Lukas 1:55-75

⁵⁵Amisye animari Apa urairije umaso raije ramu, yara aemeno Abraham muno apa susye miridije nto mansaija nuge nuganui.”

⁵⁶Maria nowo Elisabet rarijata embae mandei, umba makato no ama yavar.

⁵⁷Masyote ndea mamaisyo akoe Elisabet mare ntuna rai, umba mo arikainyo anya inta avaki.

⁵⁸Ama arakove wo ranaun Amisye po kovo manakoe raugaje rai, weti ude manayanambe tenambe.

⁵⁹Arikainye umaso apa masyote kaumandei, umba vatane ude tenambe indamu usambayambe ai muno wo koano sunat rave ai mamaisyo Ananyao Musa rai. Umba ware wo ajayo Zakaria apa tame veano awain.

⁶⁰Weramu Elisabet mo raura nanto mai mare, “Wenora, yara apa tame mirati Yohanes.”

⁶¹Umba vatane umawe wo raura nakananto Elisabet rai ware, “Nya arakov bakipambe re sonawamo inta apa tamo Yohanes veano inta awaino intai ramu, ti mamaisye ramu.”

⁶²Weti wo ranyijo maneme bo rai indamu wo Zakaria anajo nanto ware, “Tamo rui mirati indamu wamo veano arikainye umaso awain?”

⁶³Umba Zakaria po orame vasye inta ranajo mai, umba po ratoe rai pare, “Apa tame mirati Yohanes.” Weti vatan tenambe unantaive rave.

⁶⁴Naije kobe Amisye po Zakaria awa raneka umba payao akato ti po Amisye ararimbe.

⁶⁵Umbawe apa arakove unantaive rave ana umaso rai, muno ayao umaso ravov ti nanto no Yudea ama varodoro unate raita tenambe.

⁶⁶Vatano wo ranaune nao wo ratantona no manuga ware, “Wakoe! Arikainye uma wato pamo Amisye apa vambunine no ai! Weti noa panakoeyamo, indati beo animaibe?”

⁶⁷Arikainye umaso apa ajae Zakaria pamo Anawayo Vambunine mo vambunine raugaje ai umba po ayao Amisye nde ai raura pare:

⁶⁸“Wade wamo Israel wama Amisye ararimbe! Weye de Apa vatane wansai to, Po wansapaya ayao kakaije rai.

⁶⁹Po Vatano vambunine inta atutir indamu Po wansapaya ayao kakaije rai. Opamo Mesias, napi avaki no Daud apa susye rai,

⁷⁰maisyare muno Amisye po raurairive Apa anawae wusyine mai wemaisy.

⁷¹Wepirati po wansapaya irati wama marova mai muno vatano wo wansave tatugadi mansai tenambe.

⁷²Po muinye rarorono wama anene mai, muno teto Apa urairijo po rave mansai rai tutir.

⁷³Apa urairije umaso mamo Po raugaje wama aneno Abraham ai

⁷⁴pare Po wansapaya irati wama marova mansai, inda vemo wanjaniv nora, yara wamanapatambe Ai kai,

⁷⁵muno wansanuga ndandinit muno wama ana wandave mamaisy no Amune rai arono ta wana no mine vone so rai.