1Vaavale Yakopi ahokhuma arwaka ilapo iri mphantte unkhuma ncuwa.
2Nanaanoru ahoona iluusi mmathalani ni mihuwo miraru cokhontwaa cinarupile nceresere mmo, kontha yeeyo iluusi iyo phawuryaya ikhontwaa nnyo. Nahaawo nluku nuulupale nakhuneliya iluusi iyo.
3Nenne nipuro nne canthukumana mihuwo, ahakheli yantamiha nluku nakhuneliya iluusi iyo nuurika maasi wiira avahe mihuwo caya nuukhunela tho iluusi iyo.
4Vano Yakopi ahaakohaca eeraka: Asunnnaka nnokhumaca vayi? Ni ale yahaakhulaca yiiraka: Ninkhuma uHarani.
5Ni uyo aheerelaca: Nnancuwela Lapanu, mwana a Nahori? Nale yahaakhulaca yiiraka: Ninancuwela.
6Ahaakohaca tho eeraka: Haawo nkumi? Ni ale yahomwaakhulaca: Haawo nkumi, ni mwanawe mwanthiyana neehaniya Rakeli phuula wiihile nnya ikhontwaa nnya.
7Ule aheera tho: Nanlelo uthana, khunaphiya ukati wothukumaniha ikhontwaa nnyo. Nvahe maasi ciwurye ni nvira nliha.
8Vano ale yaheeraca coo: Khaninoorya, mpaka cithukumanihiyeke ikhontwaa cothene ni nluku nikhuneeliye iluusi iyo nitamihiye wiira nivahe ratta maasi oowurya.
9Nanlelo oolumacaka nale, ahowa Rakeli ni ikhontwaa ca athumwane kontha uyo aari nhakheli.
10Ni waakhumelenle coo, Yakopi umoona wawe Rakeli mwana a Lapanu arokoraya anumwane, ni ikhontwaa ca Lapanu, Yakopi ahorwaa walusi ni ahotamiha nluku nakhuneleliye nuuvaha uwurya ikhontwaa ca Lapanu, mwanrokoraya anumwane.
11Vaavale Yakopi ahonsalameeha Rakeli, mpaka upacera wunla.
12Yakopi ahonhimerya Rakeli wiira ule mwamunnaya athumwane ni ari mwana a Repeka. Vano Rakeli ahokhuma atthawaka urwaa wahimyacera athumwane.
13Ukati weewilyawe Lapanu ihapari ca Yakopi, mwana a mwanrokorawe, ahomwiikamela nuunkapatta nuunsalameeha mpaka umpiiha uwaanyawe, ni ule ahonttonkacera Lapanu citthu cothene caankhumelenle munkwahani mwawe.
14Vano Lapanu ahomwiirela: Khweeli we uri nikhuva ni irutthu aka. Ni ahokhala ni ule mweeri mmoca.
15Wahoolo Lapanu ahomwiirela Yakopi: Kamana we uri nhimaaka unaakivarela nteko wo mahala? Ukihimerye ihisapu yowuliva.
16Lapanu ahaana asaana eeli asithiyana. Omuulupale uyo ncina nawe Leya ni omwankani uyo ncina nawe Rakeli.
17Vano Leya arina miitho oolocwaca nanso Rakeli arina irutthu yooreera ni ikhove yomaana.
18Ni Yakopi anancivela venci Rakeli ni aheera: Kinaawuvarela nteko myakha saapa nlattu wa Rakeli, mwanaa oomwankani.
19Vano Lapanu ahaakhula eeraka: Wanaareera wuvaha we woohikhala wumvaha nlopwana nkina. Ukhale va ni mi.
20Yakopi ahovara nteko myakha saapa amphavelaka Rakeli, cenyo myakha nnyo oonne ukhala mahuku vakani kontha anancivela cineene.
21Wahoolo Yakopi ahomwiirela Lapanu: Ukivahe amwaaraka, kontha kihomalihera mahuku aka ayo ni kimphavela waathela.
22Vano Lapanu ahaathukumaniha alopwana othene o yoole nttetthe ole ni ahopanka isikuhuulu.
23Vaavale uhiyu, Lapanu ahonkusa Leya ni ahommwiihera Yakopi. Ni ahonthukumanana.
24Vano Lapanu ahokumiha ipottha awe yeehaniya Silipa ni ahonvaha mwanawe wiira arumeke.
25Nanso usa waya amoone Leya. Vano Yakopi ahomwiirela Lapanu: We ukipankile cani? Mi akivanre nteko kimphavelaka Rakeli? Nlattuni we ukithepyacaka?
26Lapanu ahaakhula: Uno khinakhalaka ilemalelo upacera utheliya mwana omwankani, omuulupale hinaya utheliya.
27Vano uhiye umala isumana ithenlyaa ila, ninaahala wuuvaha tho omwankani uyo, nanso uvareke tho nteko myakha saapa.
28Vaavale Yakopi ahokupali. Yahovira isumana yanthenlyawe Leya ni Lapanu ahonvaha Rakeli ukhala amwaarawe.
29Lapanu ahonvaha Rakeli ipottha awe yeehaninya Piila wiira arumeke.
30Yakopi ahonthukumanana Rakeli. Yoole aancivenle wompwaha Leya ni ahonvarela nteko Lapanu myakha saapa.
31Ukati woonnyawe Mwaneene Nluku wiira Leya anavyavyehiya, ahonvaha asaana, nanso Rakeli ari mwali eekupa.
32Leya ahorupala irukulu, ni ahonnyara mwana ni ahonvaha ncina na Rupeni, kontha eera: Mwaneene Nluku hoona icuku caka. Vano, weekhweeli awannyaka anaahala ukifenta.
33Leya ahorupala tho irukulu, ni unnyara wawe mwana nkina aheera: Kontha Mwaneene Nluku heewa wiira kinavyavyehiya, hokivaha tho ula, ni yahonvaha ncina na Simeyoni.
34Ahorupala tho irukulu ikina ni wannyanryawe mwana, aheera: Paahi, awannyaka anaahala waatana ni mi, kontha kihaayarana asaana araru. Phimaana yahonvaha ncina na Levi.
35Ahorupala tho irukulu ni unnyara wawe mwana aheera: Ula nkwaha ola kinamunnuwiha Mwaneene Nluku. Commo yahonvaha ncina na Yutta. Ni ahohiya uyara.
