1Ila yaakhumelenle ukati waryawe mwene uSineyari eehaninya Anrafeli, Ariyoki ari mwene o Elasari, Ketolameri nari mwene o Lamu ni Titali ari mwene o Koyimi.
2Yahowana ikhotto ni Peera, mwene o Sotoma, ni Pirisa mwene o Komora, ni Sinape mwene o Atama, ni Semeperi mwene o Sepoyimi ni amwananaka ni mwene o Pela weehaninya Sowari.
3Othene ale yahaatakaniha anakhotto aya unikuwani no Sitimi, niri ipharyaa yo maakha.
4Myakha khumi na miili yahommarela nteko Ketolameri, nanso mwakha wonakhumi na miraru yahonhanyurihela.
5Mwakha wonakhumi ni micese, ahowa Ketolameri ni mamwene yarinawe ni yahaatthema Amarefayimi o Asteroti-Karimeyimi ni Asusimi o Hamu ni a Emini o Save-Kiriyatayimi.
6Ni Mahorewu o myakoni co Seyiri, mpaka El-Parani uri vakhiviru ni itakhwa.
7Wahoolo yahoturuwa ni yahophiyaca o En-Misipati uneehaninya uKate ni yahotthema ilapo cothene ca Amalekita ni ca Amorewu, yakhala uHasasoni-Tamar.
8Vano yahokhuma mamwene o Sotoma, ni o Komora, o Atima, o Sepowimi ni o Pela uneehaninya Sowari ni yaholamulelana ni wanca ikhotto yaananaka yaale onikuwani no Sitimi,
9amwaananaka Ketolameri, mwene o Lamu ni Titali mwene o Koyimi ni Anrafel, mwene o Sinar, ni Ariyoke, mwene o Elasar. Mamwene macese yaanaanaka mamwene mathanu.
10Vano nikuwa no Sitimi nahocara maliti o marove. Mamwene o Sotoma nu Komora yahotthawa. Akina yahovariya ni yahanle ayo yahotthawela umwakoni.
11Yahokusaca mihakhu cothene co Sotoma ni uKomora ni coolya caya cothene ni yahorwaca.
12Ni ciicammo ahovariya Loti, mwana a munnaawe Aparamu, akhala oSotoma, ni mihakhu cawe ni yahokhumaca.
13Nanso ahowa mmoca ootopweele, phunttonkelaka Aparamu, Nheperewu; aakhala ncoko wo Manre, Mmorewu, munnaawe Esikole ni Aneri, othene yari asikhwawe Aparamu.
14Wiiwa wawe Aparamu wiira mwana amunnawe hotthukiya, ahaakumiha alopwana iminya ttharu nuwa khumi na nanne (318), yayareliye wapuwani wawe ni yahoomolanihaca mpaka uTani.
15Ni yahokawanaca uhiyu yaavyaka mananna owaatthema. Uyo ni ipottha cawe, yaheevaca eenani ni akina ayo woomolanihaca mpaka uHopaa, unkhala mphantte wonthiyana wo Tamasiku.
16Ni ahaakihera mihakhu cothene ni ahomwakihera Loti mwana amunnawe, ni mihakhu cawe, athiyana othene ni anantthukiya othene yariwo.
17Mwene o Sotoma ahomwikamela Aparamu akhumaka okhottoni yonrakaliha Ketolameri ni mamwene yarinawe onikuwani no Save, niri nikuwa na amwene.
18Melekesatiki, mwene o Salemu, ahowiha nkatthe ni ivinyu ni yooyo ari nhooleli ottiini ya Nluku o wirimu.
19Ahonreeriha numwiirela: Nluku muulupale mwaneene irimu ni itthaya oreeriheni Aparamu.
20Ni attottopeliye Nluku o wirimu oovahile eenani mmatatani mwaa. Ni ahommaha mphantte wonakhumi wo citthu cothene carinawe.
21Ni mwene o Sotoma ahomwiirela Aparamu: Ukivaheke atthu ayo, weva ukuseke mihakhu nnyo.
22Nanso Aparamu ahomwiirela mwene o Sotoma: Kihowusa matata aka kilupelaka wa Mwaneene Nluku, Nluku Ooculu, mwaneene irimu ni itthaya.
23Akintthuna itthu phi itthu iri yawaa, hata nripwe wokwakwaatta caa, wiira we uhikiirele: Kihonthaciriha Aparamu.
24Khiiwo imphavelaka, kahiki yoolya ililyaya ipottha caka ni mphantte ommwaca Aneri, Esikoli ni Manree, yakiveleenle. Ayo yakheleke mphantte aya.
