1Commo, cahomala upankiya irimu ni itthaya ni citthu cothene ciriwo.
2Nluku namalihilene uvara miteko cothene carinawe, nihuku noonasaapa ahomumula.
3Nluku ahoreeriha nihuku nonasaapa ni ahottakattifiha, kontha nenno nihuku nno ahomumulela miteko cothene cavanryawe waapattusawe ilapo.
4Nnya phicookhumelela cinttonka cinryaya woopattusiya irimu ni itthaya, ukati Apwiya Nluku waapattusilyaya itthaya ni irimu.
5Naari nihinamela niphumpulu, ni hata mwiri mmoca mwiilaponi, kontha Apwiya Nluku yaari ahinawaana ipula ilapo yothene yo vathi, ni ciicammo khaariwo ntthu oolima itthaya iyo.
6Maasi yanacekuwa vathi phimiceraka ilapo yothene.
7Vano Apwiya Nluku yahomuumpa ntthu ni ntthupi notthaya ni yahommucelela mphulani iphumu cookumi, ni ntthu ule ahothatuwa nkumi.
8Vaavale, Apwiya Nluku yahopanka iluwani yo Eeteni yaari mphantte unkela ncuwa, ni yahomweesa ntthu yampankilyaya.
9Wahoolo, Apwiya Nluku yahomeliha itthaya yothene miri co khula nnanna, cooreera wa miithoni ni coociva ulya. Ni wariyari iluwani wahaawo mwiri wookumi ni mwiri nkina uncuweliha yooreera ni yoonanara.
10UEeteni wahophattuwa mooloko waamicera iluwani. Ni uhoolo nwo wahekawanihaca nuukhala myoloko micese.
11Mooloko woopacera uyo uneehaninya Pisomi. Uvinre ilapo yothene yo Havila, uri iwooru.
12Iwooru yo yeeyo ilapo iyo iri yooreera; ciicammo, wonwo haawo lumpani ni maluku ocaayira.
13Wonayeeli uvinre ilapo yothene yo Kuusi uneehaninya Kihoni.
14Woneeraru uvinre mphantte unkhuma ncuwa weemelaka ilapo yo Usiiriya, uneehaninya Tikire; ni woneecese uneehaninya Ufarati.
15Apwiya Nluku yahomweesa ntthu iluwani yo Eeteni wiira awehawehe ni alime.
16Vano Apwiya Nluku yahonlamulela ntthu yiiraka: Ulyeeke wootthunawaa mihokorokho cothene ciri nluwani mmo,
17nanso uhilye nhokorokho wo mwiri uncuweliha yooreera ni yoonanara, kontha nihuku ninhalaa ulya, khweeli unaakhwa.
18Wahoolo, Apwiya Nluku yahoolumaca yiiraka, khawanreera nlopwana ukhala veekha. Kinaampankela oonkavihera wiira amwiiwanane.
19Vano noompileene itthaya ni inama cothene co ntakhwani, ni asaanuni othene ooculu, Apwiya Nluku yahomwiihera nlopwana ule, wiira amoone caahalawe wiihana, ni wo khula ncina nivahilyawe nlopwana, khula itthu yoomumula, nenno phiri ncina naya.
20Phimaana nlopwana ule hovaha macina mihuwo cothene, asaanuni ooculu ni inama cothene contakhwani. Nanso Attamu khaaphwannye oonkavihera wiira amwiiwanane.
21Vano Apwiya Nluku yahonvaha ikhove cinci nlopwana ule, ni waarupawe vaa yahonkumiha niparari nimoca nuuttiya nenno nipuro nno ni ithayi.
22Niparari nakumihiyawe nlopwana ule, Apwiya Nluku yahompanka nthiyana nunrwehela nlopwana.
23Vano nlopwana aheera: Khweeli nna nikhuva no makhuva aka ni ithayi yothayi aka! Ula nohala wiihaninya nthiyana, kontha khumile mwa nlopwana.
24Phimaana nlopwana haana aahiyaka athumwane ni anumwane aluttaanaka na amwaarawe, ni oyeeli ankhala irutthu imoca.
25Nlopwana na amwaarawe yaakhalaca woohiwara nanso khayoonelana ihaaya.
