Mphattuwelo 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Cinavinrene nnya citthu nnya, nuulumo na Mwaneene Nluku nahowa waAparamu munttorani: Uhoove, Aparamu! Mi phi mi, mwaakihi aa. Itthuvo aa inhala ukhala yuulupale.

²Nanso Aparamu ahokoha: Pwiya Nluku, unhala ukivahani, kamana nanlelo akirina mwana ni nohala uhalana cirinaka phi Eliyeseri o Tamasiku?

³Ni ahoncerera tho eeraka: We khukivahile mena mwana! Karumeya aka phinhala ukhala nkalanupa aka.

⁴Vano Mwaneene Nluku ahomwaakhula eeraka: Nkalanupa aa khanhala ukhala uyo. Mwana oonyara yo weva phinhala wuuranttela.

⁵Ankumiheraka vate inupa, ahomwiirela: Uwehe wirimu ni waalikele itthoottwa, wooryaka waalikela. Ni ahopwaherera eeraka: Nloko naa nno phinhalaya ukhala toko nnya itthoottwa nnya.

⁶Aparamu ahonkupali Mwaneene Nluku ni yeeyo yahopankiya ukhala ikhweeli aya.

⁷Ahomwiirela nanlelo: Mi Mwaneene Nluku kuukumihile Ur yo Kasiti wiira kuvahe ila ilapo ela ukhala yawaa.

⁸Aparamu ahonkoha eeraka: Pwiya Nluku, kinhala ucuwela cani wiira khweeli kimmopattha?

⁹Ule ahomwaakhula: Ukiwiihere mwamope, ipuri ni ikhontwaa, cothene cokhalana myakha miraru cookumi ni ciicammo nciiya nimoca ni ikhuntta imoca.

¹⁰Aparamu ahowiha cothene cenye inama nnye, ahottupula iriyariru ni aheekathi khula mphantte uhoolo wa nkhwaya, nanso asanuni ayo khattupulanihile.

¹¹Vano inaka cahopacera ukhuruwela vanamani vale, nanso Aparamu anhakha.

¹²Wakelaya ncuwa, Aparamu cahomola ikhove cuulupale ni yahommwela ipiphi yiinci.

¹³Vano Apwiya yahomwiirela: Ucuwele wiira uneethi aa unkokhala ilapo ihiri yawaya, inkelaya upankiye ipottha ni uhuvihiya myakha iminya cese.

¹⁴Nanso mi kimmottarusa ilapo inhala wupankani ipottha ni wahoolo mumokhuma ni mihakhu cinci.

¹⁵Nanso we unaahala urwaa ni mpuha waanhakhalayi aa ni unhala uvithiya unooluvanle cinenne.

¹⁶Nloko noneecese, uneethi aa unaturuwela va kontha utakhali wa Amorewu khunaya uphiya nlipa naya.

¹⁷Wahoolo ncuwa ninakenlene ni iwaaka ipiphi, yahoonnya niikho yotthuwa mwiisi ni nthuko woopharela wahovira nnamani coottupulanihaciya nye.

¹⁸Nenne nihuku nne Mwaneene Nluku aholeehana ni Aparamu. Uneethi aa kihovaha ilapo ela ukhuma mooloko wo Wiciipitu mpaka mooloko muulupale uneehaninya Ufarati,

¹⁹ilapo yo maKenii, yo maKenesii, yo maKetimonii;

²⁰yo maHitita, yo maFeresii; yo maRefayinii,

²¹ya Amorewu, yo maKanaa, yo maKirkasii ni yo maYepusii.