Proverbios 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Ïju, yachachishäcunata sumaj wiyacuy. Yachaj caynëwan willapashätaga sumaj yarparay.

²Llapan willapashäcunata wiyacorga alli yachajmi canquipaj. Chaynöpami maychöpis yachaj cayniquiwanga alli parlanquipaj.

³Mañösa warmiga mishquillarämi parlanpis. Asëtipitapis mas llampu cuyayllapämi rimashancunapis.

⁴Chayno warmita chasquipaj cäga asgächicojnörämi llaquicongapaj. Ishcan-lädupa afilasha cuchillunörämi rimayninpis.

⁵Chay-niraj warmiwan purerga wañongapämi. Sepultüramanmi chayanga.

⁶Chayno warmiga alli goyaypaj manami yarpachacunchu. Llutanta ruraycashancunatapis manami tantiyacunchu.

⁷Ïju, chaymi llapan willapashäcunata sumaj wiyacuy. Willapashäcunataga ama gonganquichu.

⁸Mañösa warmipitaga witicuy. Ni wasi puncullanmanpis ama chayanquichu.

⁹Mana witicuptiquega pengaymanmi chayanayquipaj. Fiyu runami ima-aycayquitapis guechushunquipaj.

¹⁰Ñacar arushayquitapis jäpa runacunami shuntanga.

¹¹Chauraga ñacayman chayar, gueshya charishuptiqui llaquicur waganquipaj.

¹²Chayrämi ninquipaj: «Imanir-raj willapämashancunata manacajman churarä. Piñacamaptin, imanir-raj mana wiyacurächu.

¹³Yachajcuna yachachimaptinpis manami wiyacojchu cä. Willapämajcuna allita willapämaptinpis manami wiyacojchu cä.

¹⁴Cananga llapan runacunami musyan pasaypa mana allimanna chayaycashäta» nir.

¹⁵Mösu caycällar majachacashayqui warmillawan cuyanacushpayqui alli goyay. Majayquega caycan pashtaj pucyunömi. Chaymi yacunarga quiquiquipa pashtaj pucyullayquipita upucunqui. ¿Pucyuyquipita pashtamoj yacuyquega cällicunapa läsacunapa aywar pirdicunmanchuraj? Pucyuyquiwan chaycho pashtamoj yacuga gamllapami. Quiquillayquipa caycaptenga ama dëjaychu juccuna upunanta. ¡Alli rispitasha cachun quiquiquipa pashtaj yacuyquega! Chaymi majachacashayqui warmillawan cuyanacushpayqui alli goyäcuy.

¹⁹Mösullayquicho tarishayqui warmiga cuyayllapaj lluychunömi. Payga mana cachaypami cuyashunqui. Cuyacuynenga shonguyquitapis fiyupami cushicachichun.

²⁰Ïju, quiquiquipa majayquiwan alli cushisha goyaycashpayquega ¿imanir-raj majayoj warmicunawanga cacunquiman? ¿imanirtaj chay-niraj warmicunata macallarcur cuyaycunquiman?

²¹Imanölla runa cawashantapis Tayta Diosga ricaycanmi. Imanölla runa purishallantapis ricaycanmi.

²²Juchasapacunataga quiquin mana allita rurashancunallami tunichenga. Chaychica juchata aparicushanmi chariranga.

²³Tantiyacuyta mana munashanpitami tucuy mana allimanpis chayanga. Mana wiyacoj cayninwanmi wañuymanpis chayanga.