Mphattuwelo 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Mwiilaponi mothene nariwo paahi nuulumo nimoca ni moolumeliyo mamoca.

²Vano atthu akhumaka mphantte unkhuma ncuwa, yahophwanyaca nikuwa uSinari ni vaavale yahokhalaca.

³Yaheerelana ayaayoru coo: Nrwee nuupe incirwa ni nipaheehe sana sana. Yatthuminri incirwa nnyo nipuro no maluku, ni alikatarawu nipuro no mattope.

⁴Wahoolo yaheerelana tho: Nrwee niteke iparasa ni inupa yoorekama yoophiya wirimu. Commo ncina nihu ninkoruma ni khaninhala umwaruseliya mwiilaponi.

⁵Vano Mwaneene Nluku ahokhuruwa wiira oone iparasa ile ni inupa yatekaya atthu ale.

⁶Ni Mwaneene Nluku aheera coo: Nkoonani, atthu ala ari nloko nimoca paahi, anoolumaca nuulumo nimoca paahi, ni ahopacera nteko ule. Woohipica khiiwo inhala waahiha uvara yuupuwenlyaya.

⁷Nrwee, nikhuruwe ni naavirikanihe nuulumo naya, wiira ahiiwanane ntthu ni nkhwawe.

⁸Vaavale, Mwaneene Nluku ahaamwarusela atthu ale ilapo yothene, ni yahohiyaca uteka iparasa ile.

⁹Phimaana waheehaninya uPapeli, kontha vaavale Mwaneene Nluku ahovirikaniha moolumelo ottuniya yothene. Ukhuma vaavale Mwaneene Nluku ahaamwaruselaca atthu ale mwiilaponi mothene.

¹⁰Ala phi mayaranacelo o nloko na Seemu: Uvira wawe naphuvu mwiilaponi, cahovira myakha miili, ni Seemu ahopiihera myakha iminya (100) ceyarelo ni ahonnyara Arifacate.

¹¹Nannyanreene Arifacate, Seemu ahokhala nkumi mpaka myakha iminya thanu (500) ceyarelo ni ahaayara asaana akina asilopwana na asithiyana.

¹²Arifacate wapiihenryawe myakha talathini nuwa mithanu (35) ceyarelo, ahonnyara Selah.

¹³Nannyareene Selah, Arifacate ahokhala nkumi mpaka myakha iminya cese nuwa miraru (403) ceyarelo ni ahaayara asaana akina, asilopwana na asithiyana.

¹⁴Upiihera wawe myakha talathini (30) ceyarelo, Selah ahonnyara Heperi.

¹⁵Nannyareene Heperi, Salah ahokhala nkumi myakha iminya cese nuwa miraru (403) ceyarelo ni ahaayara asaana akina, asilopwana na asithiyana.

¹⁶Upiihera wawe Heperi myakha talathini nuwa micese (34) ceyarelo, ahonnyara Peleki.

¹⁷Heperi unyara wawe Peleki, ahokhala nkumi mpaka myakha iminya cese nuwa talathini (430) ceyarelo ni ahaayara asaana akina, asilopwana na asithiyana.

¹⁸Peleki upiihera wawe myakha talathini (30), ahonnyara Rewu.

¹⁹Peleeki unnyara wawe Rewu, ahokhala nkumi mpaka myakha iminya piili na khenta (209) ni ahaayaraca asaana akina, asilopwana na asithiyana.

²⁰Rewu upiihera wawe myakha talathini na miili (32) ceyarelo, ahonnyara Sirukwe.

²¹Rewu ahokhala nkumi mpaka myakha iminya piili na saapa (207) ni ahaayaraca asaana akina, asilopwana na asithiyana.

²²Sirukwe upiihera wawe myakha talathini (30) ceyarelo, ahonnyara Nahori.

²³Sirukwe nannyareene Nahori, ahokhala nkumi mpaka myakha iminya piili (200) ceyarelo ni ahaayaraca asaana akina, asilopwana na asithiyana.

²⁴Nahori upiihera wawe myakha sirini na khenta (29) ceyarelo, ahonnyara Tera.

²⁵Unyara wawe Tera, Nahori ahokhala nkumi mpaka myakha iminya imoca nuwa khumi na khenta (119) ceyarelo ni ahaayaraca asaana akina, asilopwana na asithiyana.

²⁶Tera upiihera wawe myakha sapini (70) ceyarelo, ahonnyara Aparamu, Nahori ni Harani.

²⁷Ala phi mayaranacelo o nloko na Tera: Tera ahonnyara Aparamu, Nahori ni Harani; ni Harani ahonnyara Loti.

²⁸Harani akhwenle uUri yo Kasiti wayareenlyawe, ukati waryaya athumwane akumi.

²⁹Aparamu ni Nahori yahaathelaca asaaraya. Ncina na amwaarawe Aparamu naari Sarayi, ni ncina na amwaarawe Nahori naari Milika; ula aari mwana a Harani, athumwane Milika ni Isikaa.

³⁰Vano Sarayi aari oohiyara, khaarina asaana.

³¹Tera ahonkusa Aparamu mwanawe, wamoca ni Loti mwanculawe, mwana a Harani, ni Sarayi mwaara a mwanawe ni othene yahorwaa ikwaha yookhuma uUri yo Kasiti arwaaka uKanaa. Nanso uphiyaca waya yahokhalaca wonwo.

³²Tera ahokhala nkumi mpaka myakha iminya piili na thanu (205) ceyarelo ni ahokhwela uHarani.