Luka 1:55-75

⁵⁵Aloxo Anu muxavutalanu vaikala e Anu mulemolu noxou Avalaamu iloꞌa ta xaixasou mo ta ꞌiluꞌilusunu xe ta xaixasiꞌa ta maminge iloꞌa ta ꞌiluꞌilusuneꞌi ta maminge.”

⁵⁶Malia ilee Elisaveti mixoxolu mumomomo loxo soꞌio tatalu, xe iliꞌi la ane milivu milai no tualasie.

⁵⁷Voxo sou Elisaveti ivoꞌo muxali, la mivoꞌo ꞌilie mulu vile.

⁵⁸Xe ta tema tualasie iloꞌa ta minemine milomusie xo mimaisie lexe Tila tanuxe musuku, la aneꞌi iloꞌa miꞌosa.

⁵⁹Xe mivoꞌo mo voxo muxatele tatalu sou, la aneꞌi mineꞌe mipita sou xooxoo mungaasou xe sou lexe imoxou ualasou sou momu Sakalia.

⁶⁰Ia nenu mivikala aloxo ꞌo, “Uasi! Tamoxou ualasou lexe Ioanesi.”

⁶¹Ia aneꞌi mivikalane aloxo ꞌo, “Ta minemineni vile ualasou loxo ne uasi.”

⁶²La sou aneꞌi milosi no avoꞌa mulai noxou momu lexe umoxoꞌu ꞌolu ualasou a loxovaa?

⁶³Anu mutovolaꞌi sou lexe inoꞌu ovu alelaxu sou ukaukavu no anu. Xe milosou mukalu, la anu mukaukavu no anu aloxo ꞌo, “Ngamoxoꞌu ualasou lexe Ioanesi.” Aneꞌi mimaisou uala ane ne, la mikuluke manina.

⁶⁴Alaxu vilesisi ꞌo, la Sakalia anaxu e mutomu ne, utomu la ua. Anu umomomo sou uvikala la. La sou muvikala sou muꞌitinu Lataua ualasou.

⁶⁵Xe ta tema tualasou mimaisou aloxo ne, la mimamaꞌu misevile. La sou aꞌalosou mimii latala e muxali ne, mulutu la mulai no tuatuala e no anu laxalaxaꞌilu sie Iutaia.

⁶⁶Ta mitema latala milomusou aꞌalo ane ne, la aneꞌi taneꞌi lili no anu. La sou mivikala lexe iliꞌi, la anu keakea ne uxali itema a loxovaa? Xo milavu lexe xavi noxou Tila a muxolu noxou ne.

⁶⁷Ioxe, Uleenu Tavuna muꞌanaꞌana noxou Ioanesi momu e Sakalia ne, la sou anu muvikala mupalomatana aloxo ꞌo,

⁶⁸“Nenge taꞌitinu Tila ualasou, anu Lataua noxinge nenge ta Isilaeli, xo Anu muneꞌe sou mulivulixaꞌa ta mitema noxou.

⁶⁹No nano no taiineꞌi ta xaixasou iloꞌa ta ꞌiluꞌilusunu, Deviti e itema sou xaixai noxou. la Anu muxalixu itema vile xaviinu sou upamaulinenge.

⁷⁰Aloxo, tatei la Anu mulemo noxiꞌa ta mitema sou palomatana noxou e Anu musosovosiꞌa.

⁷¹Anu upamaulinenge no avoꞌa ta uluamenge mo no avoꞌa ta mitema ukalusi ane imasaxainge uasi.

⁷²Anu tanuxaꞌa ta xaixasinge iloꞌa ta ꞌiluꞌilusunenge, mo muxavutalanu vaikala noxou e Anu musakiinu tatei,

⁷³noxou Avalaamu, Anu ꞌilusunenge.

⁷⁴Sou lexe Anu upamaulinenge no avoꞌa ta uluamenge mo sou lexe nenge tamamaꞌu mo taꞌume uasi,

⁷⁵ia nenge taxaxai noxou, la nenge taxolu vaꞌaxu no anu ꞌiliꞌilixo masumasua mo tamulinu ꞌilixo ane mulapu no voxovoxo utotomu.