1¡Le güe lá'ana Xránadxu, Benne' xrlátaje! ¡Chadía chacanna naque̱' Benne' zri'i lazre'!
2Da nigá dxal-la' xelenná benne' ca' ba naxá'awe Xránadxu le̱', benne' ca' bselé̱' lu na' benne' guledábague̱' Le̱'.
3Beche̱'e̱ le̱' naga gulezrá' benne' xe̱zr la xu zitu' ca', da zaj zua naga dxalaj gubizra, ne naga dxebía na, ne naga za' be' zaga, ne naga dxedé gubizra beu' zaga ca'.
4Bal-la benne' ca' guledé̱' le̱'e̱ xixre' naga quebe bi neza zua, ne quebe belezrelne̱' xe̱zre naga xelezúe̱'.
5Guledune̱', ne gulebílene̱', ne québedxa bi gulebeza lazre̱'.
6Nadxa lu da dxelezaque̱' gulenné̱' Xránadxu, na' bselé̱' benne' ca' lu da dxelezaque̱'.
7Na' buzre̱'e̱ le̱' tu neza li, chee̱ chjaque̱' tu xe̱zre naga xelezúe̱'.
8Dxal-la' xelúe lá'ane̱' Xránadxu lawe' da bexache lazre' Xránadxu le̱', ne lawe' da be̱ne̱' chee̱' da ca' da dxebánedxu.
9Dxuxí'aje̱' benne' ca' dxelebile lazre', ne dxugawe̱' benne' ca' dxeledún nen da chawe' chee̱'.
10Bal-la benne' caní gulezúe̱' lu da chul-la, ne lu da ste̱be chee̱ xel-la' gute. Gulaque̱' ca benne' zaj xu'e̱ lizre xia, ne zaj nadxéaj du xia, ne dxeledée̱' ba xa',
11lawe' da guledábague̱' xrtizra' Xránadxu, ne buluzúe̱' chalá'ala da bzéajni'i Dios zrente̱ le̱'.
12Belexedú lazre̱' lu zrin zí'ite̱ da dxelune̱'. Xeleajcházie̱' zran xua da zaj nu'e̱, ne quebe nu chilá' gácale̱ne̱' le̱'.
13Nadxa lu da dxelezaque̱' gulenné̱' Xránadxu, na' bselé̱' benne' ca' lu da dxelezaque̱'.
14Nadxa bebéaje̱' benne' ca' lu da chul-la ne lu da ste̱be chee̱ xel-la' gute, ne bzúzruje̱' du xia ca' da zaj nadxéaje̱'.
15Dxal-la' xelúe lá'ane̱' Xránadxu lawe' da bexache lazre̱' le̱', ne lawe' da be̱ne̱' chee̱' da ca' da dxebánedxu.
16Bchínnaje̱' dxa xu'u ca' zaj naca na xia gache, ne bzúzruje̱' xia ca' da zaj naxechaj na benne' ca'.
17Bal-la benne' ca' gulaque̱' benne' xala, ne guledée̱' xel-la' zi' ne̱ chee̱ dul-la da zaj nabague', ne ne̱ chee̱ da zrinnaj ca' da belune̱'.
18Belexegútene̱' da dxelé'aj dxelawe̱', na' xáteze ca gulátie̱'.
19Nadxa lu da dxelezaque̱' gulenné̱' Xránadxu, na' bselé̱' benne' ca' lu da dxelezaque̱'.
20Gusel-le̱' dizra' chee̱' chee̱ benne' ca', na' bexune̱' le̱', ne bselé̱' le̱' lu xel-la' gute.
21Dxal-la' xelúe lá'ane̱' Xránadxu lawe' da bexache lazre̱' le̱', ne lawe' da be̱ne̱' chee̱' da ca' da dxebánedxu.
22Dxal-la' xelé̱'e̱ Le̱': Xcalenu'. Dxal-la' xelú'e̱ da xulunézruje̱' Le̱', na' lu xel-la' dxelebé chee̱' dxal-la' xelúl-le̱', ne xuluzenne̱' bénneache ca zaj naca da nune̱'.
23Bal-la benne' ca' guledée̱' lu nísadau' lu da zren ca' da dxedá lawe' nísadau'. Belezi'e̱ dumí zren lu zrin dxelune̱' lu nísadau'.
24Belelé'ene̱' ca naca da ca' dxun Xránadxu, da ca' dxune̱' lu nísadau' da zaj naca na da dxebánedxu.
25Gunné̱ze̱', na' guzú lau dxaca be' bdunu', na' gulasa xeajxruza zren lu nísadau'.
26Belegüén da dxedá lawe' nísadau' ca' ca lu xi'a zri'a da naca na nísadau', na' belexexetaj na lu da situj lawe' nísadau' na'.
27Gulechégüe̱', ne xeajleté̱' ni xeajleté̱' na' ca benne' dxelezuzre, na' guca dácheze ca da zaj nusé̱die̱'.
28Nadxa lu da dxelezaque̱' gulenné̱' Xránadxu, na' bselé̱' benne' ca' lu da dxelezaque̱'.
29Bzua zrie̱' be' bdunu' na' da dxaca na, ne gulezúa zri xeajxruza chee̱ nísadau' na'.
30Gulebéle̱'e̱ne̱' lawe' da zaj zua zri xeajxruza ca', na' guché̱'e̱ Dios le̱' cháwedau' naga zjaque̱'.
31Dxal-la' xelúe lá'ane̱' Xránadxu lawe' da bexache lazre̱' le̱', ne lawe' da be̱ne̱' chee̱' da ca' da dxebánedxu.
32Dxal-la' xuluzenne̱' ca naca xel-la' szren chee̱' naga zaj nazraga bénneache chee̱', ne xelúe lá'ane̱' Le̱' naga zaj nazraga benne' gula ca', benne' dxelenná be'e̱.
33Be̱n Xránadxu gulebizre xe̱gu nisa ca', ne busú'aje̱' beaj nisa ca'.
34Xu xa'a bexune̱' na xu bizre, ne̱ chee̱ da cale̱la da belún benne' ca' zaj zre̱'e̱ na'.
35Naga naca xu bizre bexune̱' na xu nisa, na' xu xiaj bexune̱' na naga dxalaj nisa.
36Bzre̱'e̱ ga na' benne' ca' benne' dxeledún, na' belune̱' tu xe̱zre naga xelezúe̱'.
37Gulaze̱' xe̱zr la xu na', na' belexaze̱' lba uva ca', na' belexezí'le̱'e̱ lina chee̱ na.
38Be̱ne̱' da chawe' chee̱ benne' ca', na' gulánle̱'e̱ bidu chee̱' ca', ne quebe be̱'e̱ lataj xelelase ca zaj naca be̱ xixre' chee̱' ca'.
39Gate buludé benne' dxelenná bea benne' ca' lu xel-la' zi', ne bulusaca zi'e̱ le̱', ne gulenná bé'edxene̱' le̱', ne belune̱' le̱' da cale̱la, ne buludée̱' le̱' lu da ba xa',
40bca'ana ditaj Dios benne' xíchaje̱ ca', ne be̱ne̱' guledée̱' le̱'e̱ xixre' lawe' lataj naga quebe bi neza de̱.
41Bselé̱' benne' xache' ca' lu da zi' da xa' da dxeledée̱', ne bzánle̱'e̱ zri'ine benne' ca' ca dxelán zrila' ca'.
42Gate dxelelé'e benne' xrlátaje ca' da caní, na' dxelebéle̱'e̱ne̱', na' benne' ca' dxelune̱' da cale̱la quebe bi gaca xelenné̱'.
43Benne' ca' zaj naque̱' sina dxal-la' xulaba lazre̱' ca zaj naca da caní, ne dxal-la' xelexúnbe'e̱ ca naca xel-la' zri'i lazre' chee̱ Xránadxu.
