1Motec‐mae, no dâŋ gaza qazuc ekopac i manazemec, ehuc wiac i me i ecmurâ gazape mi nikecguzejec.
2Go maŋɋârâŋ dâŋte hazec râezemec, ehuc mana taracmurâ esâickehuc giene bazemec.
3Erâ mamana saric â maŋzi wiac mamana tara fua‐gareocte nunumu gie bazemec.
4Go siliwa moneŋ me boreŋ ʒeŋaŋ duckekicne bâfuacmurâ babasa gie banʒaŋ, irec sâc jaha giene batec mamana fua‐garezejec.
5Iŋuc ecmuo ine Wofuŋ araŋ babacne irec fuŋne mecne, â Anuture fuŋne i mâmâc mana taracmu.
6Maŋɋârâŋ i Wofuŋzi tahac‐nâpoekac, erâ mamana saric â mamana tara i eraonec jaha ware‐nâreekac.
7Eki hâcne ŋic tiŋne â siocmâc bafic‐jopaekac â ŋezic‐jopaekac.
8Ehuc, ŋic âgofâc‐jeŋic bafic‐jopahuc dâŋjeŋic mutiŋne‐jareeŋgopieŋ ŋic i jaŋe sapec‐jopaekac, â e jahacnao qohotahuc jueŋgopieŋ jaŋe hone soŋaŋ ejareekac.
9Go maŋɋârâŋ dâŋ manacmuo ine wiac biaŋne â tiŋnere hata hone taracmu, ehuc irec sâcko ebac ehuc jucmu.
10Erâ go maŋɋârâŋhec jaha jutecne mamanagezi bubiaŋ bâfua‐gareocmu.
11Mamana saric â maŋzi wiac mamana tara izi ŋezicguocmu,
12ehuc wiac hehesicne ezicte aka hegareocmu. Ehame ŋic dâŋ kosa muhuc bâbâsifuc bâfuaeŋgopieŋ jaŋerao ra qohotazicte hata hebâzicke‐gareocmu.
13Ŋic iŋucne jaŋe dapâcte hatao juniŋte tiŋne jujure hata râpeckeeŋgopieŋ,
14erâ wiac hehesicne ehuc bubiaŋ manaeŋgopieŋ, â wiac sindaŋnere aŋac bajueŋgopieŋ.
15Jaŋe hata‐jeŋic keke poricne â hatagâŋ‐jeŋic i bac bâŋoricne.
16Go maŋɋârâŋhec jucmuo ine ŋokac sâqocnezi dâŋ wokemaŋzi wiac ehuc esâicgume sâcne sanaŋkerâ dâŋticne hetapâickecmu.
17Ŋokac iŋucnezi ŋowe‐ticne maŋzi beheekac, ehuc mumupaŋ dâŋticnere wâc nikeckeekac.
18Go ŋokac ere ficko moc racmuo ine hâmoc haere hatao racmu hâcne. Manakic, ere ficko rara izi hâmockicne jaŋere mâreŋko rara irec sâc ekac.
19Ŋic moczi ŋokac e iqickeocmuo ine mocwâc mi risieocmu, ehuc juju hata mocwâc mi bâfuaocmu.
20Irec go ŋic biaŋne jaŋere itiroc bâjâpehuc tiŋne juzemec.
21Ŋic tiŋne â bahacmâc jaŋe hâcne mâreŋko dameŋ ʒora jufeniŋmu.
22Ŋic sindaŋne jaŋe ine Anutuzi hofâ qinʒiŋ iŋucne mâreŋkonec unuc‐jopahuc bâsirowec‐jopaocmu hâcne.
