1Vano Isaki ahomwiihana Yakopi, ahonreeriha nunhimerya eeraka: Uhaathele athiyana o Nkanani mu.
2Ukhume ni urwee uPatan-Aramu, wa Petuweli, athumwanaya anumwana ni wanthele mwana a Lapanu, mwanrokoraya anumwana.
3Ni Nluku Okuru Cothene ureerihe, upanke mayoyara ni awuncereryanihe wiira nkhale atthu enci,
4ni uvahe iparakha ca Aparahamu, we ni ucuulu aa uyo, wiira uhalane ilapo iryaa nletto, Nluku invahilyawe Aparahamu.
5Phimaana Isaki ahonveleeliha Yakopi ilapo yo Patan-Aramu, wa Lapanu, mwana a Petuweli Nramewu, mwanrokorawe Repeka, anumwane Yakopi ni Isawu.
6Vano Isawu woonyawe wiira Isaki honreeriha Yakopi ni honveleeliha uPatan-Aramu wiira anthele nthiyana wonwo ni waanreerihawe va ahomwiirela: Uhaathele athiyana o Nkanani mu.
7Yakopi aheewelela athumwane na anumwane ni ahorwaa uPatan-Aramu.
8Isawu woonyawe athumwane wiira khayatteeliye nrima na athiyana o Nkanaa,
9ule ahorwaa wa Sumayili ni ahonthela nthiyana, eehaninya Malati, mwana a Sumayili, mwana a Aparahamu, mwanrokorawe Nepakoti, woohatakanihera athiyana yarinawe akina.
10Yooyo ukati uyo Yakopi ahokhuma uPerisepa arwaka uHarani
11ni ahophiya nipuro narupilyawe kontha waheela. Nenno nipuro nno ahokusa nluku nimoca, aheesa wiimuru ni aheecatalela.
12Vano aholoha nttora woonyawe makwantta aneemesiye vathi mpaka ukwanya irimu ni phoonawe ancelo a Nluku awelaka ni akhuruwaka makwantta ayo.
13Mwaneene Nluku phaari uculu waya makwantta ni aheera: Mi kiri Mwaneene Nluku, Nluku a Aparahamu, athumwana, ni Nluku a Isaki; yeela ilapo irupilyaa ila kinawuvaha we ni ucuulu aa uyo.
14Ucuulu aa unhala ukhala toko ntthupi no vathi, ni unhala umwaryeela urwaka unkhuma ncuwa mpaka unkela ncuwa, urwaka uculu mpaka uhitto, ni mwanlattu wawaa we ni ucuulu aa uyo, unkophwanya iparakha uneethi wothene wo mwiilaponi.
15Phi mi kiri ni we. Kinawusunka mapuro othene ankela uvira, kinawuturusela tho ila ilapo ela, kontha akinhala wuuhiya mpaka kipankeke itthu yukhuluvelihilyaka.
16Vano Yakopi wunwa wawe nkhoveni aheera: Khweeli Mwaneene Nluku ri nna nipuro nna. Mi akaacuwela.
17Ni uvaka aheera: Wopihilyaya nna nipuro nna! Nna khaninakhala nipuro nikina; iri inupa ya Nluku. Ula nkhora wo wirimu.
18Paahi, Yakopi ahonwa wicisuru, ahokusa nluku neesilyawe wiimuru nne, aheemesa, ni ahomiinela makhura waculu waya va.
19Phimaana ahovaha ncina nenno nipuro nno Peteli, nanso yeeyo iparasa eyo ncina naya nokhalayi neehaniya Luusi.
20Ni Yakopi ahomoopa natiri eeraka: Nluku akhalaka ni mi ni akisunkaka ila ikwaha ila, akivahaka yoolya, ni ikuwo coowara,
21ni kituruwelaka wosalama uwaani wa apaapa, Mwaneene Nluku nahala ukhala Nluku aka.
22Ni nenna nluku neemesilyaka nna ninwa ukhala inupa ya Nluku ni cothene cinhalaa ukivaha, khweeli kinawuvaha mphantte wonakhumi.
