacarias ya chinad-ayawna si Apo Dios.

⁶⁵Natakag cha't am-in nan sasagkhongcha, sa et naog-okhod nan naycha ay cha inmat isnan am-in ay kailiili isnan nafib-ilkhana id Judea.

⁶⁶“Ngag ngen et nan enfalinan nan nay ay ong-onga?” kinwanin nan am-in ay nannge isnan naangnen. Sinmesinmekcha ay khawis nan inmat tay naammowan ay wad-ay nan kamabfalin Apo Dios ken siya.

⁶⁷Idwani, wad-ay nan Ispirito Santo ken Zacarias ay aman Juan sa na't inpadto ay mangwanin,

⁶⁸“Machad-ayaw nan Apo tako ay Dios nan Israel, tay inmali ay mamachang ay mangipalofos isnan takhona.

⁶⁹Infaana et ken chatako nan makabfalin ay omisalak ay waned nan faana ay si David.

⁷⁰Kag isnan inkalina ken chatako isnan nasantowan ay mamadtona id solit ay nangwanin,

⁷¹isalakana chatako isnan kafoso tako ya isnan kamabfalin nan am-in ay mangola ken chatako.

⁷²Kinwanina ay seg-angana nan am-a tako ya sesemkena nan nasantowan ay tolagna.

⁷³Siya sa nan insapatana ken ama tako ay Abraham,

⁷⁴ay siya nan mangisalak ken chatako isnan fomoso ta ad-i tako omeg-egyat ay manad-ayaw ken siya.

⁷⁵Ta isnan am-in ay akhew ay matatakhowan tako, et khawis ya nalenteg nan okhali tako isnan sakhangna.”