1Yawe amilmil tunakko, mu awuk, nu ningo, pempem la; noko kua ana nangara ko munan mu, kumik menara mena.
2Buta se nina awiriya nu ninga sangaru tam mu uwutatala balalko; nina kariimet nu kager kari memek nuguting te ninga bataguru tam,
3nina kasik la sor kirker ko wore ninga giam ale ninga ilu biguwuram, koma worem bausa te, se koma worem kapara te, koma north namara mu te, se koma south, den mu balal ale amilmil tualko.
4Kariimet sikina sor merang garagarayam mu te nguala sipa geraga se aguwaya namamon ale sor bo te bagamonko mu me ko ikikasan.
5Nuna yu inang ko ninguru kueman, ale nongomang nungumik lilim la sokel menaram.
6Bare nunga ikup mu ningi baga se Yawe aruman, se nu ikup yaman mu ningi nunga sangaru tam.
7Nu nongorak lage bo diram tam, ale nongorak wonong bo te bagamonko wore te nongorak nama aratam.
8Ario, nuna Yawe amilmil tumonko; noko kua ana nangara ko munan mu kumik guruga patawura mena; nu kiwem ningo ningo nago ko beteso.
9Awiriya yu ko kuawasan mu nu yu nungarso, ale na ko kuawasan mu inang ningo nungarso.
10Kariimet sikina mayang aora te nunga kaloman, se tiromorom ningi nongomang bataga se bagakasan,
11mu awuk, nuna Kaem nubiring tuman, ale Kaem Kalel Biya mu ko den balam wore me karo tuman.
12Se nu nunga beteram se ura ikup ikup taman ale nungumik sokel menaram; nuna dagulaman se bo ta nunga sangukko mena biya.
13Bare nunga ikup mu ningi baga se Yawe aruman, se nu ikup yaman mu ningi nunga sangaru tam.
14Nuna tiromorom ningi nongomang bataga se bagaman mu, mayang te nunga kaloman mu nu batutumu waram ale nongorak wetang te aratam.
15Ario, nuna Yawe amilmil tumonko; noko kua ana nangara ko munan mu kumik guruga patawura mena; nu kiwem ningo ningo nago ko beteso.
16Nu songkuring mel aora aora te nungurman wore batutumuso, ale songkuring mel aora aora te kalo kutiman mu batutumu warso.
17Kariimet sikina kiwem memek ningi nunumi ngualara sipira ko iwita beteman, ale mu ko koma ikup yaman giman.
18Nuna inang suen la nuguring meram, se kuemonko tom pingi aram.
19Bare nunga ikup mu ningi baga se Yawe aruman, se nu ikup yaman mu ningi nunga sangaru tam.
20Nu balam se kuera ikes nunga bita tam; ale kuemonko mutim norogen te bagaman mu nunga sangaru tam.
21Ario, nuna Yawe amilmil tumonko; noko kua ana nangara ko munan mu kumik guruga patawura mena; nu kiwem ningo ningo nago ko beteso.
22Buta se nuna tama bita Kaem tumon ale, wur amilmil te nu kiwem ningo beteram mu ko balmonko.
23Kariimet sikina dal bibiya te aragaman ale gagi tuagu biya te geraga nama tai se, mel nunumi tui, dia gurugu no gi se bagaman.
24Nuna Yawe ko kuting mu arigiman, ale kiwem ningo ningo gagi tuagu biya te beteram mu arigiman.
25Mu awuk, nu balam se marir biya bo duap beteram, se gagi tamun bibiya barasukaso.
26Gagi tamun mu barasam ale dal bibiya mu nunga patatuwuram nongorak tarigiram, ale asele nongorak kapa nagukaso ale aking basu aratukaso.
27Se kariimet awote mu, kari yu aora nana ale dagula barasa iwita bitakasan, ale nunga ikia mena saparam.
28Bare nunga ikup mu ningi baga se Yawe aruman, se nu ikup yaman mu ningi nunga sangaru tam.
29Nu balam se gagi magaram mu kueram kaparam, ale gagi tamun barasuwaram mu kutek mam ale malin kauram.
30Gagi malin kauram se nuna amilmilakasan, se nu nunga bituam nongorak nama saun kuring te namamonko mu te nunga beteram.
31Ario, nuna Yawe amilmil tumonko; noko kua ana nangara ko munan mu kumik guruga patawura mena; nu kiwem ningo ningo nago ko beteso.
32Buta se nuna noko nup biya kariimet nunga biguwura ningi balmon, ale kari supuling nunga biguwura te agotala nup biya patawumonko.
33Nu balam se yu bibiya maraka sapaman, se yu gotektek palengawara mu agotala maraka namaman.
34Nu ali welang ago mu gurugam se nama ali garagarayam memek ko aratam, mu awuk, kariimet owore te anira wore nunga kiwem memek ko koma.
35Aking nu sor merang mu gurugam se yu motam suen biya ko arataman, se ali marakam mu yu tengeso ale naguso kaposo mu ko gurugam.
36Asele nu kariimet na ko kuawara wore te nunga awuram se dagiman, ale nunga kawam digo kaloman ale wonong ko guruguman.
37Nuna nunga inang muguri te aguman, ale mayang waen agotala aguman, se nunguning yawara kapa nungaram se gi no se bagakasan.
38Nu ko kariimet marak nungaram se kuriang gue suen biya paga nungaram, se nunga bulmakau sipsip mu yam butatala gue pagam.
39Tom noko kariimet kager te dagulaman, ale memek baga se kager kari memek nuguting te yaman ikup giwakasan,
40mu Kaem nunga supuling gomang ikup nungaram, ale nunga kaoram se sor merang te, sor lage mena wore te, nguala sipa geragawakasan.
41Bare nu kariimet nungumik mel mena wore nunga saongam, se nunga kuriang gue mu pagam, ale sipsip gue pagoso sor ereso iwita sor iram.
42Se kariimet ningo diram bitawara mu munan imi arigisan ale ko amilmilasan, bare memek bitawara alo mu arigisan ale nuguring menaso.
43Awiriya ikia sinar ago mu, kiwem imi suen la ninguru ko iki se, Yawe ko kua ana nangara biya mu ko kuamin ares maukko.
