Luka 1:55-75

⁵⁵A tun ka wo lahidi ta an benba Iburahima ni a bɔnsɔn yɛ foo ka wa kadawu.»

⁵⁶Nba, Mariyamu mɛnda Elisabɛti tɔrɔfɛ ye. A ka karo sawa ɲɔɔn kɛ, ka ban ka wa a wara.

⁵⁷Nba, Elisabɛti moyi lon sera. A moyira dencɛ la.

⁵⁸A siiɲɔɔnilu ni a badenmailu ka a mɛn ko Maari Alla ra kininkinin a ma ka ko ba kɛ a yɛ. Alu bɛɛ sewara.

⁵⁹A sɔrɔn tele seyin, alu bɛɛ nara ka den kojiiya kɛ. Alu tɛrɛ ye a fɛ ka a tɔɔ la a fa Sakariya la.

⁶⁰Kɔni a na ka ie jabi: «Wo tɛ bɛn. A tɔɔ le ko Yaya.»

⁶¹Alu ka a sɔsɔ ko: «Ai badenmailu rɔ mɔɔ si tɔɔ tɛ Yaya.»

⁶²Alu ka kuma Sakariya yɛ ie bolo la, ka a maɲininka den tɔɔ ma.

⁶³Sakariya ka ie jabi a la kuma la a bolo la ko alu ye walan do don a bolo. Alu ka do don a bolo. A ka a ta ka sɛbɛli kɛ a kan ko: «Den tɔɔ le Yaya.» Alu bɛɛ ka wo yen ka kabannakoya.

⁶⁴I kɔrɔ ye, Sakariya da lakara. A sera kumala ikɔ tuun. A ka Alla tando bakɛ.

⁶⁵Wo ka ye mɔɔilu bɛɛ masilan. Mɔɔilu bɛɛ tɛrɛ ye a barola ko ɲinilu kan Jude koyinkɛ yɔrɔ wo fan bɛɛ rɔ.

⁶⁶Mɛnilu ka kibaro wo lamɛn, woilu tɛrɛ ye i mirila ko: «Den wo ri kɛ mɔɔ su ɲuman di?» Baa, alu ka Alla la baraka yen den kan.

⁶⁷Alla la Nin Sɛniman jiira Sakariya rɔ, ka kelaya ko:

⁶⁸«Tandoli ye Isirayɛlikailu Maari Alla yɛ, baa a ra na ka a la mɔɔilu hɔrɔya.

⁶⁹A ra Kisiba di an ma ka bɔ a la jɔn Mansa Dawuda bɔnsɔn dɔ.

⁷⁰A ra wo kɛ iko a la nabiɲuma sɛnimanilu ka a fɔ ɲa mɛn ma kɛbi waati jan.

⁷¹Kisiba wo ri an kisi an juuilu ma, ka an bɔ an kɔniyabailu bɛɛ bolo.

⁷²A ra hina an failu la, baa a ra a janto a la teriya sɛniman dɔ,

⁷³a ka mɛn sidi an benba Iburahima yɛ kɔnin.

⁷⁴A ko, ko a ri an kisi an juuilu fanka ma. Kosa an kana silan mɔɔilu kɔrɔ, fo ka Alla bato

⁷⁵sɛniya rɔ, a ni telenbaya rɔ. An di baara kɛ a ɲana wo ɲa ma, haan ka an si tele bɛɛ ban.»