Luke 1:55-75

⁵⁵Vonahaqiaqi, ʼaqegigidavo Ebelamo me ena gadeavo Yaubada vona fofofola ʼidia be nanuakolokolo vatayeda.”

⁵⁶Meli ena vonayavo luʼovoidi, ʼinega nibaina maega itoa waiʼena toi ʼidia, ʼinega ʼabiboda ʼevivi ena ʼabagaya.

⁵⁷Elisabeti ena tuta niʼa lobea ʼinega gwama meʼolotona venatunea.

⁵⁸Ta edi gadeavo wese ediavo Yaubada ena veyoluba ʼidia weaqina inoqolia ʼinega qabudi iqaiawa qiduana.

⁵⁹Ta gwama nana ena ʼaubena veʼeitina (8) niʼa lobea, ʼinega ena qabuyavo ivaʼauta mai ʼwafina sabi daʼana, ʼidewana lova Yaubada luvine Ebelamo neia. Ta wese nuanuadi ina gabea tamana Sakalaia waviana.

⁶⁰ʼInega inana iawatayedi ivonedia, “Gebu, gwama baʼe kana gabea ana wawa Ioni.”

⁶¹ʼInega qabu diavona ivonaya, “Benaʼe wawa nana omiʼa gademina ge ami wawa.”

⁶²ʼInega venima giyoyowega tamana ivetalaʼaiea maʼoda gwama ana wawa nagaba ʼaiqei.

⁶³ʼInega Sakalaia ʼebeʼwayavi weaqina noqi ta ineia, ʼinega gwama nana ana wawa ʼwayavia baʼe ʼidewana, “Ana wawa Ioni.”

⁶⁴Ta omoʼe tuta nana ʼinaya Sakalaia meana meaqana ʼevivi, ʼinega veqae ta Yaubada awatuboya. ʼInega qabu koyadi wawa nana iʼitea ʼabo nuadi voqana qiduana.

⁶⁵Ta totoa ʼabaga qabudi baʼe yani diavona weaqina nuadi voqana qiduana. ʼInega tomotau edi veqae ʼinega valena yawala dadana diʼwe Iudia bwanaganavo ʼidia.

⁶⁶Ta tomeqabu vale baʼe inoqolia nuadi ivetonovea, ʼinega taudiega ivetalaʼaiedi ivonaya, “Tolaʼai nawale naʼifoqe baʼe gwama nana ʼinaya ta maʼoda naviaqa ʼaiqa?” Mana iʼitea Yaubada ena waiwai ʼinaya ʼenoʼeno.

⁶⁷Ta Ioni tamana Sakalaia Niboana Gwalagwalana luveagatunaʼia ʼinega simana ʼifoqe vonaya,

⁶⁸“Kaiwabu kana awatuboi, tauna me Isileli eda Yaubada, mana niʼau vayausida be toa vita ʼinega liʼamida.

⁶⁹ʼInega Yaubada ena tofewa tubuda Deibida ena gadeyega ada Toʼetoyavua veʼifoqeyea ʼidaya, ta tauna Tovewaiwai vaʼine.

⁷⁰Yaubada ena vona diavona baʼe lova tovesimasimana nugwenugweidi imaduvonayedi,

⁷¹vonigo naʼetoyavuida ada aviayavo ta wese ada tonogayavo ʼidiega.

⁷²Ta wese lova vona fofofola be vonigo tubudavo nanuakolokoloyedi ta ena vona fofofola gwalagwalana ge nanuafania.

⁷³Ta baʼe vona fofofola nana Yaubada tubuda Ebelamo neia,

⁷⁴be vonigo nayavuida ada aviayavo ʼidiega be yaqisa me eda giwalifatu kana fewa weaqina.

⁷⁵Ta tuta qabuna eda ilivu aqiaqina ta tunutunuqina Yaubada matanaya.