1Yakopi Wacuwenlyawe wiira ihawo itiriku Wiciipitu, aheerela asaanawe: Isiyani umakelaka uwehanaca paahi?
2Aheera tho: Kiheewa yiiriyaka ihaawo itiriku Wiciipitu. Nrwee wonwo mwanithumele itiriku wiira nipwaherere ukumi ni nihikhwe itala.
3Toko coo, asunnawe khumi a Yusufu yahorwaaca Wiciipitu uthuma itiriku.
4Yakopi khantthunihile Pencamii, nhimaawe Yusufu, wiira aatthukane ikwaha, kontha aanawoova unkhumelela itthu yoonanara.
5Asaana a Isirayeli yaari na atthu akina yarwaca uthuma itiriku, nlattu wotala yavonnle uKanaa.
6Yusufu aari nlamuli olapo yo Wiciipitu ni yooyo phaatumihera itiriku atthu othene. Phimaana uphiya waya asunnawe Yusufu yahomuramela mpaka uphiya vathi.
7Woona wawe, Yusufu ahaacuwelela asunnawe, nanso aakhanle toko khaacuwenle ni ahoopopiha eeraka: Nyu nnokhumakhuma vayi? Yahaakhulaca: Ninkhuma ilapo yo Kanaa naawile uthuma yoolya.
8Yusufu ahaacuwela asunnawe, nanso ayo khayancuwelacile.
9Vano ahoopuwela ittora calohilyawe nari na asunnawe ni aheerela: Nyu nri mayoohottela! Mwawile uhottelaca ilapo ehu ila wiira ncuwele nipuro nookhwyaa.
10Ale yahaakhulaca: Mena, nkunya. Asaanenyu yawile uthuma yoolya.
11Hi othene, athumwanihu ari amoca. Asaanaa ari atthu omaana, khaanakhala oohottela.
12Nanso Yusufu ahaakhanyereriha eeraka: Mena! Nyu mwile uhottela wiira moonenele nipuro nookhwyaa ilapo ehu ila.
13Ni ale yaheeraca: Asaanaa yaari khumi neeli, othene athumwanaya ari amoca ilapo yo Kanaa. Itthyaako eyo ihanle uwaani na athumwanaya ni nkina uyo hokhwa.
14Yusufu ahaakulela eeraka: Phi vaava kihimilyaaka va. Nyu nri mayoohottela.
15Nyu nnaahala ulawihiya. Kinalupela mwancina na Farawoo, nyu mu khannokhuma, mwahimmwaneke uno mwanhimenyu eetthyako uyo.
16Munrume mmoca anrweele mwanhimenyu uyo vano akina vaa nhotthukiya. Commo phinhaleehu ucuwela wiira cinhimyenyu nnyo ciri citthu ceekhweeli atthuna cowoothiya. Cahikhaleke ceekhweeli, kinalupela mwancina na Farawoo wiira wanaahala ucuwanyaa wiira nyu khweeli nri atthu oohottela!
17Ni ahaatthukela nkalapooso mahuku mararu.
18Nihuku noneeraru Yusufu aheerelaca: Mi kinamoova Nluku. Mwapheela woopwaa, mpanke coo:
19Mwakhala wiira nyu atthu omaana, munhiye munniinyu mmoca nkalapooso mu. Vano akina vaa nturuwaceke nuukusaka itiriku wiira mwalye uwaani.
20Nkiwiihere vaa nhimeenyu eetthyako uyo wiira acuwannyee moolumo enyu yakhala wiira eekhweeli ni nyu phinhaleenyu uhikhwa.
21Ayo yahotthuna upanka yahiminye eyo ni yaheerelana: Khweeli va ninattarusiya mwanlattu weetthu impankileehu nhimeehu uyo. Naammoonaka caacukula awe, ni waanisonttelelawe vaa, wiira ninhiye nkumi, nanso khanaantthunenle. Phimaana uniphwanyaka uno utapana uno.
22Ruupeni ahaakhula: Akoohimenryeni wiira nhinhuvihe mmirawo uyo, nanso nyu khamwatthunne ukiiwa! Vano ninlamuliya waakhulela iphome awe eyo.
23Nanso ale khayaacuwela wiira Yusufu naweewa, kontha oolumana ni ntthu aataphulela ni nuulumo naya.
24Vaavale Yusufu ahothama ni wunla. Vano ahohokoleela tho ni ahoolumaca wiira atthukiye Simeyoni, othene amoonacaka.
25Wahoolo Yusufu aholamula wiira icarihiye itiriku mmirupani mwaya mmo ni ituruseliye ipheeta yo khula ntthu munrupani mwawe, ni avahiye iphika coovira alyaaka. Ni commo wahopankiya.
26Ale yahopakhira mirintti caya co tiriku mwa apuuru aya nuukhumaca.
27Nipuro naamakilyaya nlattu wo wiileliya, mmoca uyo ahotthukula nrupa awe wiira ankumihe nankanka oonliha puuru awe, ni ahoona ipheeta umalakuni wonrupa awe.
28Ni aheerela asunnawe: Kihoturuseliya ipheeta aka eyo. Ila mu munrupani mwaka mu. Yoovaka wanrimani waya ni attettemelaka yaheerelana: Isiyani ila Nluku inipankilyawe ela?
29Waaphilyaya wathumwanaya, ilapo yo Kanaa, yahohimyaca cothene caakhumelenle, yiiraka:
30Nlopwana mwaneene ilapo eyo honuulumacera ni honihela ukhala hi atthu oohottela.
31Nanso hi nihonroromeliha wiira khanihiwena atthu oohottela niri atthu eekhweeli.
32Niheera tho wiira naari asaana khuumi neeli athumwanihu ari amoca ni mwana mmoca uyo hokhwa, ni eethyako uyo ri na athumwanihu uKanaa.
33Vano nlopwana mwaneene ilapo eyo honiirela: Nrwee noone mwakhala atthu eekhweeli: Nhimeenyu mmoca nolamuliya uhala vaava ni mi. Akina ayo aturuweke ni akuseke yoolya yalyeke uwaani na akhwaya.
34Nanso mwakiwiihere nhimenyu eetthyako uyo phinhalaaka ukupali mi wiira nyu atthu omaana ni khannakhala mayoohottela. Vano phinhalaka wuhokoloserani munninyu uyo ni wutthuniherani upanka marontta ila ilapo ela.
35Weetthiyaaya mirintti nnyo, wo khula nrintti wahophwanyinya nhukho woocara ipheeta. Yakopi na asaanawe woonnyaya mihukho nnye, yahoovaca.
36Ni Yakopi aheerelaca: Nyu nnakimalihera asaanaka ayo! Kihanle wohi Yusufu, nnavaa kiri wohi Simeyoni, ninlelo nna nnopheela unkusa Pencamii? Cothene cinkikhuma mi!
37Vano Rupeni aheerela athumwane: Kahinturuwaneke Pencamii uyo, mweevakace asaanaka oyeeli khaweetthu. Nkihiyere Pencamii uyo, thi mi kinhala unwacawaca.
38Nanso athumwane yahaakhula: Mwanaka uyo khannonkusa. Munnawe hokhwa. Uyo nna phihanle. Itthu phi itthu yoonanara inhala unkhumelela eyo munkwahani mmo, vano phinhalenyu uvitha ipwi caka nnyo mmahiye kinari ni icuku.
