1Hein nepasad en is berengbeng te inged, wey ingkepenaud en is menge lekeb te menge pultahan kayi, mibpilì is edhimuwen he menge vantey te menge ǥemawan te valey te Nengazen, menge perekanta kayi, wey menge Levihanen.
2Imbeǥey ku is ketengdanan te kedumala te Jerusalem diyà te suled ku he si Hanani, ne iyan duma zin si Hanania he peremandar te menge vantey te melig-en he kutà. Mibpilì ku si Hanania su egkeseriǥan sikandin wey zekelà is kedtahud din te Megbevayà lavew te kezekelan.
3Migkeǥiyan ku sikandin te, “Kenè niw pesegdana he ebirtu is menge pultahan te inged ke meudtu, minsan duen ebantey he menge vantey. Kinahanglan he edsirahan heini wey egkendeduwan. Ipevantey niw is menge vantey he meǥinged te Jerusalem. Is duma kandan diyè niw ipevantey te verengbeng te inged he uvey te menge valey zan, ne is duma pa ziyè niw ipevantey te zuma pa he menge vahin duen te verengbeng.”
4Dutun he timpu, minsan meluag is Jerusalem, deisey zà is menge meǥinged duen wey menge valey.
5Ne insavuk te Megbevayè ku ziyà te isip ku he tiǥuma ku is menge pengulu, menge upisyal, wey zuma he menge meǥinged su wey sikandan mesinsus sumalà te kada pemilya. Neehè ku is listahan te nevihag he menge pemilya he nehuna he nemen-ulì. Ne iyan heini nekesurat duen:
6Mahabet he menge Israilihanen diyà te prubinsya he Juda is mibihag ni Hadì Nebucadnezar ne miduma zin diyà te Babilonia. Ne ǥuntaan mid-awe en sikandan diyà te Babilonia su mid-ulì dan diyà te Jerusalem ne is duma ziyà te keugelingen dan he menge inged diyà te Juda.
7Is nengulu kandan te kedlikù iyan si Zerubabel, si Jeshua, si Nehemias, si Azaria, si Raamia, si Nahamani, si Mordecai, si Bilshan, si Misperet, si Bigvai, si Nehum, wey si Baanah. Iyan heini lista te nevihag he menge Israilihanen piru nemen-ulì en:
8Menge kevuwazan ni Parosh; 2,172 Shefatia; 372 Ara; 652 Pahat Moab (he ebpuun te pemilya ni Jeshua wey ni Joab); 2,818 Elam; 1,254 Zatu; 845 Zacai; 760 Binui; 648 Bebai; 628 Azgad; 2,322 Adonikam; 667 Bigvai; 2,067 Adin; 655 Ater (he egngezanan daan te Hezekia); 98 Hashum; 328 Bezai; 324 Harif; 112 Gibeon; 95
26Iyan heini kahabet te menge etew he ziyà med-ubpà is menge kepuun dan te: Betlehem wey Netofa; 188 Anatot; 128 Bet Azmavet; 42 Kiriat Jearim, Kefira, wey Beerot; 743 Rama wey Geba; 621 Micmash; 122 Betel wey Ai; 123 Nebo; 52 Elam; 1,254 Harim; 320 Jerico; 345 Lod, Hadid, wey Ono; 721 Senaa; 3,930
39Iyan heini kevuwazan te menge memumuhat he nengevihag piru nemen-ulì en: Menge kevuwazan ni Jedaya (he ebpuun te pemilya ni Jeshua); 973 Imer; 1,052 Pashur; 1,247 Harim; 1,017
43Iyan heini menge kevuwazan te menge Levihanen he nengevihag piru nemen-ulì en daan: Is menge kevuwazan ni Jeshua wey ni Kadmiel (he ebpuun te pemilya ni Hodavia); 74 Is menge perekanta ziyà te valey te Nengazen he menge kevuwazan ni Asaf; 148 Is menge vantey ziyà te menge ǥemawan te valey te Nengazen he menge kevuwazan eni Shalum, Ater, Talmon, Akub, Hatita, wey Shobai; 138
46Iyan heini menge kevuwazan te menge suluǥuen diyà te valey te Nengazen he nengevihag piru nemen-ulì en: Menge kevuwazan eni Ziha, Hasufa, Tabaot, Keros, Sia, Padon, Lebana, Hagaba, Shalmai, Hanan, Gidel, Gahar, Reaya, Rezin, Nekoda, Gazam, Uza, Pasea, Besai, Meunim, Nefushesim, Bakbuk, Hakufa, Harhur, Bazlut, Mehida, Harsha, Barkos, Sisera, Tema, Nezia, wey Hatifa.
57Nemen-ulì daan puun te kegkevihaǥa kandan is menge kevuwazan te menge suluǥuen ni Solomon: Is menge kevuwazan ni Sotai, Soferet, Perida, Jaala, Darkon, Gidel, Shefatia, Hatil, Pokeret Hazebaim, wey ni Amon.
60Is kahabet dan te menge kevuwazan te menge suluǥuen diyà te valey te Nengazen wey is menge kevuwazan te menge suluǥuen ni Solomon, 392.
61Duen daan 642 he nemen-ulì diyà te Jerusalem he ebpemuun diyà te menge inged he Tel Mela, Tel Harsha, Kerub, Adon wey Imer. Heini sikandan menge kevuwazan ni Delaya, ni Tobia, wey ni Nekoda, piru kenè dan igkepaahà is puriba he menge Israilihanen sikandan.
63Kenà daan ebpekepaahà te puriba is menge kevuwazan ni Habaya, ni Hakoz, wey ni Barzilai he menge memumuhat sikandan. (Hein nekepengesawa heini si Barzilai, midhimu zin he epilidu zin is ngazan te enuǥang din he si Barzilai he tig-Gilead.)
64Tenged te netazin is listahan te menge kepuun dan, wazà sikandan dewata he menge memumuhat.
65Migkeǥiyan sikandan te gubirnedur te Juda he kenà egkehimu ke egkaan dan te menge keenen he impemuhat diyà te Megbevayà emun wazè pa memumuhat he ebpekeinsà diyà te Megbevayà mehitenged te kegkememumuhat dan pinaaǥi te dezuwa he beveraan he Urim wey Thumim he egemiten para metueni is egkesuatan te Megbevayà.
66Is langun he nemen-ulì puun te kegkevihaǥa kandan, 42,360, kenà ragkes is menge suluǥuen dan he menge maama wey menge vahi he 7,337 wey is menge perekanta he menge maama wey menge vahi he 245. Duen dan uwiten he 736 he menge kudà, 245 he mulà, 435 he kemilyu, wey 6,720 he asnu.
70Is duma he menge pengulu te menge pemilya mid-amut te para te ked-umana kebenguna te valey te Nengazen. Is gubirnedur mibeǥey te walu he kilu he menge sinsilyu he vulawan, 50 he yehung he ǥelemiten diyà te valey te Nengazen, wey bisti he 530 he lukut he para te menge memumuhat.
71Is duma he menge pengulu te menge pemilya mibeǥey zaan te para kayi he vuluhaten te 168 he kilu he menge sinsilyu he vulawan wey 1,200 he kilu he pelata.
72Is langun he imbeǥey te zuma pa he menge etew, 168 he kilu he menge sinsilyu he vulawan, 1,100 he kilu he pelata, wey bisti he 67 he lukut he para te menge memumuhat.
73Ne nemenlikù sikandan diyà te menge inged he mibpuunan te pemilya zan, ragkes en is menge memumuhat, menge Levihanen, menge vantey te menge ǥemawan te valey te Nengazen, menge perekanta, wey menge suluǥuen diyà te valey te Nengazen.
