1Aparahamu ahonthela nthiyana nkina, eehaninya Ketura.
2Ketura ahonnyarana Aparahamu ala asaana ala: Sinra, Yookisa, Meeta, Miitiya, Isipaki, ni Suwaa.
3Yookisa ahonnyara Sapaa ni Tetaa. Ucuulu wa Tetaa waari Asurita, Letusi ni Lewuma.
4Asaanawe Miitiya yari Efa, Eferi, Enoki, Apita ni Elita. Othene ale yaari ucuulu wa Ketura.
5Aparahamu ahonhiyera Isaki mihakhu cawe cothene.
6Nanso asaana a Aparahamu yayanryawe na asaarawe oohitteeliheraninya, aavahacile itthuvo vakani; nari nkumi, ahamwalaaniha ni mwanawe Isaki nuwarweha uttayi, ilapo iri mphantte unkhuma ncuwa.
7Aparahamu ahokhalana ukumi mpaka ahopiiha myakha iminya wo sapini na thanu (175) ceyarelo.
8Aakhwile noluvaleehile ni myakha cinci ceyarelo ni ahaatthara mayathumwane.
9Nanso, asaana a Aparahamu, Isaki ni Sumayili, yahaavithaca athumwanaya nnikhukuni no Makipela, vakhiviru ni uManree, nthala na Eforomi, mwana a Suwari, nHitita,
10nenne nthala, Aparahamu nathumanannyawe maHitita. Vaavale phivithiyawe Aparahamu wamoca ni Asaara amwaarawe.
11Nanso nakhwileene Aparahamu, Nluku ahonreeriha Isaki. Vano Isaki aakhala vakhiviru ni Iluusi yo Lahayi-Royi.
12Vano ula phu ucuulu wa Sumayili, mwana annyanryawe Aparahamu ni Akaari o Wiciipitu, ipottha ya Asaara.
13Ala phi macina a asaana a Sumayili, yantikhaciye ittharihiyaka eyareelo aya: Nepawoti, mwana omuulupale a Sumayili, Ketari, Apeteli, Mipisamu,
14Misima, Tumaa, Masaa,
15Hattatti, Temaa, Yeturi, Nafisi ni Ketemaa.
16Ala phaari asaana a Sumayili, yakhalacile ahooleli o mahimo, mmawaani mwaya ni mmapuroni mwamakiya yeehaneliya yaala macina ala. Ahooleli ayo yaari khumi nuuwa eeli.
17Sumayili ahokhala myakha iminya wo talathiini na saapa (137) ceyarelo. Ahokhwa ni watthara mayathumwane okhalayi.
18Ucuulu awe wahokhala nttetthe unkhuma o Havila urwaka o Suuri, vakhiviru ni mwiinano wo Wiciipitu, mphantte unrwaa o Siiriya. Ni yaheeserana mpika na asunnaya.
19Ala phi mayaranacelo o nrukulu na Isaki, mwana Aparahamu: Aparahamu ahonnyara Isaki.
20Isaki narina myakha arupayini ceyarelo, ahonthela Repeka, mwana a Petuweli, Nramewu o Patan-Aramu, aari mwanrokorawe Lapanu, ni uyo ciicammo Nramewu.
21Vano Isaki ahonlepela Nluku, kontha amwaarawe ayo yari mwali eekupa. Phimaana Mwaneene Nluku ahaakhula iswali cawe nnyo ni Repeka ahorupala irukulu.
22Urupala wawe, asaana ayo munthukwani mmo yaanawaanaca, ni Repeka aheera: Nlattuni ikikhumelelaka ila itthu ila? Ni ahorwaa unkoha Mwaneene Nluku.
23Vano Mwaneene Nluku ahomwaakhula: Ilapo piili phiriwo munthuukwani mwaa mmo, phimaana anakhuma mommo atthu eeli ni anaahala umwalana: Mmoca uyo nokookhala okuru oompwaha nkhwawe, nanso omuulupale uyo naahala unvarela nteko omwankani uyo.
24Vaavale, waphiilyaya ukati wooyara, khweeli ahorumelelihiya wiira yaari mavatta munthukwani mwawe mmwe.
25Oopacera uyariya uyo aari okharari cookhwiila, ni irutthu awe yothene yaari yo mapururu; phimaana ahovahiya ncina na Isawu.
26Wahoolo ahoyarya mwanhimaawe, ntata nawe naavarenle ikottokottho ya Isawu; phimaana ahovahiya ncina na Yakopi. Ukati waayarawe Repeka, Isaki aarina myakha sitiini ceyarelo.
27Asaana ale yahonuwaca. Isawu aari nlupa oocuwela utotha ni aari nantakhwani. Nanso Yakopi waari nteko awe paahi uhakhela imope ni aakhala mmaheemani.
28Isaki anfenta Isawu, kontha cancivela ukhura inama ceevawe; ni ciicammo Repeka anfenta Yakopi.
29Nanso ikwaha imoca, Yakopi aapyaacaka yoolya, ahowa Isawu navoliye itala, akhumaka utakhwani,
30ni ahommekela eeraka: Ukimeele vakani nhuci woserya uyo. Ukivola itala! Phimaana eehaninyaka ciicammo Eetomu.
31Vano Yakopi ahomwaakhula eeraka: Woopacera ukitumihereke iyuulupale aa.
32Vaavale Isawu aheera: Nna vaa kihanle vakani ukhwa. Kimphurela isiyani iyuulupale eyo?
33Wahoolo Yakopi ahonkhanyereriha Isawu eeraka: Woopacera unlamuliya ulupela. Ni ule aholupela untumihera Yakopi iyuulupale eyo.
34Vano Yakopi ahonvaha Isawu isima ni maruru. Ule aholya nuwurerya, ahonwa nurwaa. Commo Isawu ahovyavyeeha iyuulupale awe.
