1“Sang kulo nu sin LEUM GOD mweyen El wo, Lungkulang lal oan ma pahtpat!”
2Kalweni in fahkak kas inge in kaksakin LEUM GOD, Kowos nukewa su El tuh molela. El tuh molikowosla liki mwet lokoalok lowos,
3Ac folokinkowosme liki mutunfacl saya, Liki acn kutulap ac roto, liki acn epang ac eir.
4Kutu selos tuh forfor yen wangin inkanek we in acn mwesis Ac tia ku in konauk inkanek nu ke sie siti elos in muta we.
5Elos masrinsral ac malu Ac elos fuhleak finsrak lalos.
6In ongoiya lalos, elos pang nu sin LEUM GOD Ac El molelosla liki keok lalos.
7El kololosla ke soko inkanek suwohs Nu ke sie siti, yen elos ku in muta we.
8Fal elos in sang kulo nu sin LEUM GOD ke lungse kawil lal, Ac ke ma wolana El oru nu selos.
9El sang ma nimalos su malu, Ac akkihpyalos su masrinsral ke ma wo.
10Kutu selos muta in acn lohsr matoltol; Kapiri elos ke mwe kapir osra
11Mweyen elos lain sap ku lun God Kulana Ac pilesru mwe luti lal.
12Elos totola ke orekma upa lalos. Elos ikori a wangin mwet kasrelos.
13Na in ongoiya lalos, elos pang nu sin LEUM GOD, Ac El molelosla liki keok lalos.
14El usalosme liki acn lohsr matoltol, Ac wotyalik mwe kapir kaclos.
15Fal elos in sang kulo nu sin LEUM GOD ke lungse pwaye lal, Ac ke ma wolana El oru nu selos.
16El kunausya srungul orekla ke osra bronze, Ac koteya polo osra srumasriyen srungul uh.
17Kutu selos mwet lalfon, elos keok ke sripen ma koluk lalos, Ac ke ma sufal lalos.
18Elos tia lungse liye kutena kain in mongo Ac elos apkuran in misa.
19Na ke elos sun ongoiya, elos pang nu sin LEUM GOD Ac El molelosla liki keok lalos.
20El akkeyalosla ke sap ku lal, Ac molelosla liki misa.
21Fal elos in sang kulo nu sin LEUM GOD ke lungse pwaye lal, Ac ke ma wolana El oru nu selos.
22Lela elos in sang kulo nu sel ke mwe kisa firir, Ac fahkak orekma nukewa lal ke pusren on.
23Kutu selos kalkal in meoa In suk mwe kasru nu selos ke elos orekma fin oak uh.
24Mwet inge liye ma LEUM GOD El ku in oru, Ac ma usrnguk El oru in meoa uh.
25El kaskas na, ac eng uh tuhyak upalana Ac mokleak noa uh yokelik.
26Oak uh touyak nwe lucng Ac sifil putati nwe ten. Ke sripen mwe sensen inge, mwet fin oak uh fosrngalana.
27Elos tukulkul ac fahsr toptop oana mwet sruhi. Wanginla sripen etu lalos.
28Na ke ongoiya inge sonolos, elos pang nu sin LEUM GOD Ac El molelosla liki keok lalos.
29El akmisyela paka uh, Ac noa uh mihsla.
30Elos enganak mweyen mihsla, Ac El kololosla nu yen elos akwot in oai we.
31Lela elos in sang kulo nu sin LEUM GOD ke lungse pwaye lal, Ac ke ma wolana El oru nu selos.
32Lela elos in fahkulak in walil uh Ac kaksakunul ye mutun un mwet kol lalos.
33LEUM GOD El akpaoyela infacl uh, Ac El tulokinya unon in kof in tia soror.
34El ekulla fohk wowo in oana acn mwesis, yen wangin sak ku in kapak we, Ke sripen ma koluk lun mwet su muta we.
35El ekulla acn mwesis nu ke lulu in kof Ac acn pao nu ke unon in kof.
36Ac El lela tuh mwet su masrinsral in muta we, Na elos musaeak sie siti tuh elos in muta loac.
37Elos taknelik ima, ac yukwiya nien grape, Na ke elos kosrani, arulana pus fahko.
38El akinsewowoye mwet lal, ac akpusye tulik natulos. El oayapa oru tuh cow natulos in tia pueni.
39Ke pacl mwet lun God elos kutangyukla ac akpusiselyeyuk Ke mwe keok ac moul upa sin mwet lokoalok lalos,
40God El fahkak sulung lal nu sin mwet su akkeokyalos Ac oru tuh elos in forfor yen wangin inkanek we in acn mwesis uh.
41Tusruktu El molela mwet ongoiya liki moul in keok lalos Ac oru tuh sou lalos in arulana puseni.
42Ke mwet suwoswos elos liye ma inge elos engan, A mwet koluk nukewa wanginla ma elos ku in fahk.
43Lela mwet lalmwetmet in nunku ke ma inge; Lela elos in nunku ke lungse pwaye lun LEUM GOD.
