Proverbios 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Yachayga wasinta allimi rurasha. Ganchis pilancuwan camarajllata arusha.

²Nircurnami uywacunata pishtasha. Mas allinnin mishquej bïnuta rurachisha. Mësatapis camarisha.

³Nircur warmi uywaynincunata cachasha gayacunanpaj. Chaura altunninman wichaycur gayacusha shuntacämunanpaj

⁴«Mana tantiyacoj mösucuna cayman shamuy» nir. Wallca yarpayniyojcunata gayacusha

⁵«Camaricushä micuyta micunapaj shamuy. Rurashä bïnuta upunapaj shamuy.

⁶Ama ruraynachu mana allitaga. Chayrämi alli cawanquipaj. Yarpaysapa runano alli goyay» nir.

⁷Fiyu runata piñacuptiquega ashllishunquipämi. Mana rispitacojta piñacuptiquega manacajmanmi churanga.

⁸Mana rispitacojcunaga piñacuptiqui chiquipäshunquipämi. Yachaj runacunami ichanga piñacuptiqui fiyupa cushicurmi chasquicongapaj cuyashunquipaj.

⁹Yachaj runaga yachachiptiqui masmi yachaj ricaconga. Alli runacunata yachachiptiqui masmi yachacongapaj.

¹⁰Rasunpa yachaj canapäga Tayta Diostami rimëruga rispitaypaj. Santo Tayta Diosta rejsejcunaga fiyupa yarpayniyojmi.

¹¹Fiyupa allimi musyaj yachaj cayman chayashayquega. Chaypitami unaycama cawanquipaj.

¹²Yachaj carga yachayniquiwanmi allicho goyanquipaj. Mana rispitacoj fiyu runa carmi ichanga jinyuyquipita ñacanquipäpis.

¹³Mana tantiyacoj cayga washa-rima warminömi.

¹⁴Washa-rimacunaga wasinpa puncuncunachöga bancuta churacuycur jamaran. Marcachöpis altu pataman wichaycurmi jamaran.

¹⁵Nircur näninpa aywacuycajcunata gayan:

¹⁶«Mana tantiyacoj upa mösucuna caypa shamuy» nir. Mana tantiyaj yarpayniynajcunatana gayacachin:

¹⁷«Suwacuy yacuga masmi mishquin. Pacayllapa tantata micushaga mishquin» nir.

¹⁸Gayaptin aywajcuna ichanga manami musyanchu chaycho wañuy caycashanta. Manami musyanchu gayashan runacunaga llapanpis wañunanta.