1Ayy, c̱iyi mo jin ’boruwa ’bor bwa i is ki Tap̱a mo, haali/ a’di ’bora’bor mo, haali/ mo/en piti jin ṯelu sho’k mo a’di ’dimki ’kup̱ ki sule/ sule/ mo.
2Dhalki ’kwani gwahan kun wanu ’ba/ mo i/o gwo wakan mo, uni kun wankina a’di ’ba/ ’peni mo jin ṯoju bwa mo,
3dhali tul uni is ’peni mony’cesh mo ’peni mom’pesho’k mo dhali ’pena bora luŋgu’b mo, dhali ’peni moŋ’ko’d gwar ma bim poros mo dhali ’peni moŋ’ko’d gwar ma biny cam mo.
4Unin tiya kun iikin ki iinyc̱a/ e bwam ma si’b mo jin shinu is mo, uni gam bwaya kamu/ e ’peŋkuman bampa/ mmo’ko icine/ mowa?
5Uni ’kosha ṯe/ mo dhali budha yi’de/ mo, dhali aḵashiram buni ’thikina buye/ e bwaman uni mo.
6Dhali yan’ko’d uni ki ko ’twa/i Tap̱a mo gom monṯo’c bwam buni mo, dhali a’di ’cuḵki uni ’peni mo ma c̱is buni mo,
7dhali a’di ki shu uni bway ki bwaya ji sho’k mo, ntagi uni bumburkin mo e ’peŋkuman bampa/ mmo’ko icine/ mo.
8Dhalki uni c̱i mo jin ’boruwa ’bor bwa i is gom Tap̱a mo gom mo/en piti jin ṯelu sho’k mo, gom miin to gi momer piti e iya/ gi ’kwani mo.
9Haali/ a’di ki kap̱ a’diya du mo, a’di jin budha yi’de/ mo, dhali a’di jin ’kosha ṯe/ mo tani a’di ki ’tu’d a’diya du ki tom ’borga/ mo.
10Kun tiya ’kokin e mondhurumi’da ’tum mo dhali e mo jin molu pi ’kup̱ ka pije/ mo kun tana habuus mo gom uni doru ki isa nyor mo dhali remu ’basho’k ki toŋḵuthu’d mo,
11haali/ uni pishki is ka le’da p̱o/ gwo ma Arumgimis mo, dhali bel gwo jin logoma a’di jin Caa e ki Ca mo.
12Adum buni a’di luŋku’d gom to jin diṯadiṯ kun miina uni mo, dhali ki uni ṯa’kki ’ko’da ’cesh mo tani jaŋkamu/ p̱iyi’d mmowoṯẖ uni mo.
13Yan’ko’d uni ki ko ’twa/i Tap̱a mo gom monṯo’c bwam buni mo dhali a’di ’cuḵki uni ’peni mo ma c̱is buni mo.
14Dhali a’di ki ’doyu/ uni ka pije/ ’peni mondhurumi’d mo dhali mo jin molu pi ’kup̱ ka pije/ mo dhali a’di ki ’ce’d mondeḵ buni mmoshaṯ uni ka ’ceshi ’baar mo.
15Dhalki uni c̱i mo jin ’boruwa ’bor bwa i is gom Tap̱a mo gom mo/en piti jin ṯelu sho’k mo, gom miin to gi momer piti e iya/ gi ’kwani mo.
16Haali/ a’di shaṯki’da risa campur ma koroḵ ka ’cesh mo, dhali a’di ki pwaṯẖ dhana bem’ban toŋḵuthu’d bwa mo.
17Kun tiya ’ba’thkin mo e bway miinthus buni mo, dhali gom miiny’coḵam buni mo tani uni ’koshkunu is ka nyor gom to jin wo’cki is she/ mo.
18Uni ushki tonṯen tiya kun ’kona e ki she/ mo, uni ’dishki ’twaŋkal gi mowu is mo.
19Dhali yan’ko’d uni ki ko ’twa/i Tap̱a mo gom monṯo’c bwam buni mo dhali a’di ’cuḵki uni ’peni mo ma c̱is buni mo.
20A’di hashki gwom piti mo dhali wac̱ uni mo, dhali a’di ’cuḵki uni mo ’peni mo jin ’ce’du sho’k mo.
21Dhalki uni c̱i mo jin ’boruwa ’bor bwa i is gom Tap̱a mo gom mo/en piti jin ṯelu sho’k mo, gom miin to gi momer piti e iya/ gi ’kwani mo.
22Dhali dhalki uni c̱i to jin c̱inu mmo’ciṯẖ ’kus ki bwa jin ’boruwa ’bor i is mo dhali ṯor miim piti ki gway mo ki bwaŋ ’kunyka/ mo.
23Kun tiya iikin ka ’cesh e bwaman ḵumma/ yi’de/ e bwaa ḵur mo, mmomiiya ṯu’c yol jin caaca e dhan yi’de/ mo.
24Uni p̱arki mii gi Tap̱a e mo, momer piti kun miikina a’di e moŋ’kulga/ mo.
25Haali/ a’di ḵanki gwo mo dhali cu ’tham jin ta’da p̱unthar mo, a’di jin ’de’kki yi’de/ abor ki mis mmobir bakal ap̱o/ ḵumma/ yi’de/ mo.
26Uni uluc̱ki ’kup̱ki mis mo tani dhali uni iikin ka ’cesh e moŋ’kulga/ mo. Mo ma dum buni jin ’bitha uni is waki’d mo gom mo ma c̱inthar buni kun ta thus ki thus mo.
27Uni iikin ki dho’do/ dho’do/ mo dhali wuŋgul ii mo me’d ’kwani kun ’koshkin ma su mo, dhali uni deekina miim buni ki tash tash mo.
28Dhali yan’ko’d uni ki ko ’twa/i Tap̱a mo gom monṯo’c bwam buni mo dhali a’di ’cuḵki uni ’peni mo ma c̱is buni mo.
29A’di karki’da p̱unthar ’tham mmodi ka ḵu’th is mo, dhali bakal ḵumma/ yi’de/ a’di doshkunu ki biyuu mo.
30Dhali yan’ko’d uni ’kunya bwa mo haali/ uni gam mo jin ’konu ki shwamm mo, dhali a’di ki sus uni e mom buni jin ’kana uni ki she/ jin ona bwa uni mo.
31Dhalki uni c̱i mo jin ’boruwa ’bor bwa i is gom Tap̱a mo gom mo/en piti jin ṯelu sho’k mo, gom miin to gi momer piti e iya/ gi ’kwani mo.
32Dhalki uni kar a’di ki ca mo e bwaman ma tul ’kup̱ ’kwani mo, dhali maŋ a’di e bwaman ma tul ’kup̱ gi ’kwaniŋ gwanyjaḵa/ mo.
33A’di ki ṯu’k yi’de/ e bwaman ma si’b mo, yi’de/ jin kasha e e mony’cesh jin budha yi’de/ ’kwani mo.
34Mony’cesh jin dhotha to a’di ki ṯu’k a’di mo mmota a’cesh jin ’balatha’bala’th jin shiyi’d mo, gom miim buni kun ta thus ki thus kun ’kokin e a’di mo.
35A’di ki ṯu’k bwaa si’b mmowar ka al yi’de/ mo, dhali mony’cesh jin ta’da burta/ o’d mo tani a’di ki kar a’di mmokash yi’de/ e mo.
36Dhali imaṯṯaan a’di ki dhal uni kun ’kosha ṯe/ mmo’ko mo, dhali uni ṯelki ’peŋkuman bampa/ sho’k mo mmo’ko icine/ mo.
37Uni siki bunto mo dhali nyaŋa goŋ mmosiya mura’th mo, dhali gam maman cwa kun gwono’dkin mo.
38Ki mom’bor miim piti mo tani uni markina mar is ki caaca mo, dhali a’di diki dhal bip̱ buni bway mo mmo’koki ’ko mmodhodhi mar is mo.
39Ki uni ’kon ki daḵa/ mo dhali warkunu ki ’kwani kun aṯẖa she/ ki aṯẖ mo e mo jin siri’ckunu uniya siri’c ki sho’k mo dhali monṯo’c bwa mo dhali bwan diṯi’d mo tani
40a’di ki wol mowaḵa p̱o/ iya/ gi imaliḵ mo dhali a’di ki dhu uni mmo/ii ka c̱a/ e mo jin p̱ina sho’k ’kwani mo dhali tonycuḵ mo.
41Hili a’di ki cu uni mis uni kun mini mii ta gi to ’peni mo jin ṯojuwa ṯo’c bwa mo, dhali dhuwa waḵ buni mmowa e ka ma’diny ḵa’bal mo.
42’Kwani kun dhelel ma du mo tani p̱arki a’di e mo dhali ’kuny bwa mo dhali aris uni kun ta thus ki thus mo tani ’dap̱kunu ’twam buni mo.
43A’diyin jin yuḵayuḵ mo tani dhalki a’di c̱iyi’da hirdhe/ ki to gwansan mo. Dhalki ’kwani hil isi gwo i e mo gom mo/en gi Tap̱a mo jin ṯelu sho’k mo.
