Lucas 1:55-75

⁵⁵modxa nzhé Dios lo re xey be xaa yilo, nu lo Abraham, nu lo re dii cheen Abraham.

⁵⁶Mari mlaz garli Elizabet chon mbee, zeera nya me garli me.

⁵⁷Gorna mzhin mbizh gal xinn Elizabet, zee ngol tub madbyi.

⁵⁸Re xaa nzho gax garli me nu re sawlizh me, ngwa re xaa lo me, gorna mbin re xaa lee Xaa Nabeyy ngok wen doo lo me.

⁵⁹Nu gorna nguxoob mad xon mbizh, zee mbid re xaa garli Zacari zee choog xaa tik yed cho mad kwaan nak beyy cheen re xaa Israel. Nu nzhekla re xaa kole mad Zacari kwentaxa le xuz mad.

⁶⁰Per lee xnaa mad nzhé: —Narolet mad sbaa, lee mad role Juan.

⁶¹Lee re xaa nzhé lo me: —Nik tub sawlizh lu nalet sbaa.

⁶²Zee kwaan nseyn mnabdizh xaa lo xuz mad, zee ne xomod nzhekla xaa kole xaa mad.

⁶³Nu lee xuz mad ngunaab tub lee tab zee kee xaa le mad lo tab, nu lee xaa mkee lo tab: “Juan role mad”. Nu rese xaa mdedyall.

⁶⁴Nu gorzee lee Zacari mzelo ngunii stub welt, nu mzelo xaa mbill xaa lo Dios.

⁶⁵Rese xaa nzho gax garli xaa mzheb doo, nu rese xaa nzho re yezh kwaan nzhi leen yi cheen Judea nzhedizh kwaan ngok.

⁶⁶Rese xaa mbin re kwaan ngok nabdizh lo re wechxinn: —¿Cho kwaan gak xaa ne? Sbaa mle xaa xgab nel kwaan gro doo mle Xaa Nabeyy lo madoo.

⁶⁷Lee Mbi Naban mnabeyy lextoo Zacari, xaa nak xuz madoo, zee mzaa xaa kwent kwaan nzhé Dios lo lee xaa, nu nzhé xaa:

⁶⁸¡Wen doo nak Xaa Nabeyy, Dios cheen re be, xaa Israel; mbiid xaa mdix xaa re jwalt cheen re xaa xaa!

⁶⁹Nel mxaal xaa tub xaa nzho mod koo be lo yalgut, lo re jwalt kwaan mle be kwaan yalngezh cheen xaa. Nu xaa ne nze naz lo dii cheen rey David, xaa ngok xey be, xaa ngok xmos Dios.

⁷⁰Kwaane nak kwaan nzhé re xaa mzaa kwent kwaan nzhé Dios lo lee xaa yilo, xaa nambey nak. Re xaa ne nzhé:

⁷¹“Dios nak xaa koo be lo re xaa nayii ne be, nu lo rese xaa nawent nzhak lextoo ne be”. Sal. 106:10

⁷²Luu xaa yalnlesla cheen xaa lo re xaa xaa, nu namyenlazht xaa wdizh kwaan mlaa xaa lo re xey be, xaa yilo.

⁷³Nu kwaane nak wdizh kwaan mlaa xaa lo xey be Abraham:

⁷⁴koo xaa be lo re xaa nayii ne be, zee nazhebt re be kee be zhiin lo xaa.

⁷⁵Nu tubka nzhul nu nali zo be lo xaa, rese mbizh kwaan mban be. Zee nzhé xaa lo xgann xaa: