Luk 1:55-75

⁵⁵Aminduwiy-at, ŋa taliit doo ɗo Ibraayim iŋ tambaay ar taat ŋa kaawiico ɗo aginiyte. »

⁵⁶Min ŋaar-ak, Mariyam taaytu wer ka Elizabeet ar koyin subba pa, kar ta yeeptu gerco.

⁵⁷Elizabeet, min menuwti ku weendi nectu, ta weetu mico.

⁵⁸Mutkiyti iŋ aginiyti dortu a Rabbin tal aminduwti-ak, ŋu aaciytu iŋ taara.

⁵⁹Min mic-ak gintu menaw porpoɗ, kar ŋu astu ɗo *ɗukume ka seln̰ol. Zer ŋu rakji diye siŋ ku tacco Zakariya.

⁶⁰Kar yaaco gay kaawiico aman : « Ha’a, paaɗo ! Gii kolin̰ Yaaya. »

⁶¹Ŋuur gay telkiitit aman : « Ɗo baako, ginno gem kaak siŋji pa. »

⁶²Kar ŋu kaawiiji iŋ pisin̰co ɗo tacco Zakariya aman : « Ki raka roŋji, gii kolin̰ waa ? »

⁶³Ŋaar gay inditu maan ka siirindi, kar ŋa siirtu aman : « Siŋji Yaaya. » Hiyya, gee-ak okin̰co ajbiytu.

⁶⁴Ɗo wer-ak, biy piltu kate ho ŋa teestu kaawe. Ŋa oziliig Buŋ.

⁶⁵Gee-ak kolaw un̰jiico. Kaaw-at totirtu ɗo kiɗ okin̰ji ka dambiniidi ka Zuude ho ŋu kaawa ko ɗo bi ŋaar-ak di. Okin̰co, gee kuuk doriit kaaw-at, kolaw un̰jiico,

⁶⁶ŋu obiit ɗo gelbinco ho ŋu ɗiytu aman : « Mic-aŋ asa gine maa gemira ? » Ka seener, gudurre ta Buŋdi goy iŋ ŋaara.

⁶⁷Ruwwin ta Buŋdi miiniig Zakariya takan̰ mic-aka, ŋa teestu kaawe ar nabiin̰ce aman :

⁶⁸« Oziliika ɗo Rabbine, Buŋ ka Israyeel asaan ŋa mogiig geen̰ji ho ŋa jiliigu.

⁶⁹Ŋa imilte Gay Jilindi kaak gin gudurre min ɗo tamba ta gay riyoy Dawuud.

⁷⁰An ko kaaw taat min awalle Buŋ kaawiico ɗo nabiinnay kuuk ŋa doɓtu ho ŋuur gay kaawiit ɗo geemir.

⁷¹Kaaw-at, taar ko taat Buŋ ɗiytu a ŋaate jilinte min ɗo adinte ho min ɗo pise ka gee kuuk elgitenno.

⁷²Ŋa tal amindaw ta aginiyte ho ŋa bal rawtin jamuwiy taat taɓ ŋa obtu iŋ ŋuura.

⁷³Jamaw-at, taar ko taat Buŋ togiltu ɗo tatte Ibraayim

⁷⁴a ŋaate jilinte min ɗo adinte ho gii abdiyin̰ji bal kolaw.

⁷⁵Ampaa ko, gii gine sellen̰ ho *cawar ɗo uŋji, ɗo menuwte kuuk ŋa beriite ɗo duniiner. »