1Ukati wooluvanlyawe Isaki wiitho wawe wahonripela ni khoona. Vano ahomwiihana mwanawe omuulupale eehaniya Isawu, eeraka: Mwanaka. Ni ule ahomwaakhula eeraka: Kiri va.
2Ule ahomwiirela: Mi kihooluvala ni akincuwela nihuku ninkhwaka.
3Nna va, ukuse myuupa, muura ni nivaka naa nno, urwee utakhwani wakaaverye inama.
4Vano waakaapyele sankanya ookicivela ni ukiwiihere kaanlye wiira kuuvahe iparakha kihinakhwa.
5Ukati woolumacawe Isaki anhimeryaka mwanawe Isawu, moolumo ale Repeka eera eewaka. Vano Isawu ahorwaa utakhwani wiiva inama wiira aawiihere athumwane.
6Phimaana Repeka ahonhimerya mwanawe eehaninya Yakopi eeraka: Kiheewa athumwana ayo amwiirelaka munnaa Isawu:
7Wakilupatthele inama ni wakaapyeele sankanya oociva wiira kinlye ni kuuvahe iparakha wamiithoni wa Mwaneene Nluku kihinakhwa.
8Nna vaa mwanaka, uviriyane inoohimeryaka ila.
9Urwee muncicini mmo wakuse ipuri piili. Mi kinnowaapyela sankanya oociva toko athumwana cinaacivelaya,
10ni waarwehele athumwana yanlye wiira yuvahe iparakha ahinakhwa.
11Nanso Yakopi aheerela anumwane: Kinawoona amunna Isawu irutthu aya iyo iri yo mapururu. Mi kiri oohimapururu.
12Pooti apaapa ayo ankokapaapela ni wamiithoni waya kinkokhala mayowootha. Commo kinawiiwaanela mahusi woohikhala iparakha.
13Anumwane yahomwiirela: Mwanaka, nihusi naa nno ninhala ukhala nawaka. Wiiwelele paahi nuulumo naka. Urwele ni ukiwaanele.
14Vano ule ahorwela ni waawiihera anumwane, ni ale yahomwaapyela sankanya oociva, toko athumwane caacivelaya.
15Wahoolo, Repeka ahokusa coowara comaana ca Isawu, mwana omuulupale, carinawe uwaani ni ahommwariha Yakopi, mwana omwankani.
16Vano ahommwariha nrapala nopuri nsiko ni mmatatani,
17ni ahonvaha mmatatani mwa Yakopi, mwana omwankani, sankanya oociva ni nkatthe watthenkacilyawe.
18Vano Yakopi ahorwaa woolumana athumwane ni aheerela: Paapa! Athumwane yahomwaakhula yiiraka: Kiri va. We tupani mwanaka?
19Yakopi ahaakhula athumwane eeraka: Mi Isawu mwaninyu oontthaara. Kihopanka toko caakirenlenyu. Vano, munkome ni nlye ilupatthilyaka wiira nkireerihe.
20Isaki ahonkoha mwanawe eeraka: Weeraceele cani wakuvaka ulupattha? Ule ahaakhula: Mwaneene Nluku, Nluku inyu ahokaakuvyehera umphwanya mwannama.
21Vaavale Isaki ahomwiirela Yakopi: Mwanaka, ukaattamerye wiira kiwaapaapele ni kuucuwelele wakhala wiira we khweeli mwanaka Isawu.
22Yakopi ahaattamerya athumwane ni ale yahomwapapela ni yaheera: Ncu nno na Yakopi nanso myoono nnyo ca Isawu.
23Isaki khaancuwelenle Yakopi kontha myoono cawe caari co mapururu toko ca Isawu munnaawe, phimaana ahonreeriha.
24Wahoolo Isaki ahonkoha tho eeraka: We khweeli mwanaka Isawu? Ni ule ahaakhula eeraka: Phi yeemi.
25Vaavale Isaki ahomwiirela: Mwanaka, ukiwiihere ilupatthilyaa eyo wiira kilye ni kuureerihe. Yakopi ahaawiihera ni athumwane yaholya, ni ciicammo ahaawiihera ivinyu ni ale yahowurya.
26Vano Isaki ahomwiirela Yakopi: Nkaawe woono mwanaka ni ukivahe alaahuma.
27Ule ahaattamerya ni ahaavaha alaahuma. Ukati wonnyawe ikuwo cawe nnyo nhiriri wonama, Isaki ahonreeriha eeraka: Nhiriri wa mwanaka uri toko inukhelelo yotakhwa ireerihilyawe Mwaneene Nluku.
28Nluku oovahe ukame wo wirimu, uruwerye vathi va, itiriku yinci ni malaaso menci.
29Wiira atthu othene waarume, ni ilapo cuulemelihe, ni ukhale nkunya a asihimaa, na asaana a anumwane yuulemelihe we, natakhaliya ule nohala wuulapha, ni nareeriya ule nohala wureeriha.
30Isaki umaliha wawe unreeriha Yakopi ni nakhumileene wamiithoni wa athumwane, phawawe Isawu akhumaka wulupatthani.
31Ni ule ahomwaapya sankanya oociva ni ahaawiihera athumwane ni aheerela: Paapa, munnwe ni nkhuureke inama ilupatthilyaka wiira nkireerihe.
32Vano athumwane yahonkoha yiiraka: We tupani? Ule ahaakhula: Mi Isawu, mwaninyu oontthara.
33Vaavale Isaki ahothukumela venci cinenne ni aheera: Tupani ule kiwiihenre inama yoolupatthiya? Mi kihokhuura yothene we uhinaya uwa. Yooyo ntthu uyo, mi kihonvaha iparakha ni ciicammo nakhala ooreerihiya.
34Vano Isawu weewilyawe moolumo athumwane ale, ahothulana ni unlaka ahokhuwa wowirunya eerelaka athumwane: Nkireerihe ni mi, paapa.
35Isaki ahomwaakhula phimwiirelaka: Mwanhimaa ahowa va mmirukuni, ni hokusa iparakha caa nnyo.
36Vaavale Isawu ahopwaherera eeraka: Khweeli ule uhomphwanela wavahiyawe ncina na Yakopi, kontha imaara piili nnya akithepyaka. Woopacera hokaakha iyuulupale aka, nna va hokaakha iparakha caka. Vano Isawu aheera tho: Khankihalihenre tho mi iparakha?
37Vano Isaki ahomwaakhula Isawu eeraka: Kinawoona kihompanka ukhala owulamula we, ni asunnaa ayo othene kihonvaha ukhala ananrumiya awe; mpaka itiriku ni malaaso kihomuncerera. Vano we mwanaka kiwiiriheke cani?
38Vano Isawu aheerela athumwane: Nrina iparakha imoca paahi? Paapa, nkireerihe ni mi ciicammo. Vaavale Isawu ahokhuwa ni wunla.
39Vano Isaki, athumwane, yahomwaakhula yiiraka: We unkookhala uttayi ni mapuro oocayira ni oohikhuruwa ukame.
40Malelyo aa ankokhala okhotto, ni unhala ukhala nanrumiya a nhimaa. Nanso we wooryaka wiicopola phinhalaa urula nipisi niri nsiko mwaa mmo.
41Vano Isawu ahoncukula Yakopi mwanlattu womwakha iparakha yavahiyawe na athumwane. Phimaana ahoopuwela wanrimani wawe eeraka: Anaphiya mahuku ookhwa apaapa. Kimwomwiiva nhimaka Yakopi.
42Vano Repeka ahohimerya yalakenlyawe Isawu, mwana omuulupale, ahomwiihana Yakopi mwanawe omwankani, phimwiirelaka: Munnaa Isawu neepisiha nrima ni hoolakela uwiiva.
43Nna vaa, mwanaka, wiiwe inhalaka wuuhimerya: Wunwe ni urwee wamwanrokoraka Lapanu, ilapo yo Harani,
44wakhale wonwo mahuku vakani, mpaka uvire uviruwa wa munnaa,
45mpaka uvire urusiya wa munnaa, ni aliyale itthu impankilyaa. Mi kinaahala uleehera ni wuhokolosiha. Isiyani inhalaka wuhalelacerani oyeeli nihuku nimoca?
46Phimaana Repeka ahomwiirela Isaki coo: Ahokitosa asaana a Heeti, kontha Yakopi aathelaka athiyana o yeela ilapo ela, mi phatari kikhwe.
