Ruk 1:55-75

⁵⁵Ma inahapat oh Eprahamo orhe puh dirnongo oh orhe hinhina mat paptepramur ma potip mengnong oh orhor daham hinhina nahat napapatmuro. rima Maria uh Got ohnong armi mara ga ama ritip oh.

⁵⁶Maria uh ama ga oh rimo hama amup Irisabet uhsi patin hayop yitir sutporhan it urhe apteinong ama waihip oh.

⁵⁷Gahan Irisabet uh brer ake sum brer mon itipri.

⁵⁸Itporhan tap aptei hano urhorsi taptem bapo ihir Got ohe uhnong hinhina mar isip ma yah dei ohe meng oh amrama uhe patnong sus urhorsi irair tap hat amam hatpari.

⁵⁹Ihama gahan brer itir dik oh patin kir oh hatporhan kuuhan ihir Gin mon ohe eit watah agatmatin dik hah ma hapat daham tap tei hangopari. Tap tei hapti brer ohe win oh itap orhe winsi Sekaraia potinmur pongopari.

⁶⁰Potperhan sup uh Es. Ohe win oh Jon potiprohemur pongopri.

⁶¹Potporhan ihir Wa. Orhe uum mam ihirhe ihtin win tit patda. Ihan ihtin win oh na atiprohemur pongopari.

⁶²Pora itap oh kian win atinmur potiproho rim bes tei kis mar dahandeingopari.

⁶³Dahamtiperhan oh iraire ohe tei brak tahapti tan tit bes tei kis mar poprina potporhan ihir dat apingopari. Dat apriperhan oh Brer ohe win oh Jonmur por brak deingopri. Brak matporhan ihir wamara da trun darhengopari.

⁶⁴Ihtiperhan itap ohe meng mandap ma anggut patesuh oh asut orhor kapkap meng mandap oh adaputporhan Got ohnong armi mar mengingopri.

⁶⁵Mengitporhan orhorsi tap aptei han ihir wamara Got oh wan tit dei moho daham ihirhe kas hatpari. Kas hama Judia yei mong aptei aptei moh gospot pipari.

⁶⁶Gospot susa aptei aptei oh ama meng oh amrapti ihir Hanipyah orhe kasip ohsi pat brer moho daham Ihan ohe ma indipra oh kinhatin han hat sa patepra daham ihirhe gospor apetpari.

⁶⁷Jon ohe itap Sekaraia ohe Got ohnong ma armi matip oh mamaru ham armi matipmur. Ma armi matip oh Yahsup oh ohe mutuhnong ruumsan hama teip hatporhan oh propet ire Got ohe meng ma poriptiru hat mengitipmur. Ma mengitip oh

⁶⁸Isrer dire Hanipyah Got oh gin nambutin ina dasi nahat napapat ohoh ihan orhornongwi armi mar papten han ohmuro.

⁶⁹Mama armi mar papten han orhor orhe atamreisuh han Depit ohe puh ire boknong oh dirnong namburin kasipnap han tit matporhan oh tarpam patmuro.

⁷⁰Ihat tarpam ma pat oh orhe meng pot pisashe han propet yahnap han ihirnong Noh gure namburin han tit napripramur potporhan ire ma risheru mat orhor gin dirnong namburin han oh napriporhan oh tarpam patmuro.

⁷¹Namburin han oh ihat patim dirnong mahaw naham heisup nahat napapti han ire bes teinong nahat napapatin ire bes teimdap dirnong nambur yah teinong nahen han hat patmuro.

⁷²Ihat dirnong namburin han ma napin pat oh diradire awher ihirnong Noh gurnong hinhina naham yah nahapramur ma potip meng ohsi; ihirnong ma rit atip meng ohsi gin norhe ritip meng oh gin imtipora daham dirnong gin napin patmuro.

⁷³Rih rit ma atip meng oh dire aw Epraham ohnong Arpin noh inahatipramur por awam tuketipmur.

⁷⁴Meng por ma awam tuketip oh Epraham gwe puh ihirnong noh mahaw han ire bes teidapat ambura yah teinong matipramur. Matporhan ihir norhe natamreindin oh kas timbas sa natamreipri.

⁷⁵Natamreima norhe kintei nuhur Got orhe hanmur rim ongeng mat papti da ohsi; duutin da ohsi hat ma sapti da ohsi hat sa patepri rim Epraham ohnong gipor awam tuketipmur.