San Lucas 1:55-75

⁵⁵ohcon quemeh omoyectencautzinoh innauac in toyauehcautahuan, inauac in Abraham uan naquin oneuah de yeh, ica in sintitl nochipa.

⁵⁶María omocau iuan Elisabet quemeh yeyi tlapoual, uan satepan oualmocuip ichan.

⁵⁷Ihcuac yoahsic in tonal, Elisabet octlalticpacnextih se itelpocaconeu.

⁵⁸Naquin oc cah quen inuan omotayah uan naquin ic ompa ochanchiuayah ocmatqueh nic in toTecotzin simi oquicnoitac in Elisabet, uan yehuan iuan opaqueh.

⁵⁹Satepan, ipan chicueyi tonal, ocuicaqueh ocjudiohnescayotitoh in conetl, uan octoocaayotisquiah Zacarías, quemeh nipapan.

⁶⁰Pero nimaman oquihtoh: —¡Amo! Yeh isqui itoocaa Juan.

⁶¹Uan oquiluihqueh: —¿Tleca? Amaquin naquin oc quen iuan tonmota ohcon itoocaa.

⁶²Ihcuacon ica ninma octlahtlanihqueh nipapan in conetl, quenih ocniquia ictoocaayotis.

⁶³Uan yeh octlahtlan se tlapichcotoctli, uan ompa oquihcuiloh: “Itoocaa Juan.” Uan nochtin ocmotetzauihqueh.

⁶⁴Uan ihcuacon omoton nininipil, uan opeu tlahtoua uan ictlacachiua Dios.

⁶⁵Nochtin non ochanchiuayah ic ompa, omomohtihqueh, uan itich nochi in tipeyoh Judea omomat nochi nin tlen omochiu.

⁶⁶Uan nochtin naquin occaquiah omoyoluayah uan ocmotlahtlanayah: —¿Tlenoh ipanti isqui nin conetl? Pues milauac nichicaualitzin in toTecotzin ocatca iuan.

⁶⁷In Zacarías, nipapan conetl, oyolpiyau ica in Espíritu Santo uan otlahtoh ica tlahtol tlen ocsilih de Dios. Oquihtoh:

⁶⁸¡Mattlacachiuacan in toTecotzin, Dios de Israel, nic oualmouicac tonauac uan otechonmaquixtico tehuan aquin itpouih tiaxcatzitzin!

⁶⁹Otechonmactih se toTemaquixtihcatzin chicaucatzintli, ualeuani de nitlaqueualtzin David,

⁷⁰ohcon quemeh yauehcau ocmihtaluih Dios ica nintlahtol in teotlanauatanih iaxcauan Yehuatzin.

⁷¹Techonmaquixtis inmac naquin techixnamiquih uan inmac nochtin tlen techcocoliah.

⁷²Uan ohcon connextis niteicnoitalis innauac in toyauehcautahuan, uan amo conilcauas in mouistic tlahtolsintilil tlen oquichiu inuan.

⁷³Yeh nin tlen omoyectencau inauac in totatah Abraham:

⁷⁴Omoyectencau Yehuatzin techonquixtis inmac aquihqueh techcocoliah, uan ohcon mattlacachiuacan Yehuatzin amo ica nimohtil,

⁷⁵ica se yolilistli tlasicantlalil den tlahtlacol uan ica yecchiualistli, ica in sintitl mostlah.