San Lucas 1:55-75

⁵⁵ijkó kemi yowejka okimilijkeh totatawah, Abraham iwa nochteh iojpa ixwiwah nochipa kintlasojtlaskia.

⁵⁶María omoka iwan Elisabet kemi eyi mestli, iwa satepa omókopki icha.

⁵⁷Satepa oajsiko n tonati, ijkuak Elisabet okípixki ikone.

⁵⁸Iwa ijkuak non ik ompa ochanchiwaya iwa non ken kita n Elisabet okimatkeh Toteko Dios satlawel okiknoma, okitlajpalotoh iwa opakeh íwa.

⁵⁹Ijkuak owalchikometik okisirkunsidarotoh n konetl, iwa okinekiah kitlaliliskeh itoka Zacarías, kemi ita.

⁶⁰Pero imamá okijto: —¡Amó, tiktlaliliskeh itoka Juan!

⁶¹Non ompa okatkah okilijkeh: —¿Tleka ijkó tikneki tiknotsas? nochteh non ken tikinmita, amaka ijkó itoka.

⁶²Ijkuakó, okimanotskeh n Zacarías iwa okitlajtlanijkeh kenijki okinekia kitlalilis itoka n konetl.

⁶³Pero Zacarías okimatlájtlanki makimakakah itla tlan ipa tlajkuilos, iwa ijkí okijkuilo: “Juan yetos itoka.” Iwa san okintlajtlachialti.

⁶⁴Non ora Zacarías owaltlajto, iwa opé kiweyijkachiwa Dios.

⁶⁵Iwa nochteh non ik ompa ochantitokah omaujkeh, iwa non ochantitokah itech tepeyo de Judea, omotlapowiayah de nochi tlan otlamochi.

⁶⁶Iwa nochteh non okikakiah, okimoliayah: —¿Tlan kichiwas non chokotsi keman motlamiti tlakatl? Porke okajsikamatiah n Toteko okatka íwa.

⁶⁷Zacarías, ipapá n chokotsi otenki de Espíritu Santo iwa ijkí okijto:

⁶⁸Maweyijkachito n Toteko Dios de Israel, porke okinmakixtiko ialtepeikniwah.

⁶⁹Ye otechaltitlanili se chikaktik temakixti, se non iwejkaixwi n Rey David itékitki n Totajtsi Dios.

⁷⁰Ijkó kemi Dios yokijtojka ya wejkawitl ijkuak iprofetajwah yolchipawakeh otechmatiltijkeh:

⁷¹Ye techpalewiskia inmak akimeh techkokolia iwa inmak akimeh techtlawelitah.

⁷²Noiwa okijto kinmiknomatiskia totatawah iwa ayik kilkawaskia tlan okisentlali kichiwaskia.

⁷³Ye ni tlan Totajtsi Dios okisentlali iwa totata Abraham:

⁷⁴Ye okisentlali techpalewiskia de inmak akimeh techkokoliah, para amo matimawikah ijkuak tiktekitiliskeh,

⁷⁵matiyetokah tiyolchipawakeh iwa timilajkameh inawak Dios, asta ijkuak timikiskeh.