Soũↄ 107 - Bibeli Luayãtaalá

Soũↄ 107

Click on verse(s) to share them!

¹À Dii sáaukpa, asa a maa, aà gbɛ̃kɛ láaa vĩo.

²Gbɛ̃́ pↄ́ Dii ń bóↄ o màa, gbɛ̃́ pↄ́ à ń bↄ́ ń ibɛɛↄ ↄzĩↄ.

³À ń bↄ́ bùsu ń bùsuo à ń kãaa za gukpɛ oi ń bɛ'aɛ oio, za gugbãntoo oi ń gɛↄmidↄkĩi oio.

⁴An gbɛ̃eↄ bɛ sã́sãa guwaiwaiu ń sɛ̃gbão, aai wɛ̃́lɛ pↄ́ aa zↄ̃lɛu zɛ́ dↄ̃o.

⁵Nↄana ń imio lɛ́ ń dɛ, an wɛ̃ni gↄ̃̀ lɛɛnnↄ.

⁶Ɔ̃ aa wiilɛ̀ Diizi ń taasikɛau, ↄ̃ à ń bↄ́ ń wɛ́tɛ̃a guu.

⁷À ń dá zɛ́ súsuwa, ↄ̃ aa kà wɛ̃́lɛ pↄ́ aa zↄ̃lɛu.

⁸Aa Dii sáaukpa aà gbɛ̃kɛ yã́i ń yãbↄnsaɛ pↄ́ ì kɛnɛ́o.

⁹Asa ì imidɛnaↄ kòlo níninɛ́, ì pↄmaa kpa nↄandɛnaↄwa aa kã́.

¹⁰An gbɛ̃eↄ ku gusiau ga lɛ́zĩ, aalɛ taasikɛ yea ń mↄdaonao.

¹¹Asa aa gì Lua yãmai, aa sakà Musude lɛdamauɛ.

¹²A tò wà ń busa ń zĩ gbãao, aalɛ lɛ́ gálɛ, gbɛ̃e ku à dↄńlɛo.

¹³Ɔ̃ aa wiilɛ̀ Diizi ń taasikɛa guu, ↄ̃ à ń bↄ́ ń wɛ́tɛ̃api guu.

¹⁴À ń bↄ́ gusiau ń gao lɛ́zĩ, à ń mↄdaonapiↄ kɛ̃̀kɛ̃má.

¹⁵Aa Dii sáaukpa aà gbɛ̃kɛ yã́i, ń yãbↄnsaɛ pↄ́ ì kɛnɛ́o.

¹⁶Asa ì bĩ́ibↄlɛ gba pↄ́ wa pì ń mↄgotɛ̃o gbooɛ, ì mↄsi gbãa zɛ́kakabↄↄ ɛ́'ɛ.

¹⁷An gbɛ̃eↄ lìaa ń swã́gbãa yã́i, aa gↄ̃̀ suuunnↄ ń tàaeↄ yã́i.

¹⁸Aa ye pↄblea gĩyãio, aa kà gaa.

¹⁹Ɔ̃ aa wiilɛ̀ Diizi ń taasikɛau, ↄ̃ à ń bↄ́ ń wɛ́tɛ̃api guu.

²⁰Aà lɛ́kpãsã ń gbãgbã, à ń sí mia'ɛwa.

²¹Aa Dii sáaukpa aà gbɛ̃kɛ yã́i, ń yãbↄnsaɛ pↄ́ ì kɛnɛ́o.

²²Aa sáaukpa sa'owa, aai aà yãkɛaↄ galikɛ ń gulakɛao.

²³An gbɛ̃eↄ gɛ̃̀ gó'ilɛnaↄu, aa dàzɛu ísiaa, aaìↄ bɛ í zↄ̃ↄpia aaↄ gɛ́ laatai.

²⁴Gbɛ̃́piↄ Dii yãkɛaↄ è, ń yãbↄnsaɛ pↄ́ ì kɛ í guoↄ.

²⁵À yã'ò ↄ̃ zàa'ĩan gbãa kàka, ísia fɛ̀lɛ ń bútɛ̃mbaao.

²⁶Aa gɛ̀ musu aa sù zĩ́lɛ, kua kaipi lɛ́zĩ sↄ̃ kɛ̃̀ńgu.

²⁷Aa dèedee, aa tàlaatalaabò lán wɛ̃dɛnawa, an ílɛ'ↄ̃nↄ mìdɛ.

²⁸Aa wiilɛ̀ Diizi ń taasikɛau, ↄ̃ à ń bↄ́ ń wɛ́tɛ̃api guu.

²⁹À ĩ́an gbãa zɛ̀ à gↄ̃̀ ĩ́an fɛɛɛna ũ, à í zùukɛ̀ à kɛ̀ kílikili.

³⁰Kɛ́ gu nìni gↄ̃̀ↄ, an pↄ kɛ̀na, ↄ̃ à gɛ̀ńnↄ godↄkĩi pↄ́ aalɛ yáu.

³¹Aa Dii sáaukpa aà gbɛ̃kɛ yã́i, ń yãbↄnsaɛ pↄ́ ì kɛnɛ́o.

³²Aa aà tↄbↄ balu guu, aa aà táasilɛ dↄaanaↄ kãaa guu.

³³À swaↄ zↄ̃̀ɛ à gↄ̃̀ gugii ũ, a tò nibↄnaↄ gↄ̃̀ tↄↄlɛ inidɛnaↄ ũ.

³⁴À tↄↄlɛ báaade lìlɛ gu wiside ũ gbɛ̃́ pↄ́ zↄ̃lɛuↄ vãi yã́i.

³⁵À guwaiwai lìlɛ dã̀na ũ, a tò gugii gↄ̃̀ nibↄna ũ.

³⁶À nↄandɛnaↄ dìlɛ we, ↄ̃ aa wɛ̃́lɛ kàlɛ aa zↄ̃̀lɛu.

³⁷Aa buapↄ́ↄ tↄ̃̀ aa vɛ̃ɛliↄ bà, ↄ̃ à nɛ'ìnɛ́ maamaa.

³⁸À báaadàńgu, ↄ̃ aa dasikũ̀ à kɛ̀ zài, i to an pↄtuoↄ làoo.

³⁹Ɔ̃ à ń láo lↄ, aa gↄ̃̀ yↄↄnnↄ gbãamↄanɛ́ ń músio ń pↄsiao yã́i.

⁴⁰Lua ì saikɛ kpalablenaↄwa, ì to aa liaaliaa gugii pↄ́ zɛvĩo guu.

⁴¹Ì wɛ̃nadeↄ bↄ taasiu à ń sɛ́ lɛsĩ, ì to an uadeↄ dasikũ.

⁴²Tó gbɛ̃maaↄ è, aaì pↄnakɛ, gbɛ̃vãiↄ sↄ̃ aaì ń lɛ́ kpaaũ.

⁴³Nↄ̀sɛde laaidↄ yã́piↄwa, i Dii gbɛ̃kɛ gwa lá a dɛ.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!