1Ala kava neꞌmo alagepa vekamo maiꞌneno muki afinaꞌamo hau huno apateme apateme uno hau huno apategaiyaꞌmofeꞌmo agaefekeꞌmo hao ke heyo.
2Ala kava neꞌmoꞌa kame vayaꞌapimogi apayapatiꞌmo hatu maeno apateꞌniya vayaꞌmogimo, Ala kava neꞌmoꞌa hatu maeno lateꞌniye, huꞌa hisaya gemo haneꞌniye.
3Agaemo yegemo haine neꞌeya kotegatiꞌmo apavalelino ege yegemo lamino nefaleya kotegatiꞌmo apavalelino ege aluga aluga haopalegatiꞌmo apavalelino ege huno apavalelino eno alino anupa huno apateꞌniye.
4Mago vayaꞌmo aniꞌmo ohaneno kaꞌme kotega vayaꞌmo oꞌmaiꞌnaya kotegamo afaꞌa umenitata nehuꞌapaeꞌmo maisaya taonieꞌmo kahauya huꞌnayaꞌmonanafa oꞌageꞌnae.
5Afaꞌa umenitata nehagenoꞌaeꞌmo apaka tege anifeꞌmo hapauge nehigenoꞌaeꞌmo apakupi mafaꞌneꞌageꞌmo apaunena aiꞌniye.
6Ani kava huꞌa hanageke yaꞌmo aliꞌneꞌapaeꞌmo Ala kava nefekeꞌmo keya aeꞌa ge huꞌnagenoꞌaeꞌmo lusi hanageke yaꞌmo aliꞌnaya kavapatiꞌmo apavalelino eꞌniye.
7Agaemo uꞌa maisaya taonifiꞌmo visayafeꞌmo fatago kateꞌmo apavalelino uꞌniye.
8O, Vayaꞌmogi Ala kava neꞌmoꞌa muki vayaꞌaitegamo alagepa kavaꞌamo ageteꞌa hapau aiꞌnaya kavafeꞌmo hao ke heyo.
9Agaemo hapauꞌnigeꞌa hapaꞌye nehiya vayaꞌmo alino falu huno apatege apaka neteya vayaꞌmo alagepa yaꞌmo alino apamige huno neꞌmaiyaꞌmofeꞌmae.
10Mago vayaꞌamogimo Gotiꞌapimo geꞌamo ago amagiꞌa ataleteꞌa anaga hogote vekamoꞌa hisaya kavafeꞌmo huꞌniya geeꞌmo, afa gemo huꞌniye, huꞌa huteꞌa ataleꞌnayaꞌmofeꞌmo seli nofitetiꞌmo kino apateꞌnigeꞌa hani huꞌniya yapiꞌmo ulunapiꞌmo maiꞌneꞌa falisaya kavapiꞌmo maiꞌnae.
12Ani kava huꞌnayaꞌmofeꞌmo lokiya aliꞌyaꞌmo alino apamiꞌnigenoꞌaeꞌmo lokiyaꞌapimo alagi hano huꞌniye. Apakaemo mopafiꞌmo asagauꞌa aiꞌnageꞌapaeꞌmo mago hapa maesaya vayaꞌmo alagi oꞌmaiꞌnae.
13Ani kava huꞌa hanageke yaꞌmo aliꞌa maiꞌneꞌaeꞌmo Ala kava nefeꞌmo keya aeꞌa ge huꞌnageno afiteno hanageke yaꞌmo aliꞌnaya kavaꞌapifatiꞌmo apakufamo alino katino apateꞌniye.
14Agaemo seli nofiꞌmo alino kapalu aeno ataleteno hani huꞌniya yapiꞌmo ulunapiꞌmo maiꞌneꞌa falisaya kavapatiꞌmo apavalelino uꞌniye.
15O, Vayaꞌmogi Ala kava neꞌmoꞌa muki vayaꞌaitegamo alagepa kavaꞌmo nehiya kavaꞌamo ageteꞌa hapau aiꞌnaya kavafeꞌmo hao ke heyo.
16Na kava huꞌniyaꞌmofeꞌmo hao ke hegae. Agaemo yafa lafi kegiꞌyale kateꞌmo aeni kitamo alino lo aeteno lokiya aeniletiꞌmo ka akani maleꞌnaya aenimo alino lo ae maleꞌniye.
17Negi nagi vayaꞌmogimo Goti geꞌamo ago amagiꞌa atalege hosu kavaꞌmo huge huꞌnayaꞌmofeꞌmo kaita hapauꞌniye.
18Muki alu neꞌya alu neꞌyafeꞌmo ohapauꞌniyaꞌmofeꞌmo faligefeꞌmo huꞌa maiꞌnae.
19Ani kava huꞌa hanageke yaꞌmo aliꞌneꞌapaeꞌmo Ala kava nefekeꞌmo keya aeꞌa ge huꞌnageno hanageke yaꞌmo aliꞌnaya kavaꞌapifatiꞌmo apakufamo alino katino apateꞌniye.
20Gotiꞌa geꞌamo alino ateꞌnigeno emineꞌniya geꞌaletiꞌmo alino alagepa huno apateꞌniye. Agaemo falisaya agufa hanageke yaꞌmo aliꞌnaya kavategatiꞌmo apavalelino uꞌniye.
21O, Vayaꞌmogimo Ala kava neꞌmoꞌa muki vayaꞌaitegamo huꞌniya alagepa kavaꞌamo ageteꞌa hapau aiꞌnaya kavaꞌaeꞌmo hao ke heyo.
22Apakaemo Gotifeꞌmo hao ke hesaya ofalinimo amagiꞌa amiyo. Amiteꞌa aliꞌyaꞌalefeꞌmo apamogaga aiteꞌapaeꞌmo aeꞌa hakalo hiyo.
23Alopa solovala anipiꞌmo sipifiꞌmo aliꞌyaꞌmo neꞌaliya vayaꞌmogimo
24Ala kava neꞌmo aliꞌyaꞌamo agege solovala aniteꞌmo huꞌniya kavaꞌamo ageteꞌa hapau aiꞌnaya kavaꞌmo agege huꞌa neꞌagae.
25Agaemo yasi aliyo, huno nehigenoꞌaeꞌmo lusi kava huno yasimo aliꞌnigeno aniꞌmoꞌa aino holakau holakau huteno apavalelino haiteno lamiteno nehiye.
26Sipifi maiꞌnaya vayaꞌaiteꞌmo lusi hanageke yaꞌmo afole aiꞌnigeꞌa kokuꞌnapilagamo haiteꞌa emiꞌeꞌa afepilagamo lamiteꞌa huꞌnagenoꞌaeꞌmo apakupi mafaꞌnemoꞌmo ani hegekana huꞌniye.
27Alopa aniꞌmo neteꞌa negi nagi huteꞌa laku taka nehaya vayakana huꞌa maiꞌnae. Alagepa huta maisunafeꞌmo na kava hisupi huꞌa apakesamo oꞌafiꞌnae.
28Ani kava huꞌa hanageke yaꞌmo aliꞌneꞌapaeꞌmo Ala kava nefekeꞌmo keya aeꞌa ge huꞌnagenoꞌaeꞌmo hanageke yaꞌmo aliꞌnaya kavapatiꞌmo apakufamo alino katino apateꞌniye.
29Agaemo yasieꞌmo afaꞌa maiyo, huno huꞌnigenoꞌaeꞌmo aniꞌeꞌmo afaꞌa haneꞌnaꞌae.
30Aniꞌmo afaꞌa haneꞌnigeꞌa apamogaga aiꞌnae. Ani kava huno apavalelino uno solovala ani agiꞌnaleꞌmo haneꞌniya taonifiꞌmo uꞌa avaꞌyi huteꞌa alagepa huꞌa maisayafeꞌmo huꞌniya taonifiꞌmo apateꞌniye.
31O, Vayaꞌmogimo Ala kava neꞌmoꞌa muki vayaꞌaitegamo huꞌniya alagepa kavaꞌamo ageteꞌa hapau aiꞌnaya kavaꞌaeꞌmo hao ke heyo.
32Apakaemo aliꞌa anupa huꞌa maisayateꞌmo ala agiꞌamo amiyo. Apakaemo vayatama vayaꞌmogi aliꞌa anupa huꞌa maisayateꞌmo agiꞌaleꞌmo aliꞌa asaga huꞌa ateyo.
33Ala kava neꞌmoꞌa alopa aniꞌmo alino leneno neꞌatale. Haine neꞌeya meti aniꞌmo alagi alino hano huno neꞌatale.
34Vayaꞌmogimo hosu kavaꞌmo huꞌnayaꞌmofeꞌmo mopafatiꞌmo asole neꞌyaꞌmo neꞌaeya mopaꞌapimo alino hosu mopamo hamaleno neꞌate.
35Nehiyaꞌmonanafa hau huꞌniya mopamo alino lanitani mopamo hamaleno neꞌate. Aniꞌmo ohaneꞌniya mopafatiꞌmo aniꞌmo alo huno ateꞌnigeno haine neꞌe.
36Agaemo apaka neteya vayaꞌmo ani mopaleꞌmo maisayafeꞌmo apavalelino uno neꞌapate. Apakaemo maisaya taoniꞌapimo kisayafeꞌmo apavalelino uno neꞌapate.
37Apakaemo asole neꞌyaꞌapimo alisayafeꞌmo avina yaꞌmo hakalege nofi alagamo faige huꞌa maiꞌnae.
38Ala kava neꞌmoꞌa hapa neꞌmaegeꞌapaeꞌmo asole mafaꞌnemo aliꞌa neꞌapatae. Pulumaka anagaꞌmo hapa neꞌmaegeꞌapaeꞌmo magoꞌe huꞌa aiꞌa atagu nefae.
39Kame vayaꞌapimogi kana yaꞌmo aliꞌa apamige hanageke yaꞌmo aliꞌa apamige huꞌa aliꞌa apamisagenoꞌaeꞌmo apaipamoꞌmo kana hisigeꞌa alagepa huꞌa oꞌmaisaya afinaꞌmo Ala kava neꞌmoꞌa hapa maegaiye.
40Agaemo kame vayaꞌapileꞌmo neꞌyagaiya vayaꞌmo alino afepi apateꞌnigeꞌa kaꞌmo ohaneꞌniya kaꞌme kotegamo afaꞌa umenitata nehae.
41Alino afepiꞌmo neꞌateyaꞌmonanafa kagemi yaꞌapimo oꞌmaleꞌnaya vayaꞌmo alino asaga huno anaꞌaleꞌmo neꞌategeꞌa hanageke yaꞌmo noꞌaliye. Hapa neꞌmaegeꞌa afamo anagaꞌmo magokepiꞌmo lokaeꞌa maiꞌnaya sipisipi anagakana huꞌa maiꞌnae.
42Fatago vayaꞌmogimo ani kavaꞌmo ageteꞌapaeꞌmo apamogaga neꞌaiyaꞌmonanafa hosu vayaꞌmo apavayaleꞌmo alino akani maleꞌnigeꞌa apake noꞌaiye.
43Muki afiteꞌa ageꞌnaya vayaꞌmogimo ani kavafeꞌmo apakesa afifi huꞌa maigae. Apakaemo Ala kava neꞌmoꞌa vayaꞌaeꞌmo hau ayamopafiꞌmo hauꞌniya kavaꞌamo ageꞌa aeto hugae.
