1Yoole ukati ule, Yakopi ahoweha ni phamoonawe Isawu awaaka, nari na alopwana iminya cese. Vano ahaakawa asaanawe ayo anvahaka Leya, Rakeli na asaarawe eeli oohitteeliheraninya.
2Vano ahaaholiha asaarawe eeli oohitteeliheraninya na asaanaya ayo, ahomweesa Leya na asaanawe ayo uttuli waasaarawe oohitteliheraniya Rakeli ni Yusufu phaari oomalihera.
3Wahoolo Yakopi ahaapwahaca nukhala uhoolo, ni ahoromela vathi imaara saapa mpaka waphilyawe wamunnawe.
4Vaavale Isawu ahontthimakela, ahonkapatta nuunvaha alaahuma nuunsalameeha, ni othene yahonlaca.
5Wahoolo ahoweha ni ahoona athiyana na amirawo ni ahokoha eeraka: Ala phaasipani arinaa ala? Ule ahaakhula eeraka: Ala pha asaana anvahilyawe Nluku wotthuna wawe karumeya aa.
6Vano yahophiyaca asaarawe eeli oohitteliheraniya wamoca na asaanaya ayo ni yahoroma.
7Ciicammo ahophiya Leya wamoca na asaanawe, ni ahoroma. Wiimaliheroni ahophiya Yusufu ni Rakeli, na ayo yahoromaca.
8Nanlelo Isawu anakoha: Unhala wiirihani mihuwo cothene ciphwanyilyaka niphiro nnyo? Yakopi ahomwaakhula: Keera kiphwanye nnema wamiithoni wankunya aka.
9Nanso Isawu ahomwiirela: Mwanhimaka, mi kihaana mihuwo cinci. Cirinaa nnyo uhalaneke.
10Vano Yakopi ahomwaakhula: Mena, wakhala wiira uhaana nnema ni mi ukuse itthuvo yuvahilyaka ela, phimaana koonaka ikhove aa, toko wiira koonne ikhove ya Nluku, kontha we uhokaakhelela.
11Kinawulepela ukuse iparakhaka iwaneliyaa kontha Nluku wo nnema hokivaha, ni kihaana ciinci. Ni ahonkhanyereriha mpaka Isawu waakhelela.
12Isawu aheera: Nrwee neette. Mi kinahoola.
13Nanso Yakopi aheera: Nkunya, kinawoona asaanaka ayo ukenkenyaca ni kihaana ikhontwaa ni imope cotothola naanano kaakuvihacaka, wonihuku nimoca kinawoova ukikhwacera cothene.
14Fatari uhooleke nkunya, mi kinawa uttuli nwo keettaka vakani vakani. Kintthariha malonce onama ciri uhoolo nnya ni amirawo arinaka ala. Kinawuphwanya uSeyiri.
15Vano, Isawu aheera: Kinawuhiyera atthu arinaka ala. Ule ahonkoha: Nlattuni? Wanaatosa mi kaphwanyaru nnema ni nkunya aka.
16Phimaana Isawu ahoturuwela iphiro yaweenlyawe ahokoleelaka uSeyiri.
17Nanso Yakopi ahopwahera arwaka uSukoti. Uphiya wawe ahoteka inupa ni macici onama cawe. Phimaana wiihaninyaka nenno nipuro nno uSukoti.
18Paahi Yakopi ahophiya nari nkumi iparasa yo uSikeni ni ilapo yo Kanaa, akhumaka uPatan-Arami; ni ahomaka vakhiviru nuparasa.
19Ni ahothuma nthala nankhurutunlyawe heema munthalani na asaana a Hemori, athumwane Sikeni ni nsurukhu iminya imoca.
20Vaavale ahoteka ikhilompi ni ahovaha ncina na Nluku, Nluku o Isirayeli.
