Ekistos 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹“Iwe, are eman aramas a soläi eman kow ika eman sip o niela ika amömöla, ätewe epwe liwini limman kow fän iten eman, pwal föman sip fän iten eman. Ewe chon solä epwe aliwinisefäli liwinin mine a soläni fiti liwinin an tipis. Nge are esap wor och ren, repwe amömöla ewe mwän.

²Are eman a liapeni eman chon solä lepwin o wichi, nge a mäla, esap wor liwinin tipisin nimanau ngeni.

³Are eman a niela eman chon solä lupwen a ränila, epwe wor liwinin tipisin nimanau ngeni.

⁴Are ewe man a chüen nom ren ewe chon solä o manau, ese lifilifil ika eman kow, ika eman aas, ika eman sip, epwe liwini ruoman man fän iten eman.

⁵Are eman aramas a amongöü ngeni nöün man fetilin eu mälämäl ika fetilin eu tanipin wain, nge a mwüt ngeni nöün man pwe repwe pwal eni fetilin än eman tanipi, ätewe epwe liwini ngeni ua mi mürina seni püsin an mälämäl ika an tanipin wain.

⁶Nge are a wor eu kar mi küri iräfölüföl, pwe a ngeteri irän wiich mi pilük, ika irän wiich resamwo pöküpök, ika unusen eu tanipin wiich, ätewe mi popuetä ewe kar epwe liwinisefäli meinisin mine a karala.

⁷Are eman a ngeni chon arun nöün moni ika pisekin pwe epwe iseis, nge eman a soläi, iwe, are a pwä ewe chon solä, epwe aliwini fän ruu mine a soläni.

⁸Nge are ewe chon solä esap pwä, ätewe mi iseis ewe pisek lon imwan epwe feito lon imwenfel o pwärätä pwe esap angei pisekin ewe aramas.

⁹Are eman aramas a silleni mettochun ren eman o apasa pwe an, ese lifilifil ika eman kow ika eman aas, eman sip ika üf, ika och mettoch a pöüt seni, ekewe ruoman repwe feito lon imwenfel. Nge ewe eman, Kot a atipisi, epwe liwini ngeni chon arun fän ruu.

¹⁰Are eman a ngeni chon arun nöün aas ika nöün kow ika nöün sip ika sokun man pwe epwe tütümwünüetiu, iwe, are ewe man a mäla, ika feiengau, ika eman a süla fan, nge esap wor eman a küna,

¹¹ewe chon tümwünü ewe man epwe feila lon imwenfel o eäni eu akapel pwe esap angei nöün chon arun man. Iwe, ewe mine nöün ewe man epwe lükü ewe akapel, nge ewe mi tümwünü ewe man esap mönätiu liwinin.

¹²Nge are eman a soläni ewe man seni ewe chon tümwünü, ewe chon tümwünü epwe mönätiu liwinin ewe man ngeni mine nöün.

¹³Are eman manmwacho a ni ewe man, ewe chon tümwünü epwe uwato ewe man pwe an pisekin pwärätä, nge esap liwini mine a mäla ren manmwacho.

¹⁴Are eman a tüngor eman man seni chon arun, nge ewe man a feiengau ika mäla, lupwen ewe mine nöün ese nom, ätewe mi tüngor epwe wisen mönätiu liwinin ewe man.

¹⁵Nge are ewe mine nöün a nom, ätewe mi tüngor esap wisen mönätiu liwinin. Iwe, are eman a satani eman man, nge a feiengau, ewe sata a iwe chök liwinin.”

¹⁶“Are eman mwän a atupu eman föpwül esamwo tori mwän, esap pwal kofot, nge a kon ren, epwe ngeni kisan o pwülüeni.

¹⁷Nge are semen ewe föpwül esap fokun tipeeu ngeni an epwe pwülüeni, ewe chon atuputup epwe mönätiu ükükün ewe kis a fis lupwen apwüpwülüen eman föpwül esamwo tori mwän.

¹⁸Oupwe niela ekewe sourong fefin meinisin.

¹⁹Eman mi kon ren eman man epwe ninnila.

²⁰Eman mi asor ngeni eman kot lüki ngang ewe Samol mi Lapalap, ätewe epwe fokun ninnila.

²¹Ousap föri och mi mwäl ngeni wasöla ika ariaföüür, pun oua fen piin wasöla lon ewe fanü Isip.

²²Ousap ariaföüü ekewe fefin mi mä pwülüer ika ekewe mi mäsen.

²³Pun are oua ariaföüür, nge ir repwe siö ngeniei, üpwe fokun aüselinga ar siö.

²⁴Üpwe fokun song ngenikemi o nikemi lon maun pwe pwülüemi repwe lipichsefäl, nge nöümi repwe mäsen.

²⁵Iwe, are ka mwüt ngeni eman moni me lein nei aramas mi mwelele pwe epwe paroni, kosap usun eman mi awattela winnen nöün moni. Kosap fokun angei seni winnan.

²⁶Are ka angei üfen eman chon arum pwe asisilen an liwinimang ngonuk, kopwe fokun aliwini ngeni mwen akkar esamwo tuputiu.

²⁷Pun ina chök üfan a pwölü ngeni inisin. Met chök epwe chenikameni le annut? Nge are epwe siö ngeniei, üpwe rongorong, pun üa eäni tong.

²⁸Kosap turunufasei Kot, kosap pwal otteki samolun aramasom.

²⁹Kosap amanga le uwato rei mwen uän kiniom wiich, pwal mwen ungutiom wain. Iwe, kopwe ngeniei noum mwänichi.

³⁰Kopwe pwal ngeniei mweinöün noum kow me noum sip. Ewe apanan epwe nom ren inan lon ükükün fisu rän, nge lon awaluen rän kopwe uwato rei.

³¹Iwe, ämi oupwe aramas mi pin fän itei. Iei mine ousap ochoch fituken man mi mäla ren manmwacho, nge oupwe aochocha ngeni kolak kana.”