Mphattuwelo 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Aparahamu ahokhuma vale arwaaka nttetthe wo Nekepe ni ahorwaa ukhala iriyariru Katesi nuSuri. Wahoolo ahokhala ukati vakani uKerari.

²Uyo eerela: Asaara wiira mwanrokoraka. Vano, Apimeleke, mwene uKerari ahoruma urweliya Asaara ni ahaakusa ukhala awawe.

³Yooyo uhiyu uyo Nluku ahowa waApimeleke munttorani ni ahomwiirela: We unaakhwa! Athiyana yakusilyaa ayo ahotheliya.

⁴Nanso Apimeleke, hinaya waarupana aheera: Pwiya, nnowa ukwanyula uneethi wohicuwela itthu?

⁵Kahimmwe yooyo phikiirenle: Nthiyana ola mwanrokoraka? Ni ayo khayinre: Nlopwana ola nrokoraka? Ipankilyaka iri yo nrima wooreera ni wohinlattu.

⁶Vano Nluku ahomwaakhula munttorani: Aye, mi kinacuwela wiira upankile itthu iyo ni nrima wooreera. Mi kihohiiha wiira uhikufuru phimaana kiwatelihaka warupana.

⁷Vano waturusele athiyana ayo wa awannyaya. awannyaya Ayo nnapiyu, ni anawuswalela wowufentelela, wiira we uhikhwe. Nanso wahaturuseke ukupali wiira we ni awaa othene nnakhwaca.

⁸Wasilyaya wicisuru Apimeleke ahaalattula mahumu awe ni wattonkela cothene cankhumelenle, ni yahoovaca venci.

⁹Wahoolo Apimeleke ahomwiihana Aparahamu ni ahomwiirela: Unipankile cani? Kukosenre isiyani mpaka ukikosiha venci ni omwene aka wothene? Ikipankile iyo khampankiya ntthu.

¹⁰Ni Apimeleke ahonkoha Aparahamu: Yupankihile isiyani commo?

¹¹Aparahamu ahaakhula: Kahoopuwela wiira: Khweeli khaawo nomoova Nluku nna nipuro nna ni kinawiiviya nlattu wa amwaaraka.

¹²Uhiya commo, ayo khweeli mwanrokoraka mphantte wa apaapa, nanso wohikhala mpantte wa maama. Vano ahokhala amwaaraka.

¹³Ni Nluku wakikumihilyawe uwaani wa apaapa, mi kaheerela amwaaraka ayo: Nkiweele iraati: Nipuro phi nipuro ninhalehu uphiya, nkiireleke wiira: Ule nrokoraka.

¹⁴Vano Apimeleke ahowiha ikhontwaa ni imope, ipottha cilopwana ni cithiyana, ahommaha Aparahamu ni ahonturusela amwaarawe ayo.

¹⁵Ni Apimeleke aheera: Ilapo aka iri ni we. Ukhaleke nipuro phi nipuro ninoocivela.

¹⁶Apimeleke ahomwiirela Asaara: Arokoraa ayo kihaavaha ncurukhu elufu (1000) wopheeta, wiira walivyane wutthekenlyaka va wamiithoni wa atthu othene. Commo othene phinhalaya ucuwela wiira we khiiwo incuwelaa yookosa.

¹⁷Wahoolo, Aparahamu ahonvekela Nluku wiira avone, ni Nluku ahomvoniha ni amwaarawe ni ipottha cawe, mpaka yahanca uyaraca,

¹⁸kontha Mwaneene Nluku ahaapankaca eekupa asithiyana othene a Apimeleke nlattu wa Asaara, amwaara a Aparahamu.