1Wahoolo Mwaneene Nluku ahomwiirela Nowee: Ukele nkalawani, we ni ntthoko naa nothene, kontha kihowoona we ukhala ntthu oosariya wariyari wa atthu othene.
2Ukuse inama saapa co nlopwana ni inama saapa co nthiyana co khula ikhapila cinari cohalali. Nanso ciri coharamu nnyo, ukuse piili piili co nlopwana ni co nthiyana.
3Ciicammo ukuse inuni cooculu saapa co nlopwana ni saapa co nthiyana, wiira cikhale cikumi ni ipyo yo mwiilaponi mothene.
4Kontha yaviraru mahuku saapa, kinawana ipula mwiilaponi mothene, mahuku arupayini uhiyu ni uthana. Ni kinakhwanyulaca citthu cothene cipankilyaka vathi va.
5Nowee ahopanka cothene ceereliyawe ni Mwaneene Nluku.
6Yooyo ukati uyo Nowee aahaana myakha iminya siita ceyarelo, ukati wawilyawe naphuvu oocara maasi ilapo yothene.
7Nowee, na asaanawe, na amwaarawe, na asaaraya asaana awe ayo, yahokelaca nkalawani, mwanlattu wo maasi o naphuvu.
8Ukhuma inama cohalali, inama coharamu, asaanuni, ni inama cothene cowiipurula ciri vathi va,
9cahonwela Nowee, nuukela piili piili nkalawani mmo, toko Nluku canlamunlenlyawe Nowee.
10Wanowiira avirakaru mahuku saapa ale, phapacenryaya uwa maasi o naphuvu vathi wothene.
11Ukati warinawe Nowee myakha iminya siita (600) cokumi awe, weettelaya mweeri wo nayeeli, waaphiyeraya mahuku khumi na saapa o mweeri, nenno nihuku nno, cahottinwa miliwi co maasi, ni mikhora cothene co wirimu cahohulya,
12ni yahorupa ipula mwiilaponi mothene, mahuku arupayini, uhiyu ni uthana.
13Vano nenno nihuku nno Nowee na asaanawe, Seemu, Kani ni Yafeti, ciicammo amwaara a Nowee na asaaraya asaanawe ooraru yahokelaca nkalawani.
14Ale ni inama cothene co khula ikhapila, mihuwo cothene co khula ikhapila, inama cothene cowiipurula co khula ikhapila, covava cothene co khula ikhapila, asaanuni othene o khula ikhapila,
15ni inama cothene carina ukumi, cahokela piili piili ni Nowee nkalawani.
16Paahi, inama cothene caakenle caari cowiiraana, co nlopwana ni co nthiyana, toko Nluku canlamulenlyawe. Wiimaleloni, Mwaneene Nluku ahotthyaa nkhora vate.
17Vaavale, naphuvu ule ahokhala mahuku arupayini nari mwiilaponi, maasi yaheenciva, ni yahoteesa ikalawa iyo, ni ile yahohiya itthaya.
18Vano maasi ale yahocara venci cinenne mwiilaponi mothene; nanso ikalawa iyo yaamphempa waculu maasi.
19Vano maasi ayo yanatepa wuncereryaana mwiilaponi, mpaka myako coorekama cothene cari vathi waya irimu cahomiriya ni maasi.
20Maasi ayo yahocara tapha mpaka upwaha miyoono saapa ni nuusu, mpaka myako nnyo cahomiriya.
21Phimaana cahokhwa inama cothene cariwo vathi va, ukhuma mihuwo, inuni, masene, inama cowiipurula cothene mpaka atthu othene.
22Cothene carina ukumi, cimumulelaka mphulani mwaya, caakhala vathiva, cahokhwa.
23Paahi, cahotankanyaa cothene cariwo vathi va, ukhuma ntthu mpaka inama cowiipurula ni nnyo coweetta, mpaka asaanuni oovava uculu, yahomalamalihiya mwiilaponi. Aahanle paahi phi Nowee ni ayo yarinawe nkalawani.
24Maasi ayo yahokhala nlaponi mpaka mahuku iminya wo hansiini (150).
